Estoniya Azərbaycan ilə hərtərəfli əlaqələrin inkişafında maraqlıdır

Estoniyanın iqtisadiyyat və kommunikasiya naziri Yuhan Parts Prezident Toomas Hendrik İlvesin Azərbaycana rəsmi səfərinin yekunları ilə bağlı keçirdiyi mətbuat konfransında demişdir: "Estoniya Azərbaycan ilə hərtərəfli əlaqələrin inkişafında maraqlıdır".

Ölkələrimiz arasında olan münasibətlərin tarixində Estoniya Prezidentinin Azərbaycana ilk dəfə səfər etdiyini diqqətə çatdıran Y.Parts demişdir ki, bu geniş tərkibli səfərdən əsas məqsəd dövlətlərimiz arasında bütün sahələrdə əlaqələri genişləndirməkdir. Əminliklə bildirirəm ki, buna yüz faizdən də artıq nail olmuşuq. Səfər çərçivəsində siyasi dialoq aparılmış, iqtisadi və ticari əlaqələrinin genişləndirilməsi, investisiya qoyuluşu məsələləri müzakirə edilmişdir. Deməliyəm ki, strateji, uzunmüddətli və digər məsələlərdə hər iki ölkənin maraqları üst-üstə düşür. İqtisadi əməkdaşlığın genişləndirilməsi istiqamətində atılan addımlardan danışan nazir yanvarın 13-də keçirilmiş Azərbaycan-Estoniya biznes forumunun sahibkarlar arasında əlaqələrin yaradılmasında əhəmiyyətini diqqətə çatdırmışdır. Ticarət sahəsində əlaqələrin genişləndirilməsi üçün böyük imkanların olduğu qeyd edilmiş, bu istiqamətdə addımların atılmasının vacibliyi vurğulanmışdır.

Yuhan Parts bildirmişdir ki, hazırda Avropaya qazın nəqli ilə bağlı Rusiya və Ukrayna arasında yaranmış problemlər Nabukko layihəsinin həyata keçirilməsinin vacibliyini daha da aktuallaşdırmışdır. O, Avropanın enerji təhlükəsizliyinin təmin olunmasında Azərbaycanın potensialından istifadə edilməsinin əhəmiyyətindən danışmış, informasiya-kommunikasiya texnologiyaları sahəsində ölkəsinin Azərbaycana yaxından kömək etməyə hazır olduğunu söyləmişdir. Nazir regionda lider dövlət olan Azərbaycanın dinamik inkişafından məmnunluğunu qeyd etmiş, Estoniyanın Azərbaycanla hərtərəfli əlaqələrin inkişafında maraqlı olduğunu vurğulamışdır.

Sonda KİV nümayəndələrinin sualları cavablandırılmışdır.

Tədbirdə Estoniya Prezidenti dəftərxanasının mətbuat katibi Toomas Sildam, Estoniya Sahibkarlar və İşəgötürənlər Federasiyasının sədri Enn Veskimaki və Estoniya-Azərbaycan Ticarət Palatasının sədri xanım Yana Krimpe iştirak etmişlər.

AzərTAc

Azərbaycan.-2009.-15 yanvar.-S.4.