Strasburqda 20 Yanvar faciəsi ilə bağlı fransız dilində radio verilişi səslənmişdir

Strasburqda fəaliyyət göstərən "Azərbaycan evi"nin təşkilatçılığı ilə hər ayın bir bazar günü Azərbaycanla bağlı efirə çıxan ikisaatlıq radio proqramının yanvarın 18-də getmiş verilişi əsasən xalqımızın tarixində qara səhifə olan 20 Yanvar faciəsinə həsr edilmişdir.

Verilişin ərsəyə gəlməsində xüsusi əmək sərf etmiş "Azərbaycan evi"nin sədri Mustafa Alınca, Strasburqdakı Mark Blok Universitetinin tələbəsi Şahin Hüseynli və gənc soydaşımız Alqan Eldənizin faciə ilə əlaqədar hazırladıqları materiallarda XX əsrin görünməmiş qanlı hadisəsi barədə fransız dinləyicilərinə ətraflı məlumat verilmişdir.

Faciəyə dair vaxtilə Azərbaycan və fransız mətbuatında dərc olunmuş məqalələrə əsaslanmış verilişdə 1990-cı ilin yanvarında baş vermiş qanlı hadisəyə iki il əvvəldən, 1988-ci ildən hazırlıq getməsindən, işğalçılıq siyasəti yeridən Ermənistanın Azərbaycanın əzəli ərazisi olan Dağlıq Qarabağı ayırmaq təşəbbüsünə etiraz edən azərbaycanlıların kütləvi nümayişlər keçirməsindən, sovet hakimiyyətinin rəsmilərinin bu nümayişlərə yol verməmək üçün ölkəmizə qoşun yeritmələri və fövqəladə vəziyyət elan etmələrindən söhbət açılmışdır. Bu hadisələrin davamı olaraq iki ildən sonra xalqın müstəqillik və azadlıq istəyini boğmaq məqsədi ilə yanvarın 19-dan 20-nə keçən gecə qırmızı ordunun müxtəlif istiqamətlərdən Bakıya daxil olaraq, silahsız dinc əhaliyə divan tutduqları verilişin əsas xəttini təşkil etmişdir.

Faciə zamanı heç kimə aman verməyən sovet ordusunun 133 nəfərin həyatına son qoyması, 700 sakini yaralaması, xeyli azərbaycanlının itkin düşməsi, ölkənin bütün dünya ilə əlaqələrinin kəsilməsi və informasiya blokadasına alınması verilişdə öz əksini tapmışdır.

Müasir silahlardan istifadə etmiş ordunun amansızlığının təsvirə gəlməzliyi, insanların tanklar altına salınması barədə danışılmış radio proqramında bu faciənin dünya ölkələrinin, o cümlədən fransızların kəskin reaksiyasına səbəb olduğu, belə ağır günlərdə azərbaycanlılarla həmrəyliyi, Fransada yaşayan soydaşlarımızın faciənin dəhşətləri barədə fransızlara ətraflı məlumat verməsi dinləyicilərə çatdırılmışdır.

Verilişi hazırlayanlar yeri gəldikcə faciə ilə bağlı fransız mətbuatında dərc olunmuş materiallardan sitatlar gətirmişlər.

Sonda dövlətimizin şəhidlərin xatirəsini əbədiləşdirmək üçün Bakının ən görkəmli yerində Şəhidlər xiyabanı saldığı, faciənin hər il hüzn günü kimi anıldığı, xiyabanın xalqımızın və Bakıya səfər edən xarici qonaqların ziyarətgahına çevrildiyi də vurğulanmışıdır.

Verilişdə tanınmış türkoloq alim, soydaşımız İren xanım Melikoffun vəfatı barədə məlumat verilmiş, elmi və ictimai-siyasi fəaliyyətindən danışılmışdır.

Yanvarın 18-də səsləndirilmiş verilişdə Azərbaycan haqqında digər xəbərlər də efirə getmişdir.

Xatırladaq ki, "Azərbaycan evi"nin hazırladığı radio proqramı Fransanın bütün ərazisinə və qonşu ölkələrə yayımlanır.

Əsgər ƏLİYEV,

AzərTAc-ın xüsusi müxbiri

Paris

Azərbaycan.-2009.-20 yanvar.-S.7.