Nərimanov rayonunun sosial-iqtisadi inkişafı: real vəziyyət və perspektivlər

Mədəniyyət, incəsənət elə bir sahədir ki, onu yüksək səviyyədə inkişaf etdirmək hər bir dövlətin, xalqın borcudur. Çünki xalqları və məmləkətləri dünyada tanıdan, onlari bir-birinə yaxınlaşdıran mədəniyyətdir.

Azərbaycan xalqı böyük tarixi keçmişə, əsrlərin o üzündən gələn möhtəşəm bir mədəniyyətə sahibdir. Bu gün belə bir tükənməz xəzinəyə malik olmağımızla fəxr edirik. Mədəniyyət-incəsənət sahəsinin daim inkişaf etdirilməsi dövlət siyasətimizin tərkib hissəsidir. Hazırda Azərbaycanda bu sahəyə həddindən artıq diqqət və qayğı göstərilir. Aidiyyəti qurumlarla bərabər, yerli icra hakimiyyəti orqanları da mədəniyyətin yüksəlməsinə xüsusi önəm verir. Paytaxtın bütün rayonlarında mədəniyyət ocaqları fəaliyyət göstərir. Yeni tipli mədəniyyət və istirahət parklari abadlaşdırılaraq əhalinin ixtiyarına verilir. Musiqi məktəbləri, kitabxanalar əsaslı şəkildə təmir edilərək öz qapılarının şagirdlərin, oxucularin üzünə açır. Bakınin Nərimanov rayonu da mədəniyyət müəssisələrinin çoxluq təşkil etdiyi rayondur.

Bəri başdan onu bildirək ki, vaxtilə rayon ərazisində fəaliyyət göstərmiş və son iyirmi ilə qədər tamaşaçı qıtlığı çəkməyən kinoteatrlar hazırda işləmir. "Səhiyyə, təhsil, idman və mədəniyyət sahələrində bir sıra müəssisə və obyektlərin özəlləşməsi haqqında" Azərbaycan Respublikasi Prezidentinin 23 avqust 2006-cı il tarixli Sərəncamına əsasən "Şuşa", "Nərimanov" və "İzmir" kinoteatrları özəlləşməyə açıq elan edilib.

Dövlət müstəqilliyimizin ilk illərinə qədər üç iri mədəniyyət sarayına sahib olan Nərimanov rayonunda indi bu saraylarin heç biri öz profilinə uyğun fəaliyyət göstərmir. Araşdırmamız nəticəsində məlum oldu ki, mədəniyyət sarayınin ikisi hələ keçən əsrin 80-ci illərinin sonu, 90-cı illərin əvvəllərində fəaliyyətini dayandırib. Vaxtilə İnşaatçıların Mədəniyyət Evi kimi istedadlara qucaq açan, neçə-neçə gənc ifaçıya yol göstərən incəsənət ocağı uzun illərdir ki, görkəmli xanəndəmiz Alim Qasımov tərəfindən özəlləşdirilib. Hazırda Alim Mədəniyyət Mərkəzi adlanan bu obyekt də işləmir. Digər bir mədəniyyət sarayının binasında şadlıq evi yerləşir. Məlum olduğu kimi, Səttərxan adına Maşınqayırma Zavodunun keçmiş mədəniyyət sarayının yerində isə möhtəşəm Heydər Əliyev Mərkəzi inşa edilir. Yeri gəlmişkən, memarlar Qız Qalası, Şirvanşahlar Sarayı kimi bu Mərkəzin də gələcəkdə Bakının simvoluna çeviriləcəyini bildirir. Mütəxəssislər hesab edir ki, Heydər Əliyev Mərkəzi eyni zamanda da mədəniyyətimizin, tariximizin, memarlığımızın, elm və təhsilimizin etibarlı ünvanı olacaq...

Rayonda bir neçə kitabxana, musiqi məktəbi, uşaq yaradıcılıq mərkəzi rayon sakinlərinə xidmət göstərir.

Nərimanov Rayon İcra Hakimiyyətindən verilən məlumata görə, bu mədəniyyət ocaqlarının heç biri bu qurumun nəzdində fəaliyyət göstərmir. Ancaq buna baxmayaraq, İcra Hakimiyyəti tərəfindən müntəzəm olaraq onlara diqqət-qayğı göstərilir.

Qeyd edək ki, rayon ərazisində S.Xasıyev adına mədəniyyət və istirahət parkı, M.Şəhriyar adina mədəniyyət və istirahət parkı, M.K.Atatürk adına mədəniyyət və istirahət parkı, Bakı Heyvanat Parkı, "Bahar", "Dədə Qorqud" Uşaq Dəmiryolu Stansiyaları, Qarayev adına 8 saylı onbirillik musiqi məktəbi, Leopold və Mstislav Rastropoviçlər adına 21 saylı uşaq musiqi məktəbi, Ə.Bədəlbəyli adına 23 saylı uşaq musiqi məktəbi, K.Saroyev adına 35 sayli onbirillik musiqi məktəbi yerləşir. Baki Şəhər Mədəniyyət və Turizm İdarəsinin Nərimanov Rayon mərkəzləşdirilmiş Kitabxana Sisteminin Mərkəzi Kitabxanası və onun dörd filialı rayon sakinlərinin, xüsusən də uşaq və gənclərin daimi ziyarət etdiyi məkanlardır.

