Beynəlxalq elmi konfransda Azərbaycan aliminin məruzəsi maraqla qarşılanmışdır

Özbəkistanın paytaxtı Daşkənddə "Tətbiqi riyaziyyat və informasiya texnologiyalarının aktual problemləri" mövzusunda beynəlxalq elmi konfrans keçirilmişdir.

Azərbaycan, Rusiya, Özbəkistan, Qazaxıstan, Malayziya, Qırğızıstan və digər ölkələrdən olan nümayəndələrin iştirak etdikləri beynəlxalq konfransda Bakı Dövlət Universiteti Tətbiqi Riyaziyyat Elmi-Tədqiqat İnstitutunun direktoru, konfransın beynəlxalq proqram komitəsinin üzvü, akademik Fikrət Əliyev qazlift quyularında neftçıxarma prosesində stabilizasiya məsələləri ilə bağlı məruzə etmişdir.

Eyni zamanda, tədbirdə riyaziyyatın, informasiya texnologiyalarının aktual problemləri üzrə müzakirələr aparılmış, Özbəkistan Riyaziyyat Cəmiyyətinin Türk Dünyası Riyaziyyat Cəmiyyətinə (TDRC) assosiativ üzv qəbul olunması barədə razılıq əldə edilmişdir.

Konfrans çərçivəsində akademik Fikrət Əliyev TDRC-nin təsis etdiyi "Nəzəri və tətbiqi riyaziyyat" jurnalının təqdimatını keçirmişdir.

AzərTAc

Azərbaycan.- 2009.- 30 sentyabr.- S. 7.