Rusiya tərəfi Azərbaycanın Xarici İşlər Nazirliyinin rəsmi notasına cavab notası təqdim etmişdir

Azərbaycanın Xarici İşlər Nazirliyinin mətbuat xidmətindən bildirmişlər ki, yanvarın 22-də nazir Elmar Məmmədyarov Rusiya Federasiyasının Azərbaycandakı səfiri Vasili İstratov ilə görüşmüşdür.

Görüşdə səfir V.İstratov Ermənistanın Gümrü şəhərində yerləşən Rusiyanın hərbi qüvvələrinə məxsus 102 saylı hərbi bazadan Ermənistanın hərbi qüvvələrinə təxminən 800 milyon ABŞ dolları həcmində hərbi silah və sursatın verilməsinə dair mətbuatda yayılmış məlumatla əlaqədar yanvarın 15-də Azərbaycanın Xarici İşlər Nazirliyinin verdiyi rəsmi notaya Rusiya tərəfinin cavab notasını təqdim etmişdir.

Notada bildirilir ki, Rusiya Federasiyasının Müdafiə Nazirliyi tərəfindən 2008-ci ildə Ermənistana Azərbaycan Respublikası ictimaiyyəti arasında, o cümlədən kütləvi informasiya vasitələrində geniş mənfi əks-səda yaratmış 2009-cu ilin yanvarın 8-də "www.mediaforum.az" internet saytında dərc edilmiş naməlum sənəddə göstərilmiş nomenklatura üzrə və məbləğdə silah və hərbi texnika verilməmişdir və satılmamışdır.

Həmçinin notada qeyd edilir ki, Rusiya Federasiyası və Azərbaycan Respublikası onları birləşdirən strateji əməkdaşlığın sıx əlaqələri ruhunda mümkün şübhələri birgə həll edəcəklər.

Rusiya tərəfi ümidvar olduğunu bildirmişdir ki, Azərbaycanın Xarici İşlər Nazirliyi ölkə ictimaiyyətini və kütləvi informasiya vasitələrini Rusiyanın məsələ ilə bağlı mövqeyi barədə məlumatlandıracaqdır.

AzərTAc

Azərbaycan.-2009.-23 yanvar.-S.1.