Referendumun keçirilməsi ilə əlaqədar vəzifələr müəyyənləşdirilib

Məlum hadisələr nəticəsində 1993-cü il aprel ayının əvvəllərində Kəlbəcər rayonunu məcburi tərk etmiş 65 mindən çox əhali respublikanın 58 rayon və şəhərinin 1000-dən çox yaşayış məntəqəsində müvəqqəti məskunlaşmışdır.

Ölkənin digər işğal olunmuş rayonlarının əhalisi ilə yanaşı, Kəlbəcər rayonunun əhalisi də ümummilli lider Heydər Əliyevin qayğısı və hərtərəfli köməyi ilə ötən əsrin 90-cı illərinin acılarını və ağrısını hiss ediləcək dərəcədə əzab-əziyyətsiz keçirdilər. Qədirbilən kəlbəcərlilər 1993-cü ildən indiyədək ulu öndər Heydər Əliyev siyasi kursuna öz sədaqət və inamını ötən seçkilərdə dönə-dönə öz yüksək fəallıqları ilə sübut etmişlər.

Məsələn, 2008-ci il oktyabr ayının 15-də keçirilən prezident seçkilərində rayon üzrə 42948 seçicidən 35994 nəfəri və ya seçicilərin 83,80 faizi seçkilərdə iştirak etmiş, onlardan 33889 nəfəri və ya səsvermədə iştirak edənlərin 95 faizi ulu öndərin siyasi kursunun layiqli davamçısı İlham Əliyevin yenidən prezident seçilməsinə səs vermişlər.

Kəlbəcərlilər bu il martın 18-nə təyin olunmuş referendumu da razılıq hissi ilə qarşıladılar. Elə ilk gündən rayon fəalları, eləcə də ayrı-ayrı əmək kollektivləri, idarə və müəssisələrdə çalışan kəlbəcərlilər referendumun keçirilməsi ilə bağlı hazırlıq tədbirlərinə fəal qoşuldular.

Rayon təhsil, səhiyyə, mədəniyyət və turizm şöbələrinin, DSMF rayon şöbəsinin, Əhalinin Sosial Müdafiəsi Mərkəzinin kollektivləri, YAP rayon təşkilatının fəalları, ərazi nümayəndəliklərinin işçiləri referendumun yüksək səviyyədə hazırlanıb keçirilməsi üçün təşəbbüsçülərin təkliflərini yekdilliklə müdafiə etmişlər.

Yanvarın 6-da Bakı, Sumqayıt, Mingəçevir, Gəncə şəhərlərində, Abşeron, Yevlax, Bərdə, Tərtər, Goranboy, Göygöl rayonlarında 600 nəfər təşəbbüsçü ilkin iclas keçirərək referendum üzrə Kəlbəcər təşəbbüs qrupunda təmsil olunmaq üçün 60 nəfərdən ibarət nümayəndə seçmişlər. Seçilmiş nümayəndələrin tərkibində gənclər, qadınlar, ziyalılar, müəllimlər, həkimlər, mədəniyyət işçiləri və digər kateqoriyadan olan şəxslər geniş təmsil olunmuşlar. Eyni zamanda, Gəncə şəhərində yerləşən Kəlbəcər Rayon İcra Hakimiyyətində referenduma hazırlıqla əlaqədar olaraq rayon fəalları, ərazi nümayəndəliklərinin və digər təşkilatların nümayəndələrinin iştirakı ilə seminar-müşavirə keçirilmiş, seçici siyahılarının dəqiqləşdirilməsi, seçki məntəqələrinin qaydaya salınması üçün seçki komissiyasının və təşəbbüs qrupu üzvlərinə müvafiq tapşırıqlar verilmişdir.

Azərbaycan.-2009.-10 yanvar.-S.3.