Türkiyə Azərbaycanın mənafelərinə zidd olan heç bir addım atmayacaqdır

Türkiyə Böyük Millət Məclisinin (TBMM) sədri Məhmət Əli Şahin sentyabrın 26-da Azərbaycanın Baş naziri Artur Rasizadə ilə görüşdə bildirmişdir ki, Türkiyə Azərbaycanın mənafelərinə zidd olan heç bir addım atmayacaqdır. Türkiyə parlamentinin başçısı onu da əlavə etmişdir ki, Dağlıq Qarabağ münaqişəsi tənzimlənməyincə Ermənistan-Türkiyə sərhədinin açılması mümkün deyildir.

Baş nazir Artur Rasizadə Məhmət Əli Şahini yüksək vəzifəyə seçilməsi münasibətilə təbrik etmiş və əmin olduğunu bildirmişdir ki, qardaş ölkənin parlament nümayəndə heyətinin bu səfəri iki dövlət arasında əlaqələrin genişlənməsinə və dərinləşməsinə xidmət edəcəkdir. O, Türkiyə rəhbərliyinə beynəlxalq aləmdə Azərbaycanın mövqelərini həmişə dəstəklədiyinə görə təşəkkürünü bildirmişdir.

Türkiyə Böyük Millət Məclisinin sədri bildirmişdir ki, onun səfərinin məqsədi Türkdilli Ölkələrin Parlament Assambleyasının gələn həftə Bakıda keçiriləcək birinci sammitində iştirak etməkdir. O qeyd etmişdir ki, hər dəfə Azərbaycan paytaxtına gələrkən bu şəhərin simasında müsbət dəyişikliklərin şahidi olur.

AzərTAc

Azərbaycan.- 2009.- 27 sentyabr.- S. 2.