AMERİKALI MÜƏLLİM VƏ ŞAGİRDLƏR BAKIDA

Səfər çərçivəsində BŞTİ-də görüş keçirilib

Amerikanın müxtəlif ştatlarını təmsil edən 11 nəfərdən ibarət nümayəndə heyəti Bakıda səfərdə olub. Heyətin tərkibinə 9 şagird və 2 müəllim daxil idi. Qonaqlar paytaxtımızda olduqları müddətdə ölkəmizin təhsil sistemi ilə tanış olub, maddi-mədəniyyət abidələrinə baxış keçiriblər. Səfər 220 saylı məktəbin təmsil olunduğu layihə çərçivəsində həyata keçirilib. Bu barədə məlumat verən məktəbin direktoru Almaz Əsgərovanın sözlərinə görə, 2009 - cu ilin yanvarından etibarən təhsil müəssisəsi ABŞ-ın "Proyekt Harmoniya» təşkilatı ilə layihə həyata keçirir. Layihə çərçivəsində şagird jurnalistikası sahəsində biliklərin əldə edilməsi məqsədilə distant təhsil aparılır. 5 ay müddətində amerikalı professor azərbaycanlı şagirdlərə mövzu ilə bağlı internet vasitəsilə dərs keçib və sonunda ötən ilin iyununda məktəbin 10 şagirdi ABŞ-da səfərdə olub. Amerikalı şagirdlərin də ölkəmizə səfərinin layihənin davamı olduğunu vurğulayan direktor, iki ölkə arasında təhsil sahəsində təcrübə mübadiləsinin aparılması, şagird və müəllimlərin əməkdaşlığının genişləndirilməsi baxımından layihənin əhəmiyyətini qeyd edib.

Səfər çərçivəsində amerikalı şagird və müəllimlər Bakı Şəhəri üzrə Təhsil İdarəsinin də qonağı olublar. Qonaqları qarşılayan BŞTİ-nin Beynəlxalq əlaqələr və ictimaiyyətlə əlaqə sektorunun müdiri Zəminə Əliqızı təmsil etdiyi qurumun fəaliyyəti barədə amerikalıları məlumatlandırıb. Bakıda olduqlarından şərəf duyduqlarını bildirən qonaqlar ilkin təəssüratlarını bölüşüblər. Onların sözlərinə görə, Bakıya gəlməzdən əvvəl ölkəmiz haqqında məlumatları az olsa da qısa müddətdə Azərbaycan haqqında çox şey öyrəniblər. İdarə ilə tanışlıq da qonaqlara xoş təsir bağışlayıb. Ayrı-ayrı sektorların fəaliyyəti barədə onlara məlumat verilib və qonaqları maraqlandıran suallar cavablandırılıb. İdarənin foyesində yaradılan Heydər Əliyev guşəsi ilə tanış olan Amerikalı şagirdlər Azərbaycanın ümummilli liderini tanıdıqlarını bildirərək onun dünya şöhrətli siyasətçi olduğunu vurğulayıblar.

Strateji təhlil, planlaşdırma və kadrların idarə olunması sektoru ilə tanışlıq zamanı Amerikalı nümayəndə heyətini maraqlandıran sualları sektor müdiri Bəhman Nəbiyev cavablandırıb. Sektor müdiri bildirib ki, BŞTİ-nin tabeliyində 326 orta ümumtəhsil məktəbi fəaliyyət göstərir ki, burada da şagirdlərin təlim-tərbiyəsi ilə 34 minə yaxın müəllim məşğul olur. Amerikalı şagirdləri məktəblərdəki şagird sayı da maraqlandırıb. Onlara bildirilib ki, orta hesabla 800-1000 şagirdin təhsil aldığı məktəblərlə yanaşı 3500 şagirdi olan təhsil kompleksi də var. Amerikalı şagirdlərdən birini azərbaycanlı həmyaşıdlarının idmanla məşğul olması üçün məktəblərdə yaradılan şərait maraqlandırıb. Buna cavab olaraq B.Nəbiyev bildirib ki, Bakıda şagirdlərin dərsdən sonra asudə vaxtlarını səmərəli keçirməsi üçün 48 məktəbdənkənar müəssisə fəaliyyət göstərir. Həmin məktəblərdə idmanın, incəsənətin ən müxtəlif sahələri üzrə çoxlu sayda şagird məşğul olur. Hər müəssisədə 80-100 qrupun olması, hər qrupda 10-15 uşağın məşğul olması Amerikalı şagirdlərin marağına səbəb olub. Nümayəndə heyətinin marağına səbəb olan digər bir məqam isə uşaqlar üçün bu şəraitin dövlət təhsil müəssisələrində yaradılmasıdır. Bütün dövlət orta məktəblərində şagirdlərin təhsili, istedadlarının inkişafı üçün şəraitin olması amerikalı şagird və müəllimlər tərəfindən diqqətlə qarşılanıb.

