Mərkəzi Elmi Kitabxananın fondları yeni nəşrlərlə zənginləşir

Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) fondlarına yeni nəşrlər təqdim olunub.

Bu barədə AZƏRTAC-a MEK-dən məlumat verilib. Bildirilib ki, bu yaxınlarda Litva Azərbaycanlıları Cəmiyyətinin sədri Mahir Həmzəyev müəllifi olduğu kulturoloji məqalələr, tarixi publisistika, politoloji qeydlər, müsahibələr, sənədli oçerk və esselərdən ibarət olan “Vilnüs-Bakı. Mədəniyyət Körpüləri və Dialoq Meridianları” kitabını MEK-ə hədiyyə edib.

Həmçinin kitabxananın bir neçə ay əvvəl istifadəyə verilmiş “Qarabağ müharibəsi qəhrəmanları” fonduna yeni nəşrlər təqdim olunub. Bunların sırasında Bahar Bərdəlinin “Qarabağın dayağı Bərdə - Bərdənin qüruru şəhidlər”, Suma Sakitqızının “Fatehlər Sabirabad şəhidləri” kitabları, Mərziyyə Nəcəfovanın “Poeziyamızın Qarabağ savaşı- Vətən müharibəsi” monoqrafiyası və digər nəşrlər var.

MEK-ə təqdim edilən nəşrlər sırasında “Azərbaycan tarixi (İntiqam Cəbrayılov, Tural Məmmədov)” abituriyentlər üçün dərs vəsaiti, Kənan Hacının “Hakimə açılan atəş” romanı, Hacı Niftalı Şıxların “Bizim əfsanəvi kosmos generalımız. General-Leytenant-Mühəndis Kərim Abbasəli oğlu Kərimov-100” kitabı və digərləri yer alır.

Qeyd edək ki, kitabxanaya müntəzəm şəkildə müəlliflər və təşkilatlar tərəfindən də müxtəlif elmi mövzularda nəşrlər təqdim olunur.

AZƏRTAC.- 2021.- 13 dekabr.