MƏKTƏBLƏRDƏ NOVRUZ TƏRAVƏTİ

Elimizə-obamıza bahar gəlir! Qaranquş müjdəli, xoş ovqatlı, çiçək ətirli, xonçalı Novruz Azərbaycan xalqının bayramlarının şahı sayılır. Çünki Novruz bayramı Azərbaycan xalqının gələcəyə inam hissini, ürəkaçıqlığını, qonaqsevərliyini, ünsiyyət, mehribançılıq və dostluq duyğularını özündə əks etdirir. Qeyd edək ki, Novruz bayramı həm də şən gülüşlər, humanist ideyalar bayramı kimi qiymətləndirilir. Bayramın gəlişi Azərbaycanın hər bir yerində olduğu kimi, Bakı şəhərində yerləşən təhsil müəssisələrində də böyük sevinc və maraq hissi ilə qarşılanır.

İlaxır çərşənbə ərəfəsində 54 saylı orta məktəbdə bayram abu-havası xüsusilə hiss olunurdu. Şagirdlər sevinc və həyəcanla şənliklər keçirdilər, elimizə-obamıza qədəm qoyan Novruzu xoş qarşıladılar. Məktəbin bütün qabaqcıl şagirdlərinin iştirakı ilə hazırlanan daha bir tədbir isə Azərbaycan dili və ədəbiyyat müəllimi Arzu Osmanovanın təşkilatçılığı ilə keçirildi. Tədbirdə şagirdlər Novruzla bağlı müxtəlif səhnəciklər göstərdilər, mahnılar, rəqslər ifa etdilər və bahara, Novruz bayramına həsr olunan şeirlər söylədilər. Tədbirdə məktəbin direktoru Sahibə Abbasova, müəllim və şagird kollektivi iştirak etdi. Sonda S.Abbasova tədbirin hazırlanmasında əməyi keçən hər kəsə, o cümlədən iştirakçılara dərin təşəkkürünü bildirdi, onlara bayram təbriklərini çatdırdı.

Bahar bayramının ruh yüksəkliyi ilə qeyd olunduğu daha bir məktəb 164 saylı orta məktəb oldu. İbtidai sinif müəllimi Familə Nurəddinovanın rəhbərliyi ilə təşkil olunan bayram şənliyində ibtidailər bahara aid şeirlər, rəqslər ifa etdilər, əyləncəli oyunlar göstərdilər. V c sinif şagirdi Məlumat Nurəddinov isə bahar bayramına aid slaydlar nümayiş etdirdi. Məktəbin akt zalında təşkil olunan tədbirdə məktəbin direktoru Kəmalə Qədirova tədbir iştirakçılarını salamlayaraq hamını bayram münasibətilə təbrik etdi. Kəmalə xanım milli bayramımız olan Novruzun tarixinə də nəzər saldı: “Novruz əsrlərin qaynaqlarından süzülüb gələn, bir müddət unudulmuş kimi görünən, lakin yaddaşlarda kök salan qədim el bayramıdır. Böyük mənəvi gücə malik olan Novruz bayramı ulu əcdadlarımızın bizə verdiyi ən gözəl yadigar olub, Azərbaycan xalqının milli ruhunu və yaddaşını, onun daxili aləmini bütün zənginliyi ilə yaşadır. Təbiətin oyanışının, varlığın yenidən canlanmasının müjdəsini verən Novruz bayramı ən qədim zamanlardan bəri həyat və məişətimizə daxil olub, insanlara aydın və işıqlı sabaha, xoşbəxt gələcəyə inam duyğusu bəxş edib”. Direktorun çıxışının ardınca rus dili və ədəbiyyat müəllimi Dilarə İsayevanın rəhbərliyi və VI c sinif şagirdlərinin iştirakı ilə hazırlanan konsert proqramına tamaşa edildi. Şagirdlərdən Sənay Məmmədli, Talıb Məmmədov, Qabil Salmanov maraqlı çıxışları ilə tədbir iştirakçılarının bayramlarını təbrik etdilər. Sonda isə məktəbin foyesində hazırlanan “Bahar” rəsm sərgisinə tamaşa edildi.

Martın 9-14-ü tarixlərində 18 saylı orta məktəbin bütün siniflərində Novruz bayramı ilə bağlı söhbətlər aparılıb. Novruzun adət-ənələrindən, keçmiş tarixindən bəhs olunaraq şagirdlərə məlumatlar verilib. Bununla yanaşı, “Elimizə Novruz gəlir” mövzusunda rəsm müsabiqəsi də keçirilib. Müsabiqə V-VII sinif şagirdlərini əhatə edib. Münsiflər heyətinin qərarına əsasən, VII b sinif şagirdi Mirhüseyn Həbibli I, VII a sinif şagirdi Aytac Quliyeva və VI b sinif şagirdi Gülay Cəbrayılzadə II, V a sinif şagirdi Ayaz Abbaslı, VII sinif şagirdi Aynur Əliyeva və rus bölməsi üzrə VII a sinif şagirdi Safiya Altınbayeva isə III yerin sahibi olublar.

18 saylı orta məktəbdə ayrı-ayrı siniflərdə də bayram şənlikləri yüksək səviyyədə qeyd olunub. Məktəbdə keçirilən ən böyük şənlik isə “Novruz bayramı - Saz bayramı” adlı tədbir olub. Tədbir xalqımızın qədim saz havalarından olan “Ruhani”nin səslənməsi ilə başlayıb. Saz havasının ardınca Azərbaycan dili və ədəbiyyat müəllimi Dilguşə Süleymanova Novruzla bağlı çıxışını iştirakçıların diqqətinə çatdırıb. Dilguşə müəllim çərşənbələrdən, Novruz adət-ənənələrindən söz açıb.