İdarə ilə tanışlıqdan sonra nümayəndə heyəti BŞTİ-nin müdiri Nailə Rzaquliyeva ilə görüşüb. Qonaqları salamlayan Nailə xanım onlara paytaxtın təhsil sistemi barədə məlumat verib. Bildirib ki, rəhbərlik etdiyi qurumun tabeliyində 700-ə yaxın müəssisə fəaliyyət göstərir ki, bura məktəblər, uşaq bağçaları və məktəbdənkənar müəssisələr daxildir. Amerikalı qonaqların Bakıya səfərinin gedişatı ilə maraqlanan Nailə Rzaquliyeva qeyd edib ki, rəhbərlik etdiyi qurum tərəfindən ayrı-ayrı ölkələrin təhsil sistemindəki yeniliklər öyrənilir və öz müsbət nəticəsini vermiş təcrübələrin tətbiqi sahəsində işlər görülür. Amerika ilə əlaqələrin yaradılmasındakı səyinə görə 220 saylı məktəbə təşəkkürünü bildirən BŞTİ müdiri belə səfərlərin Azərbaycan həqiqətlərinin dünyaya çatdırılması və ölkələr arasında əməkdaşlığın inkişafı baxımından əhəmiyyətini vurğulayıb.

Azərbaycanla bağlı təəssüratlarını bölüşən Amerikalı müəllim və şagirdlər xüsusilə Bakının sürətli inkişafına təəccüblərini ifadə ediblər. Nümayəndə heyətinin rəhbərlərinin sözlərinə görə, Azərbaycana səfərin təşkil ediləcəyi barədə elanlar verildikdən sonra səfərdə iştirakla bağlı çoxlu sayda ərizələr daxil olub. Ərizələrə baxış keçirildikdən sonra ayrı - ayrı ştatları təmsil edən 9 şagird seçilib. Onlar bir-biri ilə yalnız səfərdən 10 gün əvvəl tanış olublar. Bakıda olduqları müddətdə azərbaycanlı ailələrdə qalan şagirdlər özlərinə qarşı qonaqpərvərlik, hörmət göstərən ailələrə təşəkkürlərini bildiriblər. Şa-girdlərin sözlərinə görə, Azərbaycanın sürətli inkişafını müşahidə etmək çətin deyil. Xüsusilə də Bakıda aparılan abadlıq və tikinti işlərinin miqyasına görə paytaxtımız dünyanın ən böyük şəhərləri ilə müqayisə ediləcək səviyyədədir. Azərbaycan mədəniyyətinin onları heyran etdiyini deyən şagirdlərdən biri "Diliniz, mədəniyyətiniz çox gözəldir. Bu ölkəni yaxından tanımaq, onun dili, mədəniyyəti, adət-ənənələri ilə daha yaxşı tanış olmaq istəyirəm" - deyə vurğulayıb. Azərbaycan mətbəxinin də vurğunu olduqlarını qeyd edən Amerikalı qonaqların sözlərinə görə, ölkəmizin təhsil sistemi ilə ilkin tanışlıq onlara xoş təsir bağışlayıb.

Amerikalı şagirdləri maraqlandıran başqa bir məsələ isə təhsil müəssisələrinin müasir texnologiyalarla təmini olub. Belə ki, dərslərdə iştirak etdikləri 220 saylı məktəbdə kompüterlərlə təchizatın yüksək səviyyədə olduğunu vurğulayan qonaqlar Azərbaycan və Amerikanın təhsil sistemi arasında oxşar cəhətlərin olduğunu qeyd ediblər.

BŞTİ-nin müdiri Nailə Rzaquliyeva amerikalı şagird və müəllimlərin qısa müddətdə ölkəmiz barədə ilkin rəyinin formalaşdığını bildirərək bunun davam edəcək əməkdaşlığa müsbət təsirindən danışıb: “4 gün bir ölkəni tanımaq, onun dili, mədəniyyəti, adət-ənənəsi ilə tanış olmaq üçün çox az müddətdir. Ancaq mən şadam ki, qonaqlarımız bu qısa müddət ərzində Azərbaycanın zəngin mədəniyyəti, tarixi, adət-ənənələri ilə qismən də olsa tanış olmaq fürsəti əldə ediblər. İnanıram ki, ölkələrinə qayıtdıqdan sonra onlar Azərbaycan barədə məlumatları düzgün çatdıracaqlar və bu Azərbaycanın Amerikada tanınması yolunda bir addım olacaq".

Məlumat üçün bildirək ki, Bakıda səfərdə olduqları müddət ərzində amerikalı nümayəndə heyəti Nizami Rayon İcra Hakimiyyətində görüş keçirib, İçərişəhərdə olub, Dövlət Filarmoniyasında xalq çalğı alətlərinin konsertində iştirak edib, 220 saylı məktəbdə 31 Mart Azərbaycanlıların soyqırımı gününə həsr olunan tədbirin iştirakçısı olub.

ARAZ ƏLİOĞLU

Bakı təhsili.- 2010.- 2 aprel.- S. 12.