Görkəmli yazıçı Mir Cəlal Paşayevin yaradıcılığından bəhs edən kitabın təqdimatı keçirilmişdir

Azərbaycan Yazıçılar Birliyinin (AYB) "Natəvan" klubunda şair-publisist Mahirə Abdullanın görkəmli Azərbaycan yazıçısı Mir Cəlal Paşayevin yaradıcılığında milli şüur və həmrəylik probleminin, humanizm fəlsəfəsinin, böyük ədibin erməni məsələsinə münasibətinin əks olunduğu "Əbədiyyət. AN" kitabının təqdimat mərasimi keçirilmişdir.

AYB-nin katibi, xalq şairi Fikrət Qoca müəllifin böyük yazıçı, alim, pedaqoq Mir Cəlal Paşayevin "Bir gəncin manifesti", "Dirilən adam" əsərlərinin müasirliyini və aktuallığını nəzərə çatdırmasını, bu əsərləri haqlı olaraq əbədiyyətin yaddaş dərsi adlandırmasını yeni tapıntı kimi qiymətləndirmişdir.

Nahid Hacızadə, Abbas Abdulla, Firuz Mustafa və başqaları Mir Cəlal yaradıcılığında mənəvi dəyərlərin, milli problemlərin ağrısının, sovet senzura sisteminin təzyiqlərinə baxmayaraq, vətəndaş məsuliyyəti ilə əsl kişilik məktəbi yaratmasının incəliklə tərənnüm olunduğunu bildirmişlər.

Sonda müəllif tədbirə toplaşanlara minnətdarlığını bildirmiş, yeni şeirlərini oxumuşdur.

AzərTAc

Azərbaycan.-2009.-16 yanvar.-S.4.