Azərbaycanın regionun ən güclü ordusuna malik olması bir daha təsdiqləndi

Hazırda Cənubi Qafqazın ən güclü ordusuna malik Azərbaycanın hərbi qüdrətinin gündən-günə artması, işğalçı Ermənistanla müqayisədə ordunun maddi texniki təminatında və digər göstəricilərində dəfələrlə böyük üstünlüyə malik olması bu sahədə araşdırma aparan beynəlxalq təşkilatlar tərəfindən etiraf edilməkdədir. Həmin təşkilatlar onu da bildirir ki, növbəti illər ərzində Azərbaycan və Ermənistan silahlı qüvvələri arasındakı fərq birincinin lehinə daha çox dəyişəcək. Bununla belə real şəraitdə də Azərbaycanla Ermənistan arasında ordu göstəricilərinə görə fərq kifayət qədər böyükdür.

Londonda yerləşən Beynəlxalq Strateji Araşdırmalar İnstitutunun dünya ölkələrinin hərbi potensialını qiymətləndirən illik hesabatından da bunu aydın görmək mümkündür. 70 ölkəni əhatə edən hesabatda Azərbaycan və Ermənistan orduları haqda məlumatlar da yer alıb.

Hesabatdan bir daha aydın olur ki, bütün parametrlər baxımından Ermənistan ordusu Azərbaycan Silahlı Qüvvələrilə müqayisədə çox geridə qalır. Beynəlxalq Strateji Araşdırmalar İnstitutunun açıqladığı rəqəmlərə görə, Azərbaycan ordusunda şəxsi heyətin sayı Ermənistan ordusundakı şəxsi heyətin sayından 35 faiz çoxdur. Ehtiyat qüvvələrinin sayına görə isə Ermənistan Azərbaycandan 50 faiz geridə qalır.

Silahlı Qüvvələrin maddi texniki təminatı baxımından da Ermənistan Azərbaycandan xeyli geridə qalır. Bu istər Hərbi Hava Qüvvələri, istərsə də quru qoşunlarının istifadə etdiyi texnikaya aiddir. Məsələn, hesabatda yer alan məlumatlardan belə məlum olur ki, Azərbaycan ordusunun ixtiyarında olan döyüş qabiliyyətli tanklar Ermənistandakından 3 dəfə çoxdur. Analoji fərqlər zirehli transportyorların sayında da özünü göstərir. Beynəlxalq Strateji Araşdırmalar İnstitutu bildirir ki, Azərbaycan ordusunun ixtiyarında olan döyüş qabiliyyətli zirehli transportyorlar Ermənistandakından 3 dəfə artıqdır.

Piyadaların Döyüş Maşını (PDM) ilə bağlı göstəricilər də Azərbaycanın lehinə dəyişir. Hesabata görə, hazırda Azərbaycan ordusunda olan PDM-lərin sayı Ermənistandan 5 dəfə çoxdur.

Beynəlxalq Strateji Araşdırmalar İnstitutu bəyan edir ki, Azərbaycanda döyüş qabiliyyətli təyyarələrin sayı da Ermənistanın malik olduğu belə təyyarələrin sayından 3 dəfə çoxdur. Hər iki tərəfdə əsasən Miq-25, Su-24 və Su-25 təyyarələrinin olduğu bildirilsə də, Ermənistandan fərqli olaraq Azərbaycan ordusunun ixtiyarında daha müasir tipli təyyarələr də mövcuddur. Belə təyyarələrə misal olaraq Miq-29 qırıcıları göstərilir. Bundan başqa, hesabatda bildirilir ki, Azərbaycanın "Aerostar" və "Orbiter" tipli 6 müasir pilotsuz uçuş aparatı olduğu halda, Ermənistanda belə pilotsuz uçuş aparatları yoxdur.

Raket qurğularına gəldikdə, qeyd olunur ki, hər iki tərəfdə arsenalın çoxunu "Qrad" tipli qurğular təşkil edir. Ancaq Azərbaycan bundan başqa 12 ədəd daha müasir "Smerç" qurğularına da malikdir. Həmin qurğular 1989-cu ildə Sovet ordusunun istifadəsinə verilib. Artilleriya qurğularının sayı baxımından da Azərbaycan Ermənistanı geridə qoyur.

Tank əleyhinə silahlara gəldikdə, hesabata görə, burada Azərbaycanın arsenalı Ermənistandan təxminən 10 dəfə çoxdur.

Bundan başqa, Azərbaycan həm də Hərbi Dəniz Qüvvələrinə malikdir ki, bu ölkəmizin Silahlı Qüvvələrinin Ermənistan ordusu qarşısında üstünlüyünü bir daha artırır. Bütün bunlar isə bir daha Azərbaycanın bütün sahələrdə olduğu kimi, Silahlı Qüvvələr baxımından da Ermənistanı xeyli qabaqladığından və növbəti illər ərzində fərqi daha böyük göstəricilərə çatdıracağından xəbər verir. Belə vəziyyət isə Ermənistanın işğalçılıq siyasətini davam etdirəcəyi təqdirdə, Azərbaycan qarşısında diz çökdürülməsinə daha güclü imkan yaradır.

Rasim Bayramov

Azərbaycan.-2009.-31 yanvar.-S.4.