Tehranda İqtisadi Əməkdaşlıq Təşkilatı Regional Planlaşdırma Şurasının iclası işə başlamışdır

Yanvarın 12-də Tehranda İqtisadi Əməkdaşlıq Təşkilatının (İƏT) Regional Planlaşdırma Şurasının 19-cu iclası işə başlamışdır.

İclasda ölkəmizi Azərbaycanın İrandakı səfiri Abbasəli Həsənovun rəhbərliyi ilə geniş tərkibli nümayəndə heyəti təmsil edir.

Bu beynəlxalq tədbirin əvvəlində iştirakçıları salamlayan İranın xarici işlər naziri Manuçehr Mottəki iclasın səmərəli olacağına, üzv ölkələrin əməkdaşlıq əlaqələrinin genişləndirilməsi üçün faydalı qərarlar qəbul ediləcəyinə əminliyini bildirmişdir.

İclasda İƏT-in baş katibi Xurşid Ənvərin təşkilatın fəaliyyəti ilə bağlı hesabat məruzəsi dinlənilmişdir. Məruzədə görülən işlər barədə məlumat verilmiş, gələcək fəaliyyətin istiqamətlərinə dair təkliflər səslənmişdir.

İclasda çıxış edən səfir Abbasəli Həsənov son illər Azərbaycanda həyata keçirilən iqtisadi islahatların uğurlu nəticələri barədə geniş məlumat vermişdir. Təməli ümummilli lider Heydər Əliyev tərəfindən qoyulan transmilli iqtisadi layihələrin uğurlu göstəricilərinin örnək olduğunu diqqətə çatdıran səfir, İƏT-nin Azərbaycanın bu təcrübəsindən faydalana biləcəyini vurğulamışdır.

İclas işini yanvarın 15-dək müxtəlif bölmələrdə davam etdirəcəkdir.

Sabir ŞAHTAXTI,

AzərTAc-ın xüsusi müxbiri

Tehran

Azərbaycan.-2009.-13 yanvar.-S.4.