Mərkəzi Seçki Komissiyasının iclası keçirilmişdir

Yanvarın 24-də Məzahir Pənahovun sədrliyi ilə Mərkəzi Seçki Komissiyasının (MSK) iclası keçirilmişdir.

Mərkəzi Seçki Komissiyasının mətbuat xidmətindən bildirmişlər ki, iclasda 2009-cu il martın 18-nə təyin edilmiş ümumxalq səsverməsi (referendum) ilə əlaqədar Mərkəzi Seçki Komissiyasına daxil olmuş müraciətlərə baxılmışdır. Komissiya üzvü Ramiz İbrahimov referendum üzrə "Respublikaçılar" təşəbbüs qrupunun səlahiyyətli nümayəndəsi Gülağa Aslanlı tərəfindən MSK-ya ünvanlanmış müraciət barədə məlumat vermişdir. Müraciətdə bu ilin yanvar ayının 19-da yuxarıda göstərilən təşəbbüs qrupunun dəstəklənməsi üçün imza toplayan Oqtay Zeynalovun və Cahangir Əmirxanlının Gəncə Şəhər Nizami Rayon Polis Şöbəsinə çağırılaraq onların imza toplamasına polis rəisi tərəfindən maneçilik törədilməsi iddia edilir, həmin şəxs barəsində qanunla müəyyən edilmiş qaydada tədbirlər görülməsi xahiş olunur. Səlahiyyətli nümayəndənin müraciəti araşdırılmış və müəyyən edilmişdir ki, həmin şəxslərin 2009-cu il yanvarın 19-da Gəncə Şəhər Nizami Rayon Polis Şöbəsinə dəvət edilmələri referendum üzrə təşviqat qrupunun dəstəklənməsi üçün imza toplamaları ilə əlaqədar olmamışdır. Belə ki, onlar Gəncə şəhəri "Xan Bağı" istirahət parkında yerləşən çayxanalarda vətəndaşlar arasında təşviqat apararaq Fələstin-İsrail münaqişəsi ilə bağlı kütləvi tədbirlərin keçirilməsi məqsədi ilə İsrail əleyhinə imza toplamaq çağırışları ilə əlaqədar vətəndaşlardan daxil olmuş şikayət ərizələri əsasında polis şöbəsinə dəvət edilmişlər. Beləliklə, referendum üzrə "Respublikaçılar" təşəbbüs qrupunun səlahiyyətli nümayəndəsi Gülağa Aslanlının müraciətində göstərilən hallar araşdırma ilə öz təsdiqini tapmamışdır. Onun tərəfindən bununla əlaqədar heç bir sübut təqdim edilməmişdir.

Mərkəzi Seçki Komissiyası əsassız olduğundan həmin müraciətin təmin edilməməsi barədə qərar çıxarmışdır.

Sonra MSK üzvü Qabil Orucov referendum üzrə "Respublikaçılar" təşəbbüs qrupunun səlahiyyətli nümayəndəsi Gülağa Aslanlının digər müraciəti barədə məlumat verərək bildirmişdir ki, Cəlilabad rayonunun Təzəkənd kəndi ərazisində həmin təşəbbüs qrupunun üzvlərinin imza toplama prosesi zamanı kənd icra nümayəndəsi Əyyar Quliyev, bələdiyyə sədri Rafiq Hacıyev və polis sahə inspektoru Çingiz Məmmədov tərəfindən imza atmış şəxslərə qarşı təzyiqlər edilməsi iddia olunur və bununla əlaqədar tədbirlər görülməsi xahiş edilir. Araşdırma nəticəsində müəyyən edilmişdir ki, Təzəkənd sakini Şahbaz Qarayev oğlu Bəxtiyar Qarayevə imza vərəqələri verərək vətəndaşlardan imza toplanmasına göstəriş vermişdir. Bəxtiyar Qarayev atasının göstərişi əsasında Təzəkənd kəndinin bir qrup sakinindən atası Şahbaz Qarayevin guya deputat seçilməsi, Üçtəpə icra nümayəndəliyinin tərkibindən Təzəkənd kəndinin ayrılaraq ayrı nümayəndəlik yaradılması, sovet vaxtı əmanətə qoyulmuş pulların çıxarılması, həmçinin Qarabağın azad edilməsindən ötrü imza topladığını bildirmişdir. Sonradan aldadıldıqlarını başa düşən kənd sakinləri öz hüquqlarının pozulmasını iddia edərək, kənd icra nümayəndəsi, kənd bələdiyyəsinin sədri və polis sahə inspektoruna bu barədə məlumat vermişlər. Eyni zamanda imza vermiş həmin vətəndaşlara və müvafiq təşəbbüs qrupunun maraqlarını təmsil edən imza toplayan şəxslərə qarşı hər hansı bir təzyiq edilməmişdir.

Mərkəzi Seçki Komissiyası qərara almışdır ki, referendum üzrə "Respublikaçılar" təşəbbüs qrupunun səlahiyyətli nümayəndəsinin müraciəti əsassız olduğundan təmin edilməsin.

İclasda cari məsələlərə də baxılmışdır.

Mərkəzi Seçki Komissiyasının iclasında Seçki Sistemləri üzrə Beynəlxalq Fondun (ABŞ) təmsilçiləri və kütləvi informasiya vasitələrinin nümayəndələri iştirak etmişlər.

AzərTAc

Azərbaycan.-2009.-25 yanvar.-S.4.