Daha sonra Novruzun əsas atributlarından olan Kosa ilə Keçəl öz duzlu-məzəli çıxışları ilə tədbir iştirakçılarında ruh yüksəkliyi yaradıb, məclisə xoş abu-hava bəxş ediblər. Şagirdlərin “Fincan-fincan”, “Kos-kosa” və digər bu kimi Novruzla bağlı səhnəcikləri də tamaşaçılara xoş təsir bağışlayıb.

60 saylı orta məktəbin aşağı sinif şagirdləri də Novruz bayramını məxsusi şəkildə qeyd ediblər. Tərbiyə işləri üzrə direktor müavini Qorxmaz Şükürovdan aldığımız məlumata görə, məktəbdə mart ayının 15-dən etibarən bayram şənlikləri keçirilir. Belə şənliklərdən biri sinif rəhbəri Məsmə Əliyevanın rəhbərliyi ilə V a sinfində keçirildi. Beşincilərin bayram sevinci həvəslə qurduqları səhnəciklərdən, ifa etdikləri şeir və rəqslərdən açıq hiss olunurdu. IV b sinfinin ibtidailəri də sinif rəhbəri Zərifə Süleymanovanın təşkilatçılığı ilə bayrama xüsusi hazırlaşmışdılar. Dördüncülər də öz növbələrində Novruza, bahara aid şeirlər, mahnılar söyləyərək, milli rəqslər ifa edərək bayram şənliklərinə rəngarənglik qatdılar.

Onu da qeyd edək ki, məktəbin fəalları bu gün keçiriləcək rayon səviyyəli Novruz şənliyində də yaxından iştirak edəcəklər.

44 saylı orta məktəbdə də ruh yüksəkliyi ilə “Novruz gəlir, yaz gəlir” adlı bayram şənliyi keçirilib. I - VIII sinif şagirdlərinin iştirakı ilə hazırlanan tədbir məktəbin musiqi müəllimi Kəmalə Əliyeva və Uşaq birliyinin sədri Mədinə Məmmədovanın rəhbərliyi ilə təşkil olunub.

Tədbir Bahar qızın çıxışı ilə açıq elan olunub. Daha sonra şagirdlərin hazırladıqları iki hissəli pərdəarxası kukla səhnəciyi ilə davam edib. Kosayla Keçəlin çıxışı da tədbirdə xüsusi ovqat yaradıb. Şagirdlər “Cücələrim”, “Nənələr bayramda”, “Arşın mal alan” və “O olmasın, bu olsun”dan səhnəciklər qurublar. Həmçinin məktəblilər çərşənbələrdən, maraqlı adət və inanclardan danışıb, “Yallı”, “Ey bahar xoş gəlmisən”, “Ağ çiçəyim” rəqslərini ifa edib, bayramla bağlı mahnı və şeirlər söyləyiblər.

Martın 16-da 152 saylı orta məktəbdə Novruz Bayramı münasibətilə bayram tədbiri keçirildi. Onu da deyək ki, 152 saylı orta məktəbdə Novruz şənliyinə hazırlıq işləri hələ bir ay əvvəldən başlamışdı. Məktəbin kollektivi bayram sovqatları ilə kimsəsiz, aztəminatlı və şəhid ailələrindən olan uşaqları sevindiriblər. Tədbirdə çıxış edən 152 saylı orta məktəbin direktoru Nərgiz Namazova 10 min ildən çox tarixə malik olan Novruz bayramı barədə bunları qeyd etdi: “Sırf Azərbaycan xalqına xas olan bayramlardan ən müqəddəsi Novruz bayramıdır. Bəşər sivilizasiyasının beşiyi sayılan bu məmləkət tarix boyu özünəməxsus adət-ənənələri ilə seçilib, məşhurlaşıb. Bu baxımdan, Novruz bayramının tarixi Azərbaycan xalqının mövcud olduğu dövrlərə təsadüf edir. Oda, alova sitayiş olunan dövrlərdə atəşpərəstlərin və bəşər tarixinin ilk kitabı olan Avestada Azərbaycan xalqının tarixi keçmişi, milli-mənəvi dəyərləri barədə də məlumatlar yer alıb. Bir çox millətlər Azərbaycan xalqına məxsus olan Novruz bayramını öz adlarına çıxmağa cəhd göstərsələr də, tarixi dəlillər bunun əksini təsdiq edib”.

Novruz şənliyi daha sonra siniflər üzrə davam edib. Öncəliklə II a sinfinin müəllimi Bələgözova Tərlalə şagirdləri əziz bayram münasibəti ilə təbrik edib. Ənənəvi bayram personajları - Kosa və Keçəl isə şənliyə toplaşanlara sevincdolu bayram ovqatı ərməğan etdilər. Şənliyə qatılan Bahar qız İbrahimova Rəfiqə yeni Günəş ilinin başlandığını elan etdi. II a sinfinin şagirdləri Nərmin, Məhəmməd, Fidan, Firuz, Nicat, İlahə, İsrafil, Amil və Nail rəngarəng konsert proqramı ilə çıxış etdilər, Novruza həsr olunmuş şeirlər söyləyib, kiçik səhnəciklər göstərdilər.

Vəfa BƏKİRQIZI

Bakı təhsili.- 2010.- 19 mart.- S. 3.