Estoniya Prezidenti Azərbaycanın sənaye və energetika naziri ilə görüşmüşdür

Estoniya Prezidenti Toomas Hendrik İlves Azərbaycanın sənaye və energetika naziri Natiq Əliyevlə görüşmüşdür.

Estoniyanın Azərbaycanla iqtisadi, xüsusən energetika və informasiya-kommunikasiya texnologiyaları sahəsində əməkdaşlıqda maraqlı olduğunu bildirən Prezident Toomas Hendrik İlves ölkəsinin Avropanın enerji təhlükəsizliyi ilə bağlı məsələlərə önəm verdiyini vurğuladı. Son iki həftə ərzində baş vermiş hadisələrin Nabukko layihəsini daha da aktuallaşdırdığını deyən Estoniya dövlətinin başçısı, Avropanın enerji tələbatlarının təmin edilməsində Azərbaycanın mühüm rola malik olduğunu söylədi. Estoniyanın Avropa İttifaqında Azərbaycanın fəal dostu və tərəfdaşı olduğunu vurğulayan Prezident Toomas Hendrik İlves Avropanın enerji təchizatının şaxələndirilməsinin vacibliyini bildirərək dedi ki, bu məsələdə biz Azərbaycanı mühüm iştirakçılardan biri hesab edirik.

Natiq Əliyev ali qonağa ölkəmizin enerji potensialı, Xəzər dənizinin Azərbaycan sektorunda karbohidrogen ehtiyatlarının hasilatı və ixracı ilə bağlı həyata keçirilən layihələr barədə ətraflı məlumat verdi. Azərbaycanla Estoniya arasında ikitərəfli əlaqələrin uğurla inkişaf etdiyini deyən nazir ölkəmizin təbii enerji ehtiyatlarını dünya bazarlarına çıxarmaqda, Avropa ölkələrinin isə Azərbaycan qazını almaqda maraqlı olduğunu söylədi.

Görüşdə Avropanı təbii qazla təmin edəcək Nabukko layihəsinin vacibliyi bildirildi.

AzərTAc

Azərbaycan.-2009.-15 yanvar.-S.4.