Kitabxanalar Rayon İcra Hakimiyyətinin sıx əməkdaşlıq etdiyi mədəniyyət ocaqlarıdır. Kitabxana sahəsinin daha yüksək səviyyədə inkişaf etdirilməsi istiqamətində bu qurum öz səylərini əsirgəmir. Bunu Bakı Şəhər Mədəniyyət və Turizm İdarəsinin Nərimanov Rayon mərkəzləşdirilmiş Kitabxana Sisteminin Mərkəzi Kitabxanasının qonağı olarkən öyrəndik. Fətəli Xan Xoyski prospekti 120/123 ünvanında yerləşən Kitabxananın sahəsi o qədər geniş olmasa da, burada oxuculara geniş xidmət göstərilir. Nərimanov kitabxanaçıları bildirir ki, onlar öz fəaliyyətlərini Azərbaycanın mərhum prezidenti Heydər Əliyevin məşhur "Kitabxana xalq, millət üçün müqəddəs bir yer, mənəviyyat, bilik, zəka mənbəyidir " fikrinin işığında qurur.

Baki Şəhər Mədəniyyət və Turizm İdarəsinin Nərimanov Rayon mərkəzləşdirilmiş Kitabxana Sisteminin Mərkəzi Kitabxanasının direktoru Tatyana Sergeyevna İndeykina bizimlə söhbətində rayonun kitabxana həyatı haqqında geniş məlumat verdi. Tatyana İndeykinanın sözlərinə görə, Kitabxana Sisteminin Mərkəzi Kitabxanası 1954-cü il noyabrın 18-də əsası qoyulan Abdulla Şaiq adına Kütləvi Uşaq Kitabxanasının bazasında yaradılıb. Kitabxana direktorunun dediyinə görə, 2011-ci ildən mərkəzləşdirilmiş qaydada fəaliyyət göstərən bu kitabxananın həyatında çox uğurlu dəyişikliklər baş verib. Kitabxananın fondunda ümumilikdə 323, 288 min nüsxə kitab var: "Dövlət kitabxana sahəsinə çox böyük diqqət və qayğı göstərir. Bilirsiz ki, uzun illər kitabxana sistemi bərbad vəziyyətdə olub. Həm kitabxanaların təmirlə bağlı problemləri vardı, həm oxucu tərəfdən ciddi korluq çəkirdik, həm də kitabxanaçıların daha həvəslə işləməsi üçün stimul yox idi. Günlərlə kitabxanaların qapısını oxucular açmırdı. Yeni kitablar almaq baxımından da vəziyyətimiz ağır idi. Bu gün isə o çətinliklər artıq arxada qalıb. İndi kitabxana sahəsində ciddi uğurlar qazanılır. Bu sahədə aparılan islahatlar öz bəhrəsini verir. Mərkəzləşmiş kitabxananın dörd filialı var. 1 və 2 saylı filiallar stasionar qaydada (onların öz binası var), 3, 4 saylı filiallar isə səyyar formada fəaliyyət göstərir. Səyyar kitabxana gah bizim binada, gah da filialların yerləşdiyi binada oxuculara xidmət edir. Kitabxanamızın beş şöbəsi var. Bunlar elektron informasiya, xidmət, kitab işləmə və komplektləşdirmə, kitabxanalararası abunə və metodika və biblioqrafiya işləri şöbələridir. Filial əməkdaşları da daxil olmaqla, 40 nəfərdən artıq işçimiz var. Əməkdaşlarımız arasında 25-30 ildən artıq iş təcrübəsi olanlar da, gənclər də çoxdur. Gənclər, əvvəlki illərdən fərqli olaraq, indi işləmək üçün bu sahəyə gəlir".

Tatyana xanım bildirdi ki, dövlət və yerli icra hakimiyyəti tərəfindən kitabxanaya göstərilən diqqət onların oxuculara daha ürəklə xidmət göstərməsinə səbəb olub: "Oxucularımızın istənilən kitaba olan tələbatını ödəməyə çalışırıq. Bütün işimizi o şəkildə qurmuşuq ki, oxucularımız bizdən narazı qalmasın. Bunun üçün şəhərimizdəki digər uşaq kitabxanaları ilə kitab mübadiləsi edirik. Bəzən oxucular bizə elə kitab sifariş verir ki, o bizim fondumuzda yoxdur. Biz həmin kitabı başqa kitabxanalardan alıb oxucuya veririk. Oxucu kitabı oxuyub qurtardıqdan sonra onu geri qaytarırıq".

