Azərbaycan və Estoniya prezidentlərinin geniş tərkibdə görüşü

Azərbaycan dövlətinin başçısı İLHAM ƏLİYEV görüş iştirakçılarına müraciətlə dedi:

- Cənab Prezident!

Əziz qonaqlar!

Sizi bir daha Azərbaycanda salamlayıram və ölkəmizdə xoş vaxt keçirməyinizi arzulayıram.

Biz indicə hər iki tərəf üçün maraq doğuran məsələləri - ikitərəfli və regional inkişafla bağlı məsələləri geniş müzakirə etdik. Bütün bu məsələlər bir-biri ilə bağlıdır və əlbəttə ki, Sizin bizim ölkəyə səfərinizin əhəmiyyətini vurğulamaq istərdim. Estoniya Prezidentinin Azərbaycana ilk rəsmi səfəri ikitərəfli əlaqələrin inkişafını nəzərdən keçirmək üçün çox gözəl imkandır. Ölkələrimiz arasındakı siyasi əlaqələr çox yaxşıdır və əminəm ki, bu səfər əlaqələrimizi daha da möhkəmləndirəcəkdir. Tərəfdaşlığın praktik tərəflərinə diqqət daha da artırılmalıdır.

Biz bu gün iqtisadi əlaqələrin perspektivlərini müzakirə etdik və hər iki ölkədən olan iş adamlarının bunları daha geniş müzakirə etməyə imkanları olacaqdır. Əlbəttə ki, regional inkişaf, regionda vəziyyət və təhlükəsizlik, enerji məsələləri, - bunlar hamısı bir-biri ilə əlaqəlidir. Avropa İttifaqı ilə Azərbaycan arasında əlaqələr, bu əlaqələrin daha da inkişaf etdirilməsi bizim üçün çox mühümdür. Avropa İttifaqı ilə əlaqələrin inkişafını nəzərdə tutan təşəbbüslərimizi və fəaliyyətimizi dəstəklədiyi üçün biz Estoniyaya minnətdarıq.

Ümidvarıq ki, bu, belə də davam edəcəkdir. Əminəm ki, bu səfər hər bir cəhətdən uğurlu olacaqdır.

Bir daha xoş gəlmisiniz.

Estoniya Prezidenti TOOMAS HENDRİK İLVES səmimi qəbul üçün təşəkkür edərək dedi:

- Çox sağ olun, cənab Prezident!

Yenidən Sizin ölkəyə səfər etdiyimə görə çox şadam. Ona görə yenidən deyirəm ki, mən təxminən on il öncə Azərbaycana ölkəmizin xarici işlər naziri kimi səfər etmişdim.

Əvvəlcə, icazə verin, Sizi bu müddət ərzində Azərbaycanda gedən müsbət dəyişikliklərə görə təbrik edim. Mən aeroportu, Bakını tanımadım, Qız qalasından başqa heç yeri tanımadım. Hər şey tamamilə dəyişibdir. Biz də bu mərhələni keçmişik. Bir tərəfdən, hər şey fərqli görünür, digər tərəfdən, bu hisslər bizə tanışdır. Mən bir daha deyirəm ki, burada olmağıma çox şadam.

AzərTAc

Azərbaycan.-2009.-14 yanvar.-S.1-2.