Jurnalistlər "Azad söz" təşəbbüs qrupunda birləşdilər

Azərbaycan Respublikası Konstitusiyasına əlavə və dəyişikliklərlə əlaqədar 2009-cu il martın 18-nə müəyyənləşdirilən ümumxalq səsverməsi - referendumla əlaqədar jurnalistlərin təşəbbüs qrupunun yaradılması ilə bağlı dünən "Space" telekanalında toplantı keçirildi. Məlumat üçün bildirək ki, respublikanın ayrı-ayrı kütləvi informasiya vasitələrində çalışan 2000 jurnalist birləşərək təşəbbüs qrupunun yaradılması ilə bağlı nümayəndələr seçiblər. Yanvar ayının 5-8-i arasında 12 ilkin təşəbbüs qrupunun iclası keçirilib, həmin qruplara 10 nəfərə 1 nəfər rəhbər olmaqla namizəd irəli sürülüb.

Toplantıya sədrlik edən "Azərbaycan" qəzetinin baş redaktoru, Milli Məclisin deputatı Bəxtiyar Sadıqov bildirdi ki, toplantının gündəliyində 4 məsələ - martın 18-də keçiriləcək referendum üzrə təşviqat qrupunun yaradılması məqsədilə referendum təşəbbüs qrupunun formalaşdırılması və adlandırılması, təşəbbüs qrupunun səlahiyyətli nümayəndələrinin təyin edilməsi, bu qrupun səlahiyyətli nümayəndələrinə təşəbbüs qrupu adından notariat qaydasında təsdiq edilmiş vəkalətnaməni imzalamaq hüququnun verilməsi, qrupun yaradılması barədə bildirişlə Mərkəzi Seçki Komissiyasına müraciət edilməsi məsələləri daxil edilib.

Bəxtiyar Sadıqov bildirdi ki, Konstitusiya ictimai münasibətləri tənzimləyən qanunların və normativ-hüquqi aktların əsas hüquqi istinad nöqtəsidir. Əsas Qanunun qüvvəyə mindiyi 1995-ci ildən ötən 14 il müddətində cəmiyyətin həyatında fundamental dəyişikliklərin baş verməsi - sosial-iqtisadi sahədə həlledici uğurların əldə olunması, demokratikləşmə, insan hüquq və azadlıqlarının təminatı istiqamətində prinsipial tədbirlərin görülməsi, iqtisadi və siyasi islahatların paralel şəkildə gerçəkləşdirilməsi Konstitusiyaya zamanın tələbi ilə səsləşən bir sıra əlavə və dəyişikliklərin edilməsini zərurətə çevirib. Milli Məclisin deputatı vurğuladı ki, "Azərbaycan Respublikası Konstitusiyasına əlavə və dəyişikliklər edilməsi haqqında" Referendum Aktının ictimai müzakirəyə çıxarılması obyektiv reallıqdan irəli gəlib, təklif olunan mütərəqqi dəyişikliklər Milli Məclis tərəfindən dəstəklənib. Konstitusiya Məhkəməsinin rəyi, Milli Məclisin qərarı ilə ümumxalq referendumuna çıxarılan bu əlavə və dəyişikliklər mahiyyətcə Əsas Qanunun da təkmilləşdirilməsinə, insan və vətəndaş hüquq-azadlıqları ilə bağlı prinsipial əhəmiyyətli məsələlərin sənəddə daha dolğun ifadəsini tapmasına xidmət etməklə yanaşı, liberallığı, demokratik səciyyə daşıması ilə seçilir.

