"Tərəqqi" referendumla bağlı təbliğatda fəal iştirak edəcəkdir

Azərbaycan Respublikası Milli Məclisinin 26 dekabr 2008-ci il tarixli qərarına əsasən, "Azərbaycan Respublikasının Konstitusiyasına əlavə və dəyişikliklər edilməsi üçün 2009-cu il martın 18-nə təyin edilmiş ümumxalq səsverməsi"nin (referendumun) keçirilməsi ilə əlaqədar təşəbbüs qrupunu yaratmaq məqsədilə Binəqədi rayonunun Biləcəri qəsəbəsində 150-dən çox ziyalının, gəncin, ağsaqqalın və digər ictimaiyyət nümayəndələrinin iştirakı ilə təşəbbüs qrupunun ilkin iclası keçirilmişdir.

Toplantıda "Tərəqqi" ilkin təşviqat qrupu yaradılmış və bu təşəbbüsə qoşulmaq üçün digər qəsəbələrin sakinlərinə müraciət qəbul olunmuşdur. Ötən müddət ərzində respublikanın bir sıra şəhər və kəndlərində, qəsəbələrdə də ilkin təşəbbüs qrupunun toplantıları keçirilmiş, referendum üzrə təşəbbüs qrupunun yığıncağına nümayəndələr seçilmişdir.

Dünən isə müxtəlif təşəbbüs qruplarının referendum üzrə birgə təşəbbüs qrupunun yaradılması ilə bağlı toplantısı keçirildi. Tədbiri giriş sözü ilə açan Qəsəbə Bələdiyyələri Assosiasiyasının sədri İlham Xəlilov bildirdi ki, Konstitusiyanın 29 maddəsinə təklif edilən əlavə və dəyişikliklər cəmiyyət tərəfindən irəli sürülən təşəbbüslər əsasında formalaşıb. Bu təkliflər son illər respublikamızda demokraktik proseslərin və vətəndaş cəmiyyətinin inkişafında əldə edilən nailiyyətlərlə əlaqədardır. İlham Xəlilov əlavə etdi ki, təşəbbüs qrupunun əsas vəzifəsi həmin əlavə və dəyişikliklərin aydın şəkildə seçicilərə çatdrılmasından və bununla əlaqədar geniş izahat işlərinin aparılmasından ibarətdir: "Təşəbbüs qrupu maarifləndirmə və təbliğat işlərinin aparılmasında da vacib rol oynayacaqdır".

Milli Məclisin deputatı Rafael Cəbrayılov bildirdi ki, zaman keçdikcə qanunun inkişaf edən, tərəqqi edən cəmiyyətlə uyğunlaşdırılması normal hal kimi qəbul edilir. Buna görə də zaman-zaman qanunlara əlavə və dəyişikliklər edilir. Azərbaycan Respublikasının Konstitusiyasına da zamanın tələbinə uyğun əlavə və dəyişikliklərin edilməsi zərurəti yaranıb. R.Cəbrayılov qeyd etdi ki, 1995-ci ilin 12 noyabrında Konstitusiyanın qəbulundan sonra Azərbaycan böyük inkişaf yolu keçib.

Milli Məclisin deputatı bildirdi ki, Konstitusiyaya nəzərdə tutulan əlavə və dəyişikliklər Əsas Qanunun təkmilləşməsi və cəmiyyətin demokratikləşməsi istiqamətində olan yeniliklərdir: "Qanunun demokratikləşməsi, təkmilləşdirilməsi dedikdə, orada insan hüquq və azadlıqlarının genişləndirilməsindən söhbət gedir. Belə bir şəraitdə dövlətin üzərinə həmin hüquq və azadlıqların təminatı vəzifəsi qoyulur". Rafael Cəbrayılov qeyd etdi ki hazırda irəli sürülən təkliflər sırasında Konstitusiyada olmayan belə bir müddəa var ki, respublikamızın hüdudlarından kənarda yaşayan vətəndaşlar Azərbaycan dövlətinin himayəsindən və köməyindən istifadə etmək hüququna malikdirlər.

Milli Məclsin deputatı əlavə və dəyişikliklərin bir qisminin Konstitusiya üçün yeni olduğunu qeyd etdi: "Uşaq hüquqları ilə bağlı Əsas Qanunda müddəa yox idi. Düşünürəm ki, insan hüquqlarının bütün dünya ölkələrində aktual olduğu bir dövrdə Konstitusiyada uşaq hüquqları ilə bağlı müddəanın olmaması normal hal deyil". Rafael Cəbrayılov Azərbaycan Prezidenti vəzifəsinə bir şəxsin iki dəfədən artıq seçilməsinə qoyulan məhdudiyyətin aradan qaldırılması zəruriliyinə toxunaraq bildirdi ki, Əsas Qanunun birinci maddəsinə görə hakimiyyətin mənbəyi Azərbaycan xalqıdır: "Lakin xalq istədiyi şəxsi iki dəfədən artıq seçə bilmir. Əgər vətəndaşlar dəstəklədikləri şəxsi iki dəfədən artıq Prezident seçmək istəyirsə, bu hüquq niyə onlara verilməsin? Əgər insanlar etimad göstərdikləri şəxsi iki dəfədən artıq seçə bilmirlərsə onda, istəmədikləri namizədlərin arasından kimi isə dəstəkləmək məcburiyyəti ilə üzləşirlər. Bu isə demokratik prinsiplərə uyğun deyil". Milli Məclisin deputatı təklif etdi ki, referendum üzrə təşəbbüs qrupu "Tərəqqi" adlandırılsın.

Tədbirdə çıxış edən Binəqədi qəsəbəsinin sakini Hacı Elman Salmanov Konstitusiyaya təklif edilən əlavə və dəyişikliklərin vətəndaşlar tərəfindən dəstəklənildiyni söyləyərək bunun Əsas Qanunun təkmilləşdirilməsi istiqamətində mühüm addım olduğunu söylədi. M.Ə. Rəsulzadə qəsəbəsinin sakini Hümbət Hüseynov əlavə etdi ki, ötən müddətdə respublikamız sürətlə inkişaf etdiyindən Əsas Qanuna bir sıra əlavə və dəyişikliklərin edilməsi ictimai zərurətə çevrilib.

Toplantı iştirakçıları referendum üzrə təşəbbüs qrupunun "Tərəqqi" adlandırılmasını qərara aldılar və qarşıdakı dövrdə fəaliyyətin əsas istiqamətlərini müəyyənləşdirdilər.

Anar RASİMOĞLU

Azərbaycan.-2009.-11 yanvar.-S.4.