Azərbaycanda bütün sosial proqramlar uğurla icra olunur

Azərbaycan dövləti bu gün yüksəliş dövrünü yaşayır. Cənubi Qafqazın ararıcı dövlətinə çevrilən respublikamız iqtisadi potensialını ildən-ilə gücləndirir. Azərbaycan ötən il də dünyanın ən sürətli inkişaf edən ölkəsi olmuşdur. Ulu öndər Neydər Əliyevin əsasını qoyduğu iqtisadi islahatlar kursunun Prezident İlham Əliyev tərəfindən uğurla davam etdirilməsi yüksək nəticələrə gətirib çıxarmışdır. 2008-ci ildə Dünya Bankı Azərbaycanı bir nömrəli islahatçı ölkə kimi tanıdığını bəyan etmişdir. Bu fakt Azərbaycanda aparılan uğurlu iqtisadi islahatlara nüfuzlu beynəlxalq qurumlar tərəfindən verilən yüksək qiymətdir.

Azərbaycan vətəndaşlarının mənafeyinə xidmət göstərən islahatlar kursu uğurla davam etdirilir. Dövlət başçısı tərəfindən son beş il ərzində qəbul edilmiş çoxsaylı dövlət proqramları bölgələrdə həyatın canlanmasına, sahibkarlığın geniş vüsət almasına, özəl sektorun inkişafına, yeni iş yerlərinin açılmasına, yoxsulluq probleminin aradan qaldırılmasına səbəb olmuşdur. Paytaxtla yanaşı, respublikanın bölgələrində də yeni infrastruktur layihələrinin həyata keçirilməsi, bir-birindən yaraşıqlı müasir binaların inşası, geniş tikinti-abadlıq tədbirləri Azərbaycanın kompleks inkişafına gətirib çıxarmışdır.

Qeyri-neft sektorunun inkişafı ilə regionların tarazlı və davamlı şəkildə yüksəlişi, əhalinin sosial rifahının daha da yaxşılaşdırılması, faydalı məşğulluğun təmin edilməsi qarşıda daha yeni imkanlar açmışdır. Milli iqtisadiyyatın müxtəlif sferalarına yönələn sərmayələrin qeyri-neft sektoruna, regionların inkişafına doğru istiqamətləndirilməsi, sahibkarlıq fəaliyyətinə mane olan süni əngəllərin aradan qaldırılması iqtisadi siyasətdə prioritetlik təşkil etmişdir. Hazırda Azərbaycan iqtisadiyyatının 85 faizi özəl sektorda formalaşır. Azərbaycan iqtisadi cəhətdən günbəgün möhkəmlənir və bu, ilk növbədə, insanların gündəlik həyatında özünü qabarıq büruzə verir.

2008-ci il ölkənin əsas makroiqtisadi göstəricisi olan ümumi daxili məhsul 2007-ci ilin eyni dövrü ilə müqayisədə 16,5 faiz artmışdır, adambaşına düşən ümumi daxili məhsul istehsalı da yüksəlmişdir. İqtisadiyyatın inkişafı neft sektoru ilə bərabər digər sahələrin də sürətli artımı hesabına baş vermişdir. Bu isə iqtisadiyyatın şaxələndirilməsi istiqamətində dövlətin gördüyü məqsədyönlü tədbirlərin düzgünlüyünü təsdiq edir. Ümumi daxili məhsulun tərkibində xüsusi çəkiyə malik olan sənaye sahələrində artım müşahidə edilmişdir. Ərzaq təhlükəsizliyinin təmin edilməsi baxımından ən mühüm sahə olan aqrar sektorda artım sürəti son illərdə ən yüksək həddə - 10,7 faizə çatmışdır. Bunu, ilk növbədə, son vaxtlar aqrar sahədə istehsalın stimullaşdırılmasına yönəldilən kompleks tədbirlərin bəhrəsi kimi qiymətləndirmək olar. Əhalinin ərzaq təhlükəsizliyinin təminatı məqsədilə ölkə başçısı tərəfindən imzalanmış Dövlət Proqramı (2008-2013-cü illər) bu sahədə əsaslı dönüşün yaranacağını söyləməyə ciddi əsas verir. 2008-ci ildə ölkəmizin maliyyə mövqeyi də əhəmiyyətli dərəcədə möhkəmlənmiş, dövlətin ümumi valyuta ehtiyatları cari ilin əvvəlinə nisbətən 80 faizdən çox artmışdır.

