LİTVADA XOCALI FACİƏSİNİN 18-Cİ İLDÖNÜMÜ İLƏ ƏLAQƏDAR SİLSİLƏ TƏDBİRLƏR KEÇİRİLİR

Bakı, 23 fevral (AZƏRTAC). Litva Azərbaycanlıları Cəmiyyəti (LAC) Xocalı faciəsinin 18-ci ildönümü ilə bağlı soyqırımı həqiqətlərinin bu ölkənin ictimaiyyətinə və siyasi dairələrinə çatdırılması məqsədi ilə bir sıra təbliğat tədbirləri və anma mərasimləri keçirir.

Cəmiyyətin sədri Mahir Həmzəyev bildirmişdir ki, LAC-ın təşəbbüsü ilə Litvanın www.slaptai.lt saytında tanınmış jurnalist və naşir Gintaras Visotskasın Xocalı faciəsi haqqında geniş analitik məqaləsi, foto və video görüntülər yerləşdirilmişdir.

Bu təbliğat materialları fevralın 24-də Kaunas şəhərində “XXI əsr” (“XXI amžius”) qəzetində dərc olunacaqdır. Bunlardan əlavə, Cəmiyyətin təşəbbüsü ilə Litva radiosunda qanlı Xocalı hadisələrinin obyektiv işıqlandırılmasına və onlara düzgün hüquqi-siyasi qiymət verilməsinə həsr edilmiş veriliş yayımlanacaqdır. Verilişdə yerli tarixçilər, beynəlxalq icmalçılar və siyasi şərhçilərlə bərabər, Litva Azərbaycanlıları Cəmiyyətinin sədri Mahir Həmzəyev də iştirak edəcək, Xocalı soyqırımı haqqında faktları və Azərbaycanın ədalətli mövqeyini ictimaiyyətə çatdıracaqdır.

Xocalı faciəsinin obyektiv işıqlandırılmasına həsr olunmuş materiallarla http://slaptai.lt/azerbaidzanas/2918-chodzaly-skerdynes--pati-didziausia-tragedija-kuri-istiko-pasauli-1992-aisiais.html linkində tanış olmaq mümkündür.

AZƏRTAC.- 2010.- 23 fevral.