31 MART AZƏRBAYCANLILARIN SOYQIRIMI GÜNÜDÜR

Bu həftə boyunca dünya azərbaycanlıları 92 il əvvəl ermənilərin azərbaycanlılara qarşı törətdiyi vəhşiliyin ildönümünü qeyd etdilər. 31 Mart azərbaycanlıların soyqırımı günü Bakının bütün təhsil müəssisələrində, o cümlədən məktəbdənkənar müəssisələrdə də anıldı.

29 mart 2010-cu ildə Bakı şəhəri 24 №-li Uşaq və Gənclərin Yaradıcılıq Mərkəzində 31 Mart azərbaycanlıların soyqırımı gününə həsr edilən sərgi keçirilib. Sərgidə 90-a yaxın rəsm əsəri nümayiş olunub. Sərginin keçirilməsində əsas məqsəd gənc nəslin vətənpərvərlik ruhunda tərbiyə edilməsi, xalqımızın başına gətirilən bəlaların balaca rəssamların yaradıcılığında əks olunması və günahsız qurbanların əziz xatirəsinin anılmasından ibarətdir.

Sərgini mərkəzin direktoru Gülarə Quliyeva nitqi ilə açıq elan edib. Direktor çıxışı zamanı son iki əsrdə Qafqazda azərbaycanlılara qarşı məqsədyönlü şəkildə həyata keçirilən etnik təmizləmə və soyqırım siyasəti nəticəsində xalqımızın ağır təzyiqlərə məruz qaldığını, 1918-ci ildə Bakıda və Azərbaycanın digər bölgələrində ermənilərin törətdikləri vəhşiliklərin qan yaddaşımızda əbədi iz buraxdığını bildirib. Tədbirdə 24 №-li Uşaq və Gənclərin Yaradıcılıq Mərkəzinin dram dərnəyinin üzvləri də kompozisiya ilə çıxış ediblər.

Qeyd edək ki, tədbirdə Yasamal Rayon İcra Hakimiyyətinin nümayəndəsi Rafiq Həmidov, Yasamal Rayon İdman və Gənclər İdarəsinin rəisi İlham Səfərov da iştirak ediblər.

Martın 30-da Bakı şəhəri 26 №-li Uşaq və Gənclərin Yaradıcılıq Mərkəzində azərbaycanlıların soyqırımına həsr olunan geniş tədbir keçirilib. Tədbiri mərkəzin direktoru Ziyad Nəbiyev açaraq geniş məruzə ilə çıxış edib. Ziyad müəllim çıxışı zamanı ermənilərin ötən 200 ildə 1 milyondan artıq azərbaycanlını vəhşicəsinə qətlə yetirdiyini bildirib. Direktor respublikamız yenidən müstəqilliyini bərpa etdikdən sonra ümummilli lider Heydər Əliyevin imzaladığı fərmanla hər il martın 31-nin Azərbaycanlıların soyqırımı günü kimi qeyd edildiyini bir daha diqqətə çatdırıb.

Tədbirdə mərkəzdə fəaliyyət göstərən “Məktəb teatrı” və “Bədii qiraət” dərnəklərinin üzvləri 31 Mart azərbaycanlıların soyqırımı gününə həsr olunan “Odlar yurdu, nə bəlalı başın var” adlı ədəbi-bədii kompozisiya ilə çıxış ediblər. “Məktəb teatrı” dərnəyinin üzvlərindən Əsəd Alıyev, Abışov Emin və Ramin Əliyevin soyqırıma aid söylədikləri şeirlər daha təsirli olub. Sonda mərkəzin “Təsviri incəsənət” dərnəyinin üzvlərinin soyqırıma həsr olunan əsərlərindən ibarət sərgisinə baxış keçirilib.

Tədbirdə BŞTİ-nin Məktəbdənkənar təhsil sektorunun əməkdaşı Rövşən Əliyev, Binəqədi rayon məktəblərindən dəvət olunan şagirdlər, mərkəzin dərnək üzvləri, dərnək rəhbərləri və digər qonaqlar iştirak edib.

Bakı şəhəri 21 №-li Uşaq Yaradıcılıq Mərkəzində də 31 Mart azərbaycanlıların soyqırım gününün 92-ci ildönümü ilə bağlı xatirə mərasimi keçirilib. Mərasim iştirakçıları ilk olaraq soyqırım qurbanlarının ruhunu 1 dəqiqəlik sükutla yad ediblər. Tədbirdə çıxış edən sözügedən mərkəzin direktoru Fatma Təhməzova tarixin neçə-neçə sınaqlarından şərəflə çıxan Azərbaycan xalqı üçün martın 31-nin kədərli günlərdən biri olduğunu deyib. “Uzun illər siyasi hüquqi qiymət verilməyən 31 Mart soyqırımı da ta-rixin açılmamış səhifələrindən biridir” - deyən direktor ulu öndər Heydər Əliyevin azərbaycanlıların soyqırımı haqqında imzaladığı 27 mart 1998-ci il tarixli fərmanı da xatırladıb.

Tədbirdə mərkəzin bədii qiraət dərnəyinin üzvləri “Qan yaddaşımız” adlı musiqili-bədii kompozisiya ilə çıxış ediblər. Onu da qeyd edək ki, şagirdlərin ifasında Zəlimxan Yaqubun “Qanlı tarix” poeması da səsləndirilib. Bundan başqa, şagirdlər tərəfindən Seyid Cəfər Pişəvəri, Nəriman Nərimanov, Məhəmməd Əmin Rəsulzadə kimi siyasi xadimlərin Azərbaycan xalqına qarşı törədilən dəhşətli hadisələrə münasibətləri “Tarixdən gələn səslər” başlığı altında bir daha nəzərə çatdırılıb.

Tarix olub keçmiş hadisələri xatırlamaq, baş vermiş hadisələri yadda saxlamaq üçün deyil, tarixin ən böyük xidmətlərindən ibrət dərsi götürmək üçündür. Bu ibrət dərsi isə düşmənə qarşı amansız olmaqdan, qazandığımız nailiyyətləri qoruyub saxlamaqdan, itirdiklərimizi geri qaytarmaqdan ibarətdir.

Bakı təhsili.- 2010.- 2 aprel.- S. 14.