ABŞ-da Dağlıq Qarabağ münaqişəsinə həsr edilmiş simpozium keçirilmişdir

ABŞ-ın Massaçusets ştatındakı nüfuzlu Tafts Universitetinin Fletçer Hüquq və Diplomatiya Məktəbində Ermənistan-Azərbaycan, Dağlıq Qarabağ münaqişəsinə həsr edilmiş ikigünlük simpozium təşkil edilmişdir.

Müzakirələrin ilk günü çıxış edən ekspertlər bölgədə vəziyyəti Gürcüstandakı ötənilki böhranın təsiri nöqteyi-nəzərindən araşdırmışlar. Erməni və amerikalı natiqlərlə yanaşı, ölkəmizin Los-Anceles şəhərindəki baş konsulu, Fletçer məktəbinin məzunu Elin Süleymanov, Azərbaycan Respublikası Prezidenti yanında Strateji Araşdırmalar Mərkəzinin şöbə müdiri Gülşən Paşayeva, Azərbaycan Diplomatik Akademiyasının nümayəndəsi Fariz İsmayılzadə, Bakı Dövlət Universitetinin professoru Erkin Qədirli və digərləri Dağlıq Qarabağa dair sülh prosesində çətinliklər, perspektivlər və yanaşmalar, eləcə də bölgənin tarixi və təmsil olunan xalqların etnik kökləri barədə fikir mübadiləsi aparmışlar.

Simpoziumun ikinci günü qapalı müzakirələrlə davam etmişdir.

Azərbaycanı təmsil edən natiqlər vurğulamışlar ki, həll edilməmiş münaqişələr Avrasiya bölgəsinin sabitliyinə davamlı təhdid olaraq qalmaqdadır. Gürcüstanda 2008-ci ilin böhranı bunu bir daha nümayiş etdirmişdir. Ermənistan-Azərbaycan, Dağlıq Qarabağ münaqişəsinin beynəlxalq hüquq prinsiplərinə əsasən uzunmüddətli nizamlanması tapılmadığı təqdirdə bölgənin inteqrasiyası və inkişafından söhbət gedə bilməz. Diqqətə çatdırmışlar ki, Azərbaycan və Gürcüstan fəal şəkildə həyata keçirdikləri regional layihələrin hesabına irəlilədiyi halda, Ermənistanın Dağlıq Qarabağ münaqişəsinə son qoymaması onu digər bölgə dövlətlərindən xeyli geridə qoyur. Azərbaycan-Gürcüstan uğurlu əməkdaşlığı Ermənistan da daxil olmaqla, bütün bölgə dövlətləri üçün qonşuların biri-biri ilə münasibətlərdən bəhrələnməsi modeli ola bilər.
Simpozium iştirakçıları onu da qeyd etmişlər ki, münaqişə iştirakçısı olan dövlətlərin vətəndaş cəmiyyətləri arasında dialoqun yaradılması, eləcə də beynəlxalq ictimaiyyətin münaqişənin həllində davamlı iştirakı Azərbaycan və Ermənistan liderləri arasında aparılan sülh danışıqlarına müsbət təsir göstərə bilər.

Simpoziumun təşkilatçılarından biri olan Münaqişələrin Transformasiyası üzrə "İmagine" mərkəzinin həmtəsisçisi Jalə Sultanlı müzakirələrin nəticələrini AzərTAc-a şərh edərkən bildirmişdir: "Qarşımıza qoyduğumuz məqsəd Dağlıq Qarabağ münaqişəsi və bölgəyə aid mühüm məsələlər üzrə konstruktiv söhbət üçün imkan yaratmaq idi. Münaqişə iştirakçısı olan tərəflərin ekspertləri və gənc tədqiqatçıları iki gün ərzində geniş spektrli rəylərdən ibarət fikir mübadiləsi aparmışlar. Bunu, müsbət amil kimi dəyərləndiririk."

Şəfəq AKİFQIZI,

AzərTAc-ın xüsusi müxbiri

Azərbaycan.- 2009.-29 sentyabr.- S. 5.