Referendum üzrə "Yeni Azərbaycan" təşviqat qrupu MSK-da qeydə alınmışdır

Yeni Azərbaycan Partiyasının mətbuat xidmətindən bildirmişlər ki, martın 18-də keçiriləcək ümumxalq səsverməsi ilə əlaqədar 2500-dən çox seçici tərəfindən referendum üzrə "Yeni Azərbaycan" təşəbbüs qrupu yaradılaraq bu barədə Mərkəzi Seçki Komissiyasına yazılı bildiriş təqdim edilmişdir.

Referendum üzrə təşviqat qrupunun qeydə alınması üçün toplanmış seçici imzaları olan imza vərəqələri və onlara əlavə edilməli olan sənədlər yanvarın 14-də təşəbbüs qrupunun səlahiyyətli nümayəndəsi tərəfindən MSK-ya təqdim edilmişdir.

MSK bununla əlaqədar qanunvericiliklə nəzərdə tutulmuş müddətdə və qaydada müvafiq araşdırma aparmış, "Yeni Azərbaycan" təşəbbüs qrupunun eyniadlı təşviqat qrupu kimi qeydə alınması üçün əsasların olmasını müəyyən etmişdir. MSK Konstitusiyanın 100-cü, Seçki Məcəlləsinin 19.4, 19.14, 28.2, 28.4 və 65-68-ci maddələrinə əsasən referendum üzrə "Yeni Azərbaycan" təşəbbüs qrupunu 2009-cu il martın 18-nə təyin edilmiş referendumda eyniadlı təşviqat qrupu kimi qeydə almışdır.

Azərbaycan.-2009.-24 yanvar.-S.5.