Davosda Azərbaycan üzrə qarşılıqlı
biznes əlaqələri
qrupunun forumu keçirilmişdir
Yanvarın 30-da "Konqress" mərkəzində Azərbaycan üzrə qarşılıqlı biznes əlaqələri qrupunun forumu keçirilmişdir.
Azərbaycan Prezidenti İlham Əliyev forumda iştirak etmişdir.
Beynəlxalq işgüzar dairələrin iştirak etdiyi forumu Dünya İqtisadi Forumunun Avropa və Mərkəzi Asiya ölkələri üzrə direktoru Stefan Kinnok açaraq Azərbaycan Prezidenti İlham Əliyevin bu tədbirdə iştirak etməsindən məmnunluğunu bildirdi və bu cür görüşlərin burada iştirak edən işgüzar dairələr üçün faydalı olacağını dedi.
Dövlətimizin başçısı tədbirdə çıxış edərək, ölkəmizin son illərdəki nailiyyətlərini vurğuladı, iqtisadiyyatın dinamik inkişaf etdiyini, uğurlu iqtisadi islahatların həyata keçirildiyini, bazar iqtisadiyyatına üstünlük verən və əlverişli coğrafi vəziyyəti olan Azərbaycanın enerji sektorunda əhəmiyyətli işlər gördüyünü, neft və qaz ehtiyatlarını Avropa bazarlarına nəql etdiyini söylədi. Prezident İlham Əliyev Azərbaycanda sərmayədarlar üçün yaxşı şərait yaradıldığını, sahibkarlığın inkişaf etdiyini xatırlatdı və bildirdi ki, indi ölkəmiz xaricdə investisiya layihələrində də iştirak edir. Azərbaycanın iqtisadi siyasətinin xalqın rifahının yüksəldilməsinə yönəldiyini vurğulayan dövlətimizin başçısı ölkəmizin ixrac potensialının da yüksək olduğunu dedi.
Sonra Prezident İlham Əliyev iştirakçıların beynəlxalq enerji layihələri, Mərkəzi Asiya ölkələrinin təbii sərvətlərinin Xəzər dənizi vasitəsilə dünya bazarlarına çıxarılması perspektivləri və digər məsələlər barədə suallarına cavab verərək regional əməkdaşlığa, təhlükəsizliyə mane olan səbəblərdən, xüsusən də Ermənistanın Azərbaycana təcavüzündən, bu təcavüz nəticəsində ölkəmizin ərazisinin 20 faizinin işğal edilməsindən danışdı, BMT-nin və digər beynəlxalq təşkilatların qərarlarına məhəl qoymayan Ermənistanın təcavüzkar siyasətdən əl çəkmədiyini bildirdi.
Tədbir başa çatdıqdan sonra işgüzar dairələrin nümayəndələri Prezident İlham Əliyevə yaxınlaşaraq, Azərbaycanla əməkdaşlığa, yeni layihələrdə iştiraka və ölkəmizə sərmayə qoymaqda maraqlı olduqlarını bildirdilər, informasiya texnologiyaları və bank sektoru ilə maraqlandılar.
AzərTAc
Azərbaycan.-2009.-31 yanvar.-S.2.