Son illərdə ölkəmizin həyatında dinamik inkişaf sosial sahədə ardıcıl islahatların aparılmasına böyük imkanlar açmışdır. Azərbaycanda bütün sosial proqramlar uğurla icra olunmuş və bu istiqamətdə işlər hazırda da davam etdirilir. Ötən beş ildə paytaxtda və regionlarda ən müasir tələblər səviyyəsində təhsil, səhiyyə ocaqlarının, olimpiya idman komplekslərinin tikilib istifadəyə verilməsi bunlara əyani misaldır. Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa təbrikində ölkədə sosial proqramların davam etdiriləcəyini bildirmişdi: "Azərbaycanda sosial obyektlərin tikintisi geniş vüsət almışdır. Son beş il ərzində Azərbaycanda 1600 yeni məktəb tikilmişdir və növbəti illərdə bu siyasət davam etdiriləcəkdir. Yeni məktəblərin tikintisi davam etdiriləcəkdir. Bütün bölgələrdə, demək olar ki, hər yerdə yeni müasir tibb müəssisələri yaradılır. Onlar ən müasir avadanlıqla təchiz olunur ki, insanlara gözəl tibbi xidmət göstərilsin. Bu da bizim sosial siyasətimizin təzahürüdür. Ünvanlı sosial yardım proqramı icra olunur və bunun da çox böyük əhəmiyyəti var. Baxmayaraq ki, Azərbaycanda yoxsulluq şəraitində yaşayanların sayı son beş il ərzində 49 faizdən 16 faizə düşmüşdür və əminəm ki, 2008-ci ilin yekunlarına görə bu rəqəm daha da aşağı düşəcəkdir, hələ ki, yoxsulluq şəraitində yaşayan vətəndaşlar var və dövlət onlara kömək üçün hər şey etməlidir. Ona görə ünvanlı sosial yardım proqramı bundan sonra da davam etdiriləcək və əminəm ki, Azərbaycanda yoxsulluq kimi ictimai bəla aradan qaldırılacaqdır".

Ölkəmizin iqtisadi imkanları artdıqca büdcə gəlirləri də yüksəlir. 2009-cu ilin dövlət büdcəsindən sosial sahəyə vəsaitlərin artırılması da dövlətin sosialyönümlü siyasət yürütdüyündən xəbər verir. 2008-ci ildə minimum əməkhaqqı və minimum pensiyanın həcmi 50 faiz artırılmışdır və bu tendensiya qarşıdakı illərdə də davam etdiriləcəkdir. Sosial müdafiəyə ehtiyacı olan vətəndaşlara dövlət daim diqqət və qayğı göstərməkdədir. Qaçqın və məcburi köçkünlərin sosial rroblemlərinin həlli istiqamətində də ötən illərdə mühüm işlər həyata keçirilmişdir. Qaçqınların və məcburi köçkünlərin sosial müdafiəsi ilə bağlı hüquqi bazanın təkmilləşdirilməsi məqsədilə ölkə Prezidenti tərəfindən müvafiq fərman və sərəncamlar imzalanmışdır. Dövlət başçısı tərəfindən "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"nın imzalanması da Azərbaycan Prezidentinin qaçqın və məcburi köçkünlərə göstərdiyi diqqət və qayğının ifadəsidir. Azərbaycan dövləti qaçqın və məcburi köçkünlərə sərf etdiyi vəsaitin həcminə görə dünyada birinci yerdədir. Bu isə Azərbaycan Prezidenti və dövlətinin hər bir vətəndaşına, xüsusilə sosial müdafiəyə ehtiyacı olanlara göstərdiyi qayğının əyani təzahürüdür.

Azərbaycan ərazisindəki bütün çadır şəhərcikləri ləğv edilib. Məcburi köçkünlər yeni salınmış abad, müasir qəsəbələrə köçürülüblər. Onların yaşadıqları qəsəbələrdə müvafiq infrastrukturlar sosial-mədəni obyektlər, yardımçı elektrik stansiyaları, yanğınsöndürmə məntəqələri, məktəblər, xəstəxanalar, rabitə qovşaqları, uşaq bağçaları və digər obyektlər tikilib, yollar salınıb, irriqasiya sistemləri yaradılıb. Bütün bunlar ölkə rəhbərliyinin apardığı uğurlu sosial siyasətin bariz nümunəsidir.

Azərbaycanın iqtisadi imkanları artdıqca sosial proqramların miqyası da genişlənir. Ölkə vətəndaşlarının maddi rifah halının ildən-ilə yüksəlməsi aparılan sosial siyasətin düzgünlüyünü təsdiq edir və bunun alternativinin olmadığını sübuta yetirir.

E.HACIALIYEV

Azərbaycan.-2009.-6 yanvar.-S.1-6.