Referendumla bağlı təşəbbüs qrupları yaradılmış, tədbirlər planı hazırlanmışdır

 

Son beş ildə Yardımlı rayonu böyük inkişaf yolu keçmişdir. Bu müddət ərzində burada müasir tələblərə cavab verən neçə-neçə təhsil, səhiyyə, mədəniyyət ocaqları tikilib istifadəyə verilmişdir. Rayon mərkəzində, uca dağlar qoynunda salınmış Heydər Əliyev parkı əhalinin sevimli istirahət mərkəzinə çevrilmişdir. 2006-cı ildə istifadəyə verilən körpələr evi - uşaq bağçası, yeni stadion, xalça və tikiş sexi, ticarət mərkəzi camaatın ürəyincə oldu, onlarda gələcəyə inamı artırdı. Yaradılan yeni iş yerləri adamların məşğulluğuna, yoxsulluğun azaldılmasına, sosial rifahın yüksəlməsinə müsbət təsir göstərdi. 2007 - 2008-ci illərdə də Yardımlıda çox işlər görüldü. Yeni-yeni yaşayış evləri, inzibati binalar, turizm mərkəzləri inşa olundu. Yardımlı qəsəbəsinə şəhər statusu verildi. 53 kilomertlik Masallı - Yardımlı magistral avtomobil yolunun, habelə Yardımlıya təbii qaz xəttinin çəkilişi rayonun tarixində mühüm hadisəyə çevrildi. Son 5 il ərzində Prezident cənab İlham Əliyev 2 dəfə rayona səfər etdi, əhali ilə görüşlər keçirdi, adları çəkilən obyektlərin açılış mərasimində iştirak etdi, eyni zamanda rayonun inkişafı üçün göstərişlərini verdi. Bunun nəticəsi olaraq keçən il oktyabrın 15-də keçirilən prezident seçkilərində rayon əhalisi ümummilli lider Heydər Əliyev ideyalarının layiqli davamçısı İlham Əliyevə səs verdi.

Rayonda martın 18-də keçiriləcək referenduma hazırlığa da yaxşı əhval-ruhiyyə ilə başlamışlar. Urakəran kəndində keçirilən toplantıda çıxış edənlər bildirmişlər ki, ötən il dekabr ayının 26-da Milli Məclisin qəbul etdiyi "Azərbaycan Respublikasının Konstitusiyasına əlavələr və dəyişikliklər edilməsinə dair ümumxalq səsverməsinin (referendumun) keçirilməsi haqqında" qərar müstəqillik yolunda qətiyyətli addımlar atan və demokratik prinsiplər əsasında inkişaf edən Azərbaycanda Konstitusiyanın təkmilləşdirilməsi deməkdir.

Rayonun digər 8 yaşayış məntəqəsində də yığıncaqlar keçirilmiş və 605 nəfəri yeni yaradılan ilkin təşəbbüs qruplarına üzv seçmişlər. Seçilmiş nümayəndələr bu qənaətdədirlər ki, Konstitusiyaya əlavə və dəyişikliklər Azərbaycan dövlətinin konstitusion əsaslarının daha da möhkəmləndirilməsi, insan hüquqlarının və azadlıqlarının daha yaxşı qorunması, vətəndaşların layiqli həyat səviyyəsinin təmin edilməsi, demokratiyanın gücləndirilməsi və yerli özünüidarəetmənin inkişafı baxımından zəruridir.

 

Seyran CAVADOV

 

Azərbaycan.-2009.-10 yanvar.-S.3.