"Azərbaycan" qəzetinin baş redaktoru qeyd etdi ki, Konstitusiyaya təklif olunan əlavə və dəyişikliklərin mühüm bir qismi Azərbaycan dövlətinin insan və şəxsiyyət amilini yüksək tutaraq yeritdiyi sosialyönümlü siyasət strategiyasının daha dolğun, hərtərəfli ifadəsinə, vətəndaşların bu sahədə hüquq və səlahiyyətlərinin genişləndirilməsinə xidmət edir. Onun sözlərinə görə, təklif olunan 29 əlavə və dəyişikliklərin böyük qismi məhz insan hüquq və azadlıqlarının daha yüksək səviyyədə təminatı ilə bağlı olduğundan, cəmiyyətdən də ciddi dəstək alır. Bəxtiyar Sadıqov son günlər respublikanın paytaxtında və bölgələrində referendumla əlaqədar çoxsaylı təşəbbüs qruplarının yaradılmasını da məhz bu dəstəyin bariz təcəssümü kimi dəyərləndirdi.

Jurnalistlərin hər zaman ölkədə cərəyan edən ictimai-siyasi proseslərin önündə getdiyini deyən Bəxtiyar Sadıqov referendumla əlaqədar onların da üzərinə mühüm vəzifələrin düşdüyünü vurğuladı. "Azərbaycan" qəzetinin baş redaktoru bildirdi ki, referenduma çıxarılan əlavə və dəyişikliklərin əsil mahiyyətinin xalqa hərtərəfli, dolğun şəkildə çatdırılması, bu sahədə obyektiv ictimai fikrin formalaşması baxımından jurnalistlərin üzərinə mühüm vəzifələr düşür. Onun sözlərinə görə, xalqın dəstəyindən tamamilə məhrum olmuş bəzi müxalifət partiyaları və onların nəzarətində olan qəzetlər referenduma çıxarılmış mütərəqqi əlavə və dəyişikliklərin mahiyyətini təhrif etməyə, əhalini çaşdırmağa çalışırlar. "Bəzi müxalifət qrupları Konstitusiyada əlavə və dəyişiklikləri normal qarşılamırlar. Mən hesab edirəm ki, onlar bu dəyişikliklərin mahiyyətini cəmiyyətə düzgün təqdim etmirlər. Bununla da, cəmiyyətdə çaşqınlıq yaradırlar" - deyən Bəxtiyar Sadıqov sözügedən əlavə və dəyişikliklərin KİV vasitəsi ilə cəmiyyətə düzgün çatdırılmasının vacibliyini diqqətə çəkdi. O, referendum ərəfəsində jurnalistlərin təşəbbüs qrupunun yaradılmasını da bu baxımdan xüsusi əhəmiyyətə malik olduğunu qeyd etdi.

Tədbirdə çıxış edən "525-ci qəzet"in baş redaktoru Rəşad Məcid, "Səs" qəzetinin baş redaktoru Bəhruz Quliyev, "Yeni Azərbaycan" qəzetinin baş redaktoru Hikmət Məmmədov Konstitusiyaya təklif edilən əlavə və dəyişikliklərin sosial tələbatdan irəli gəldiyini, cəmiyyətin inkişaf tempinə adekvat olduğunu vurğuladılar. Qeyd olundu ki, Konstitusiyaya təklif olunan əlavə və dəyişikliklər respublikamızda insan hüquq və azadlıqlarının daha etibarlı təminatına yönəlib.

Müzakirələrdən sonra toplantının gündəliyinə daxil olunan məsələlər ayrı-ayrılıqda səsə qoyularaq qəbul edildi. Təşəbbüs qrupunun "Azad söz" adlandırılması ilə bağlı təklif yekdilliklə qəbul olundu. Səsvermə yolu ilə 21 nəfərlik qrupun tərkibi də təsdiqləndi. "Səs" qəzetinin baş redaktoru Bəhruz Quliyev maliyyə məsələləri üzrə, "İki sahil" qəzetinin baş redaktoru Vüqar Rəhimzadə vəkalətlərin imzalanması üzrə səlahiyyətli nümayəndə seçildilər.

Toplantının sonunda bildirildi ki, yaxın günlərdə "Azad söz" təşəbbüs qrupu qeydiyyatdan keçmək üçün Mərkəzi Seçki Komissiyasına rəsmi müraciət edəcəkdir.

S.ELMANOĞLU

Azərbaycan.-2009.-11 yanvar.-S.4.