T.İndeykina dedi ki, Azərbaycan Respublikası Prezidentinin 2004-cü il tarixli "Azərbaycan dilində latin qrafikasi ilə kütləvi nəşrlərin həyata keçirilməsi haqqinda" sərəncamı kitabxana fondlarının zənginləşməsinə səbəb olub: "Cənab İlham Əliyevin sərəncamı ilə latın qrafikası ilə çap olunan klassik və çağdaş Azərbaycan və dünya ədəbiyyatı kitabları bütün kitabxanalara hədiyyə edildi. Həmçinin Nərimanov rayonunda yerləşən kitabxanalar 50.000 (əlli min) ədədə yaxın latın qrafikası ilə nəşr olunmuş kitablarla təmin edilib. Təkcə bu il 1313 ədəd kitab almışıq. Bir məsələni xüsusi qeyd etmək istəyirəm. Elə kitablar var ki, kitabxanamızın ona ehtiyacı var. Biz həmin kitabların siyahısını tərtib edərək Nərimanov Rayon İcra Hakimiyyətinə təqdim edirik. Onlar yerli büdcə hesabına o kitabları nəşr mərkəzlərindən alaraq kitabxanamıza verir. Bu bizim üçün görülən böyük bir işdir. İcra Hakimiyyəti bunu bizdən əsirgəmir".

T.İndeykina həmçinin bildirdi ki, onda olan məlumata görə, prezidentin sərəncamı ilə çap olunan kitablar Nərimanov Rayonunda yerləşən məktəblərin kitabxanalarına da hədiyyə edilib. Qeyd edək ki, rayonda "Məktəb kitabxanalarının fəaliyyətinin təkmilləşdirilməsi" planına uyğun işləri həyata keçirmək və əyani texniki vasitələrlə təminat işi genişləndirilib. Belə ki, "Azərbaycan Respublikasi Prezidentinin "Azərbaycan dilində latın qrafikası ilə 2005-2006-ci illərdə yenidən nəşr olunmuş kitabların bölgüsünün təsdiq edilməsi haqqında" Sərəncamına uyğun olaraq ümumtəhsil məktəblərinin kitabxanaları 85 adda bədii ədəbiyyatla təmin edilib.

Rəhbərlik etdiyi Mərkəzləşdirilmiş Kitabxananın nəzdində "Gənc turist klubu" və "Oxucu klubu" yaradıldığını deyən T.İndeykinanın sözlərinə görə, bundan başqa, Bakı Şəhər Mədəniyyət və Turizm İdarəsi hər il ənənəvi olaraq "Ən fəal oxucu" nominasiyası üzrə müsabiqə keçirir: "Bu müsabiqədə bizim oxucular böyük həvəslə iştirak edərək qalib gəlir. Məktəbli oxucularımız arasında gözəl bədii qiraətçilər var. Ümumiyyətlə, bizim oxucuların əksəriyyəti istedadlıdır. Onlar rayonumuzda və Bakının digər rayonlarında yerləşən yaradıcılıq evlərində məşğul olur. Keçirdiyimiz bütün tədbirlərdə o uşaqlar iştirak edir. Kitabxanamızda uşaq şairlərinin, yazıçılarının xatirə və yaradıcılıq gecələrini keçiririk".

Azərbaycanın dövlət müstəqilliyinin 20-ci il dönümü ilə əlaqədar Nərimanov İcra Hakimiyyətilə birgə S.Xasıyev adına mədəniyyət və istirahət parkında "Müstəqilliyimiz əbədidir, dönməzdir" adli geniş bir tədbir keçirdiklərini nəzərimizə çatdıran xanım İndeykinanın dediyinə görə, parkda həm konsert proqramı ilə iştirak ediblər, həm kitablar nümayiş etdiriblər, həm də kitabxana oxucusu olan uşaqların əl işlərindən ibarət sərgi təqdim ediblər: "Bu tədbirdə müstəqil respublika olduğumuz bu 20 ildə ölkənin müxtəlif nəşriyyatları tərəfindən çap edilən əhəmiyyətli kitabları sərgiləmişdik. Kitabları mövzular üzrə təsnifatlandırmışdıq. Heydər Əliyev Fonduna, Prezident Kitabxanasına aid kitablara da yer ayırmışdıq. Burada, həmçinin, Milli Qəhrəman Mübariz İbrahimov haqqında yazılmış kitablar da təqdim edilirdi. Tariximizlə, ədəbiyyatımızla, incəsənətimizlə əlaqədar kitablar ekspozisiyada qoyulmuşdu. Musiqi bacarığı olan oxucularımız bu tədbirdə öz ifaçılıq məharətlərini göstərdi".

Sonda bildirək ki, Baki Şəhər Mədəniyyət və Turizm İdarəsinin Nərimanov Rayon mərkəzləşdirilmiş Kitabxana Sisteminin Mərkəzi Kitabxanasının saytı da yaradılıb. WWW. Nerimanov-mks.az saytı oxucuların ixtiyarına verilib.

Nərimanov rayonunun mədəniyyət mənzərəsilə özümüz də tanış olduq, sizi də tanış etdik. Rastlaşdığımız uğurlu işlər qəlbimizi fərəhləndirdi. Bu uğurun hər zaman davamını görmək istəyirik. Çünki dünyada mədəniyyət qədər insana gərək olan ikinci bir ümumbəşəri dəyər yoxdur.

İradə SARIYEVA

Bakı xəbər.- 2011.- 12 dekabr.- S.10.