Yola saldığımız il Avropa Şurası Parlament Assambleyasında Azərbaycan üçün uğurlu olmuşdur

AŞPA-dakı Azərbaycan nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr daimi komissiyasının sədri Səməd Seyidov AzərTAc-a bildirmişdir ki, ölkəmizin mövqeləri təşkilatda daha da möhkəmlənmiş, Ermənistanın durumu isə xeyli zəifləmişdir.

S.Seyidov demişdir: "2008-ci ildə Azərbaycan rəhbərliyi ölkənin təbliği və maraqlarının qorunması, beynəlxalq aləmdə nüfuzunun daha da möhkəmlənməsi ilə bağlı gərgin və səmərəli fəaliyyət göstərmişdir. Ötən il Azərbaycanın ərazi bütövlüyü məsələsi Birləşmiş Millətlər Təşkilatında ən yüksək səviyyədə müdafiə olunmuşdur. BMT Baş Məclisində Dağlıq Qarabağla bağlı qəbul olunmuş sənəd AŞ PA-nın sənədlərində də öz əksini tapmışdır. Ötən il qəbul edilən sənəd bir daha imkan yaratmışdır ki, Avropa Şurasında birdəfəlik və heç bir şübhə altına qoyulmadan Azərbaycanın ərazi bütövlüyü müdafiə edilsin.

2008-ci ilin avqust ayında Rusiya ilə Gürcüstan arasında baş verən münaqişə beynəlxalq münasibətlərdə gərginlik yaratmışdır. Avropa Şurasının rəhbərliyi Azərbaycan rəhbərliyinə müraciət edərək sülhə nail olunmasında öz səylərini əsirgəməməyi xahiş etmişdir. Azərbaycan rəhbərliyinin yeritdiyi tarazlı və düzgün siyasət nəticəsində ölkəmizin maraqları yüksək səviyyədə müdafiə olunmuşdur. İnkişaf üçün yeni əsaslar yaranmışdır".

S.Seyidov qeyd etmişdir ki, ötən ilin oktyabrında Azərbaycanda keçirilmiş prezident seçkiləri də bütün beynəlxalq təşkilatlar və ölkələr tərəfindən demokratik standartlara uyğun, xalqın iradəsini əks etdirən seçkilər kimi qeyd edilmişdir. Prezident seçkiləri Avropa Şurasında yalnız bir dəfə daimi komitədə müzakirə olunmuş, Parlament Assambleyasında ümumiyyətlə müzakirələrdən imtina edilmişdir. Ona görə ki, şəffaf və demokratik şəraitdə keçirilmiş, xalqın iradəsini əks etdirən seçkilərin AŞ PA-da müzakirəsinə ehtiyac qalmamışdır.

Azərbaycandan fərqli olaraq Ermənistan artıq bu qurumda təzyiqlə üzləşir. Ermənistan məsələsi Parlament Assambleyasında müzakirədədir. Bu ilin yanvar sessiyasında yenə də ciddi müzakirə olunacaqdır. Məsələ o qədər ciddidir ki, Ermənistanın bu təşkilatda səsvermə hüququ belə alına bilər.

S.Seyidov demişdir ki, başqa ölkələrin bu və ya digər problemləri, insan haqlarının qorunması kimi məsələlər Avropa Şurasında müzakirə olunarkən Azərbaycan nümunə göstərilir. Bu baxımdan da yola saldığımız 2008-ci il Strasburqda Azərbaycan üçün çox uğurlu və məhsuldar olmuşdur.

Azərbaycan.-2009.-7 yanvar.-S.3.