2008-ci il İsmayıllı üçün uğurlu oldu

2008-ci ili İsmayıllı rayonu üçün uğurlu saymaq olar. Ötən müddət ərzində İsmayıllıda da başlıca diqqət Prezidentin imzaladığı "Azərbaycan Respublikasında sosial-iqtisadi inkişafın sürətləndirilməsi tədbirləri haqqında" 24 noyabr 2003-cü il, "Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər) təsdiq edilməsi haqqında" 11 fevral 2004-cü il, "Azərbaycan Respublikası regionlarının, o cümlədən Qəbələ, İsmayıllı, Oğuz və Şamaxı rayonlarının sosial-iqtisadi inkişafının sürətləndirilməsinə dair əlavə tədbirdər haqqında" 25 avqust 2005-ci il tarixli sərəncamlarından irəli gələn vəzifələrin yerinə yetirilməsinə yönəldilmişdir.

İsmayıllıda görülən yenidənqurma, abadlıq-quruculuq işləri rayona gələn hər kəsin ilk baxışdanca diqqətini cəlb edir. İsmayıllı Rayon İcra Hakimiyyəti başçısının birinci müavini Rəfael Əhmədovla bu mövzuda bir neçə dəfə söhbət etmişik. R. Əhmədov bir məqamı xüsusi vurğulayır ki, indi ismayıllılılar qonşu rayonlardakı dost-tanışlarını öz rayonlarına heç bir sıxıntı çəkmədən qonaq dəvət edə bilirlər. Çünki təbiətin İsmayıllıya verdiyi gözəlliyə insan əlinin zəhməti də əlavə olunub - yeni tikililər, abadlıq-quruculuq işləri, rahat yollar, istirahət parkları, mədəniyyət ocaqları. Bir sözlə, gələn qonağa göstərmək üçün İsmayıllıda çox işlər görülüb.

Əslində, söhbət təkcə qonaqdan getmir, görülən işlər ismayıllılıların özlərinin həyat tərzini xeyli yaxşılaşdırıb. İsmayıllı şəhərinin mərkəzində Heydər Əliyev Muzeyi, Əmək və Əhalinin Sosial Müdafiəsi Nazirliyinin rayon şöbəsi, maliyyə idarəsi üçün inzibati binalar, əlillər və şəhid ailələri üçün 36 mənzilli yaşayış binası tikilib istifadəyə verilmişdir. Əhalinin mənzil tələbatını ödəmək üçün yerli iş adamları da çoxmərtəbəli yaşayış binası tikməyə başlayıblar. İllərdən bəri yığılıb qalan, rayon əhalisini narahat edən problemlərin həlli istiqamətində görülən işlər rayonun simasını tamamilə dəyişib. Bu, insanlara həm də mənəvi rahatlıq gətirir. Rayonda hər kəsin diqqətini çəkən çox müasir mədəniyyət və istirahət kompleksi yaradılmışdır. Kompleksi əhatə edən Heydər Əliyev adına mədəniyyət evinin, mərkəzi kitabxananın, uşaq kitabxanasının dam örtüyü dəyişdirilmiş, fasadları təmir olunmuş, eləcə də rayon icra hakimiyyətinin inzibati binasında yenidənqurma işləri aparılmışdır.

İsmayıllıda 2008-ci ildə kənd təsərrüfatı məhsullarının istehsalında yüksək artım müşahidə olunmuşdur. Əvvəlki illə müqayisədə 11865 ton çox dənli və dənli-paxlalı bitkilər istehsal olunmuşdur. Ümumilikdə isə son 5 ildə rayonda kənd təsərrüfatı məhsulları istehsalı 62,4 faiz artmışdır.

İsmayıllının qışı sərt keçir. Bu baxımdan ötən illərdən qalan müəyyən problemlər həll edilmiş, İsmayıllı şəhərinin bir sıra küçələrində və Mican kəndində qaz kəmərləri təzələnmiş, rayon mərkəzinin digər ərazilərinə polietilen borularla qaz xətti çəkilməsi üçün layihə-smeta sənədləri hazırlanmışdır. Artıq həmin küçələrdə təmir işləri başa çatmışdır. Eyni zamanda rayon mərkəzinin qazla zəif təmin olunan hissəsinin və İsmayıllı-Başqal istiqamətində kəndlərin qaz təminatını yaxşılaşdırmaq üçün İsmayıllı şəhərində avtomat qazpaylayıcı stansiya tikilib istismara verilmiş, Kürdmaşı kəndində yerləşən qazpaylayıcı stansiya işlək vəziyyətə gətirilmiş, Kürdmaş - Uştalqışlaq - Mollaisaqlı daşıyıcı qaz kəməri təmir edilmiş, Uştalqışlaq, Hacıhətəmli və Mollaisaqlı kəndlərinə təbii qazın verilməsi bərpa olunmuşdur. Bunlarla yanaşı, qeyd etmək lazımdır ki, qaz təminatı ilə əlaqədar bir çox kəndlərdə təmir - bərpa işləri görülsə də, əksər yerlərdə qazın təzyiqi aşağıdır.

İsmayıllı Rayon Paylayıcı Elektrik Şəbəkəsinin xidməti ərazisində olan hava xətlərində və yarımstansiyalarda da bir sıra əsaslı və cari təmir işləri aparılmışdır. Hava xətlərində 106 dəmir-beton dirək basdırılmış, 7,5 kilometr uzunluğunda xətt, eləcə də zədələnmiş 16 transformator əsaslı təmir olunmuş, Talıstan, Əhən, Cülyan kəndlərində və İsmayıllı şəhərində yeni transformator yarımstansiyalar quraşdırılmışdır. Rayonun dağ kəndlərini elektrik enerjisi ilə təmin etmək üçün hava xətlərinin çəkilməsi davam etdirilir. Artıq Lahıc qəsəbəsinə çəkilmiş 8,5 kilometr uzunluğunda yeni 10 hava xətti istismara verilmişdir.

İsmayıllının yerləşdiyi coğrafi şərait rayonda turizmin inkişafına geniş perspektivlər açır. Qədim mədəniyyət mərkəzi olan Lahıc qəsəbəsindəki tarixi abidələr xarici turistləri daha çox cəlb edir. Elə bu məqsədlə son illər Lahıc qəsəbəsinin tarixi görkəminin bərpa olunması ilə əlaqədar müvafiq işlər görülmüşdür. Ümumilikdə tarix və mədəniyyət abidələrinin qorunub saxlanılması, bərpası ilə əlaqədar görüləsi işlər, eləcə də xarici və yerli turistlərin marağına səbəb olan marşrutların - Lahıc və Başqal qəsəbə qoruqları ərazisində olan tarix və mədəniyyət abidələrinin, Qız qalası, Cavanşir qalası, rayon mərkəzində yeni tikilmiş Heydər Əliyev Muzeyi, tarix-diyarşunaslıq muzeyi, XIX əsrə aid olan məscidin və digər tarix və mədəniyyət abidələrinin siyahısı müəyyənləşdirilərək Mədəniyyət Nazirliyinə təqdim olunmuşdur.

Telman NƏZƏRLİ

Azərbaycan.-2009.-1 yanvar.-S.5.