Prezident İlham Əliyev "Neft-qaz siyasəti - xəritə dəyişikliyi" mövzusunda iclasda iştirak etmişdir

Azərbaycan Prezidenti İlham Əliyev yanvarın 29-da"Morasani Şveizerhov" mehmanxanasında Davos forumunun "Neft-qaz siyasəti- xəritə dəyişikliyi" mövzusunda xüsusi iclasında da iştirak etmişdir.

Qazaxıstan Prezidenti Nursultan Nazarbayevin, Avropa İttifaqının və dünyanın aparıcı ENİ, "Total", "Ekson/Mobil", "Statoil-Hydro" şirkətlərinin nümayəndələrinin iştirak etdiyi iclasda neft hasilatının tənzimlənməsi, neft-qaz şirkətlərinin Rusiya və Yaxın Şərqdə artan maraqları, OPEK və qaz üçlüyünün maraqları, yaxın gələcəkdə enerji sahəsində nə kimi dəyişikliklərin baş verə biləcəyi məsələləri diqqət mərkəzində olmuşdur.

İclasda təbii qaz təchizatının təhlükəsizliyinin təmin olunması, bu sahəyə sərmayə qoyuluşunun perspektivləri, özəl beynəlxalq şirkətlərin dövlət şirkətləri ilə münasibətlərində yeni formaların tapılması məsələləri də müzakirə edilmişdir.

Bu iclasda çıxış edən ABŞ-ın, Belçikanın, Almaniyanın, Böyük Britaniyanın, Fransanın, Norveçin, İtaliyanın, Avstriyanın, Meksikanın, Cənubi Afrika Respublikasının nümayəndələri, əsasən,neft və qaz ölkəsi kimi tanınan dövlətlərdə iqtisadi inkişafdan, eləcə də qlobal maliyyə böhranının yaratdığı çətinliklərdən söhbət açmışlar.

Çıxışlarda enerji sahəsində əməkdaşlıqda Azərbaycanın tutduğu mövqe yüksək dəyərləndirilmiş, ölkəmizin neft və qaz marşrutlarının çoxşaxəliliyinə tərəfdar olması və Avropanın enerji təhlükəsizliyində və yeni layihələrin meydana gəlməsində rolu və əhəmiyyəti xüsusi vurğulanmışdır.

Qazaxıstan Prezidenti Nursultan Nazarbayev də iclasda çıxış etmişdir. Diskussiya xarakterli bu görüşdə gələcəkdə Mərkəzi Asiya ölkələrinin, o cümlədən Qazaxıstanın karbohidrogen ehtiyatlarının Xəzər dənizi vasitəsilə də Qərbə çatdırılmasının böyük önəm daşıdığı bildirilmişdir.

Azərbaycan Prezidenti İlham Əliyev çıxışında müzakirə olunan məsələlərə münasibətini bildirmiş, beynəlxalq enerji əməkdaşlığının əhəmiyyətindən, Azərbaycanın enerji sahəsində qazandığı nailiyyətlərdən və dünyada artan rolundan danışmışdır.

Azərbaycan iqtisadiyyatının hazırkı artımı və ölkənin qlobal iqtisadiyyata, inkişafda olan dövlətlərin bazarlarına fəal inteqrasiyası nəzərə alınmaqla, belə mühüm tədbirdə iştirak regionda lider rolunu oynayan Azərbaycana fayda gətirəcəkdir.

AzərTAc

Azərbaycan.-2009.-30 yanvar.-S.1.