60 YAŞIN MÜBARƏK!

53 saylı məktəb qonaqlı-qaralı oldu

Bugünlərdə 53 saylı məktəbin akt zalında xalq şairi Zəlimxan Yaqubun anadan olmasının 60 illik yubileyi münasibəti ilə tədbir keçirildi. Tədbirdə Bakı Şəhəri üzrə Təhsil İdarəsinin (BŞTİ) müdir müavinləri Məhəbbət Qarabağlı, Məhəmməd Bayramov, Hüseyn Əsgərov, BŞTİ-nin Beynəlxalq əlaqələr və ictimaiyyətlə əlaqə sektorunun müdiri Zəminə Əsədova, Bakı Dövlət Universitetinin müəllimi, professor Qara Namazov, “Azərbaycan müəllimi”, “Təhsil problemləri” qəzetinin nümayəndələri, məktəb direktorları, valideynlər və başqaları qonaq qismində iştirak edirdi. Tədbiri ilk olaraq açan məktəbin direktoru Firəngiz Həsənova qonaqları salamladıqdan sonra xalq şairi Z.Yaqub qələminin qüdrətindən, böyüklüyündən söz açdı. Çıxışı zamanı Z.Yaqubun Azərbaycan ədəbiyyatında özünəməxsus yeri olduğunu bildirən Firəngiz xanım nəinki Azərbaycanda, hətta Gürcüstanda da onun “Şərəf” ordeni ilə təltif olunduğunu tədbir iştirakçılarının nəzərinə çatdırdı. Direktorun çıxışından sonra söz böyük alim Qara Namazova verildi. Qara müəllim tədbirin təşkilində əməyi olan hər kəsə dərin minnətdarlığını bildirdikdən sonra şairlə bağlı düşüncələrini dilə gətirdi. Z.Yaqubu bugünkü Azərbaycan şeirinin önündə gedən bayraqdar adlandıran böyük ziyalı, alim Qara Namazov şairi 60 illik yubileyi münasibətilə ürəkdən təbrik etdi.

Z.Yaqubu öz doğma məktəblərində gördükləri üçün şagirdlərin də sevincinin həddi-hüdudu yox idi. Artıq üçüncü dəfə 53 saylı məktəbdə qonaq olan Z.Yaqubun adı çəkiləndə təkcə xalqını sevən şair yox, həm də aşıq-ozan sənətinin bilicisi göz önünə gəlir. Zəlimxan müəllimin Aşıqlar Birliyinin sədri kimi aşıq sənətinin yüksəlməsində və inkişafında böyük əməyi olduğunu hər kəs bilir. Elə buna görə də Zəlimxan müəllimin yubileyini aşıqlarsız təsəvvür etmək mümkün deyil. Böyük şairi təbrik etməyə gələn aşıq Məhərrəm də çaldığı aşıq havaları ilə tədbirə rəng qatdı.

Tədbirdə İbrahim Əbilov adına mədəniyyət evinin “Şəlalə” xalq çalğı alətləri ansamblı və onun bədii rəhbəri Zamiq Əliyev də iştirak edirdi. Z.Əliyev öz çıxışı zamanı Z.Yaqubun qeyri-adi istedadından, yaradıcılığının yüksək dəyərlərindən geniş söhbət açdı. Çıxışdan sonra İ.Əbilov adına mədəniyyət evinin solisti sözləri Z.Yaquba, musiqisi isə Z.Əliyevə məxsus olan “Allah səni pənahında saxlasın” adlı mahnını ifa etdi. Tədbir məktəbin V sinif şagirdlərinin şeir kompozisiyası ilə davam etdirildi. Məktəbin IX sinif şagirdi Dərgahquliyev Sənanın sazda göstərdiyi məharət, Musa Zeynalovun isə ifa etdiyi musiqi nömrəsi alqışlara səbəb oldu.

Şagirdlərin çıxışlarından sonra şeirlərini öz dilindən dinləmək üçün söz tədbirin səbəbkarı Zəlimxan Yaquba verildi. Xalq şairi sözlərinə bu cür başladı: “Məktəbə dəvət olunanda elə bilirəm ki, Məkkənin, Quranın, peyğəmbərin xidmətinə gedirəm. Çünki məktəb Məkkə, müəllim peyğəmbər, kitab Quran, qələm Allahın danışan dilidir”.

O, çıxışı zamanı ulu öndər Heydər Əliyev, Prezident İlham Əliyevlə qarşılıqlı səmimi əlaqələrindən də bəhs etdi. Zəlimxan Yaqub 50 yaşında “Şöhrət” ordeninə layiq görüldüyünü, 55 yaşında “Xalq Şairi” adını qazandığını, 60 yaşında isə “Şərəf” ordeni ilə təltif edildiyini bildirsə də, onun üçün ən böyük mükafatın xalq sevgisi, el məhəbbəti olduğunu vurğuladı. Çıxışının sonunda isə Zəlimxan Yaqubu xatırlayanlara, şeirlərini oxuyanlara, sazını çalanlara, musiqisini bəstələyənlərə, tədbirdə iştirak edən ziyalılara, o cümlədən tədbiri keçirən 53 saylı məktəbin kollektivinə təşəkkürünü bildirdi.

Z.Yaqubun yaradıcılığı sanki bir xəzinədir. O xəzinədən pay götürmək istəyən şagirdlər xalq şairinə müxtəlif suallarla müraciət etdilər. Şair də öz növbəsində ona ünvanlanan bütün sualları cavablandırdı.

Sonda tədbirin aparıcısı məktəb şagirdləri adından Z.Yaqubu təbrik edərək ona can sağlığı arzuladı. Şagirdlər şairin 80, 100 illik yubileylərinin də bu zalda birlikdə qeyd etmələrini Allahdan dilədilər. Z.Yaqubun “Xatirələr” şeiri ilə tədbir yekunlaşdı:

Ömür xatirəyə dönər, ya dönməz

İllərin izi var xatirələrdə.

Ötən əyyamların, keçən günlərin,

Dadı var, duzu var xatirələrdə.

O zaman əkmişdim, indi biçirəm,

Bir körpü salmışdım üstən keçirəm.

Çörəkdi yeyirəm, sudu içirəm,

Qismət var, ruzu var xatirələrdə...

Hər bir görüşün başlanğıcı olduğu kimi sonu da olur. Əminik ki, 53 saylı məktəbdə keçirilən bu görüş uzun müddət yaddaşlardan silinməyəcək.

Vəfa Bəkirqızı

Bakı təhsili.- 2010.- 19 fevral.- S. 2.