Davos İqtisadi Forumu işini davam etdirir

İsveçrənin kurort şəhərində açılmış 39-cu Dünya İqtisadi Forumu davam edir. Fevralın 1-də başa çatacaq forumda müasir dövrün siyasi-iqtisadi problemləri, qlobal inkişafın əsas problemlərinin müzakirəsi və həlli üçün işgüzar tərəfdaşlığın genişlənməsinə yardım məsələləri diqqət mərkəzindədir.

Yanvarın 29-da Davosda Forumun "Enerji Outlook-2009" mövzusunda iclası keçirilmişdir. Böyük əhəmiyyətə malik bu iclasda Azərbaycan Prezidenti İlham Əliyev iştirak etmişdir.

Ümumiyyətlə, ekspertlər Davos Forumunun dünya iqtisadiyyatı üçün mühüm rol oynayacağını, hazırda bütün dünyanı bürüyən qlobal maliyyə böhranından çıxış yollarının axtarılması baxımından faydalı olacağını bildirmişlər. Builki forumda 100-dək ölkədən 2500-dən çox nümayəndə, o cümlədən 41 dövlət və hökumət başçısı, tanınmış şirkətlərin təmsilçiləri, iqtisadçılar, ekspertlər, beynəlxalq təşkilatların, KİV-lərin rəhbərləri iştirak edir. Bir sözlə, Davosda keçirilən indiki forum bütün tarixi ərzində ən çox nümayəndənin iştirak etdiyi görüş hesab olunur. Beş gün ərzində 300-dək iclasın keçirilməsi nəzərdə tutulmuşdur.

İclaslar əsasən "Böhran cəmiyyəti və liderlik", "Ətraf mühitə nəzarət", "Maliyyə idarəçiliyinin yeni sərhədləri", "Bütün qiymətlərin, böhranların qarşısının alınması", "Neft və qaz siyasəti - xəritə dəyişikliyi" və "Böyük oyun təkrarlanır" bölmələri üzrə təşkil olunur.

Dünya iqtisadi və maliyyə böhranının aradan qaldırılması, iqlim dəyişikliyi problemlərinin nəzərdən keçirildiyi forum çərçivəsində ətraf mühitin mühafizəsinə dair beynəlxalq paktın əsas müddəalarını hazırlayan nazirlərin görüşü də olacaqdır. Bu sahədə sənədin cari ilin sonunda imzalanması nəzərdə tutulur.

Çıxışlarda bildirilmişdir ki, ən optimal varianta görə, maliyyə böhranı 2010-cu ilin sonu - 2011-ci ilin əvvəlində başa çatacaq ki, bu da onun 2009-cu ildə dünya ölkələrinin iqtisadiyyatına təsir imkanlarını gücləndirir.

Xatırladaq ki, dünyada böhranlı vəziyyətə baxmayaraq, Azərbaycan iqtisadiyyatını inkişaf etdirir. Ümumi daxili məhsulun artım sürətinə görə ölkəmiz lider mövqeyini saxlayır. 2003-cü illə müqayisədə 2008-ci ildə dünya iqtisadiyyatının artımı 25,4 faiz, o cümlədən ABŞ-da 13,3 faiz, Avropa İttifaqı ölkələrində 13,7 faiz, MDB ölkələrində 45,4 faiz, Çində 66,5 faiz təşkil edibsə, son beş ildə Azərbaycan iqtisadiyyatı 2,6 dəfə artmışdır. Ölkəmizin neft sektoru 4,1 dəfə, qeyri-neft sektoru isə 1,8 dəfə artmışdır.

Forumun əsas tədbirlərindən olan "Enerji Outlook-2009" iclasını açan "CNN-İnternational" televiziya kanalının aparıcısı Con Defterios Prezident İlham Əliyevə və digər qonaqlara minnətdarlıq etmişdir.

Azərbaycan Prezidenti İlham Əliyev çıxışında ölkəmizin iqtisadi inkişafı və potensialından, aparılan islahatlardan və energetika sahəsində görülən işlərdən danışmışdır.

Dövlətimizin başçısı enerji layihələrindən də söhbət açaraq demişdir ki, Azərbaycan aparılmış düzgün siyasət nəticəsində və tərəfdaşların birgə səyi ilə beynəlxalq əhəmiyyətli layihələr həyata keçirmişdir. Azərbaycanın bu sahədəki təcrübəsi digər ölkələr üçün nümunə ola bilər.

Prezident İlham Əliyev Avropanın gündəliyində olan Nabukko layihəsi ilə bağlı fikirlərini də açıqlamış, ölkəmizin Avropanın enerji təhlükəsizliyinə öz töhfəsini verdiyini bildirmişdir.

Sonra dövlətimizin başçısı aparıcının və iştirakçıların suallarına cavab vermişdir.

AzərTAc

Azərbaycan.-2009.-30 yanvar.-S.1.