Ümumxalq səsverməsinin keçirilməsi ilə əlaqədar prokurorluq orqanlarının vəzifələri müəyyənləşdirilib

 

Yanvarın 8-də Baş Prokurorluqda "Azərbaycan Respublikasının Konstitusiyasına əlavələr və dəyişikliklər edilməsi haqqında" Referendum Aktı layihəsinin müzakirəsi, onun izahı və ümumxalq səsverməsinin keçirilməsi ilə əlaqədar prokurorluq orqanlarının qarşısında duran vəzifələrə həsr olunmuş kollegiya iclası keçirilmişdir.

Baş Prokurorluğun mətbuat xidmətindən bildirmişlər ki, kollegiya iclasında məruzə ilə çıxış edən baş prokuror Zakir Qaralov 2008-ci hesabat ilinin bütövlükdə Azərbaycan Respublikası və xalqımızın həyatında, o cümlədən prokurorluq orqanları üçün bir çox əlamətdar hadisələrlə zəngin olduğunu qeyd etmişdir. Dövlətimizin başçısı İlham Əliyevin rəhbərliyi altında 2008-ci ildə Azərbaycan Respublikasının tərəqqisi və sosial-iqtisadi inkişafı sahəsində möhtəşəm nailiyyətlər əldə edildiyi, dövlətimizin başçısının 31 dekabr - Dünya Azərbaycanlılarının Həmrəyliyi Günü və Yeni il bayramı münasibətilə xalqımıza ünvanlanmış təbrikində bu barədə ətraflı məlumat verildiyi xüsusi olaraq diqqətə çatdırılmış, son beş ildə iqtisadi inkişaf baxımından Azərbaycanın dünyada birinci ölkə olması, Dünya Bankı tərəfindən respublikamızın bir nömrəli islahatçı ölkə elan edilməsi həyata keçirilən məqsədyönlü iqtisadi islahatların uğurlu nəticəsi kimi dəyərləndirilmişdir.

2008-ci il oktyabrın 15-də beynəlxalq standartlara uyğun olaraq tam demokratik şəraitdə və şəffaf prosedurlar əsasında, beynəlxalq təşkilatların və xarici ölkələrin çoxsaylı müşahidəçilərinin ciddi nəzarəti altında keçirilmiş prezident seçkilərində xalqın mütləq əksəriyyətinin etimadını qazanan Heydər Əliyev siyasi kursunun ən layiqli davamçısı İlham Əliyevin ikinci dəfə Azərbaycan Respublikasının Prezidenti seçilməsi, bu seçkilərin İlham Əliyevin rəhbərliyi altında reallaşdırılan yeni məzmunlu müasir dövlətçilik siyasətinin təntənəsi olduğu bəyan edilmişdir.

Yola saldığımız ötən ildə bir sıra dövlət təsisatları kimi, Azərbaycan Prokurorluğunun da 90 illik yubileyinin təntənəli şəkildə qeyd edilməsi, dövlət səviyyəsində prokurorluğa göstərilən diqqət və qayğının təzahürü olaraq, yubiley ərəfəsində prokurorluq orqanları əməkdaşının böyük bir qrupunun yüksək dövlət mükafatlarına və ali xüsusi rütbələrə layiq görülməsi, prokurorluğun fəaliyyətinin müasirləşdirilməsinə dair 2009-2011-ci illər üçün Dövlət Proqramının təsdiq olunması prokurorluq əməkdaşları üçün müstəsna əhəmiyyətli hadisə olduğu vurğulanmışdır.
Baş prokuror Zakir Qaralov hesabat ilinin ən çox diqqət çəkən mühüm siyasi hadisələrindən biri kimi Azərbaycan Respublikası Milli Məclisi tərəfindən 2008-ci il dekabrın 26-da "Azərbaycan Respublikasının Konstitusiyasına əlavələr və dəyişikliklər edilməsinə dair ümumxalq səsverməsinin (referendumun) keçirilməsi haqqında" Qərar qəbul edilməsini yüksək qiymətləndirmişdir. Konstitusiyanın bir çox normalarının təkmilləşdirilməsi, insan və vətəndaş hüquq və azadlıqlarının daha səmərəli müdafiə olunması, Azərbaycan Respublikası vətəndaşlarının layiqli həyat səviyyəsinin təmin edilməsi, ali dövlət hakimiyyəti orqanlarının, habelə ədliyyə, məhkəmə hakimiyyəti və yerli özünüidarə orqanlarının inkişaf etdirilməsi məqsədi daşıyan bu əlavə və dəyişikliklərin çox mühüm siyasi əhəmiyyəti nəzərə alınmaqla onun hərtərəfli öyrənilməsi və əhali arasında izahının aparılması ilə əlaqədar prokurorluq orqanlarının qarşısında mühüm vəzifələr durduğu diqqətə çatdırılmışdır.

"Azərbaycan Respublikasının Konstitusiyasına əlavələr və dəyişikliklər edilməsi haqqında" Referendum Aktı layihəsinin müzakirəsi, onun izahı və ümumxalq səsverməsinin keçirilməsi ilə əlaqədar prokurorluq orqanlarının vəzifələri barədə baş prokurorun müavini Namiq Əsgərovun məlumatı əsasında aparılan müzakirələr nəticəsində Referendum Aktı layihəsinin prokurorluq işçiləri tərəfindən öyrənilməsi və ictimaiyyət arasında izahı ilə əlaqədar Tədbirlər Planı təsdiq olunmuşdur.

Kollegiya iclasında, eyni zamanda Baş Prokurorluğun Təşkilat-Analitik İdarəsinin rəisi Əzizağa Həsənovun məlumatı əsasında Azərbaycan Respublikası Baş Prokurorluğunun 2008-ci ilin ikinci yarısına dair iş planının icra vəziyyəti və cari ilin birinci yarısına dair iş planı barədə məsələ müzakirə olunmuşdur.

Baş prokuror Zakir Qaralov Baş Prokurorluğun idarə və şöbələrinin rəhbərlərinə, Respublika Hərbi, Naxçıvan Muxtar Respublikası və bütün tabe prokurorlara 2009-cu ilin birinci yarısına dair iş planının, habelə prokurorluq orqanlarının fəaliyyətinin müasirləşdirilməsinə dair Dövlət Proqramında nəzərdə tutulmuş tapşırıqların icrasına dair Tədbirlər Planının müəyyən edilmiş müddətlər ərzində və yüksək keyfiyyətli icrasının təmin edilməsi ilə əlaqədar konkret tapşırıqlar vermişdir.

 

 

AzərTAc

 

Azərbaycan.- 2009.- 9 yanvar.- S. 4.