"Eurovision"da Azərbaycanı bu dəfə oğlan müğənninin təmsil etməsi daha məqbul sayılır

Ötən yarışmalarda qız müğənnilərin dalbadal iki uğursuzluğu Eldar Qasımovun şansını artırıb

"Eurovision" beynəlxalq mahnı müsabiqəsində bir dövlət kimi iştirakımızın tarixi elə də böyük deyil. Əlli ildən artıqdır ki, Avropa Birliyi tərəfindən düzənlənən "Eurovision" yarışmasına 2008-ci ildən bəri qatılırıq. Bu müsabiqədə ilk dəfə Azərbaycanı Elnur Hüseynov və Samir Cavadzadə, 2009-cu ildə Aysel Teymurzadə-Araş cütlüyü, 2010-cu ildə Səfurə Əlizadə təmsil edib.

Elnurla Samir ölkəmizi 8-ci, Aysellə Araş 3-cü, Səfurə isə beşinci edib. Amma onların heç birinin göstərdiyi nəticə birmənalı qarşılanmayıb. Bütün təmsilçilərin həm ifası, həm özəl həyatı, həm geyimi, həm davranışı internet forumlarında müzakirə edilib. İştirakçılarımız barədə ürəkgenişliyilə xoş söz deyən çox az olub.

İctimai Televiziyanın (İTV) təşkilatçılığı ilə 2011-ci ildə Azərbaycanı "Eurovision-2011"də təmsil edəcək ifaçının seçilməsi üçün Milli seçim turu keçirilir. Bir həftəyə yaxındır ki, beşliyin siyahısı açıqlanıb. Eldar Qasımov, İlhamə Qasımova, Aynişan Quliyeva, İlqarə İbrahimova və Nigar Camal beşliyə düşüb. Artıq beşliyin tərkibilə bağlı mətbuatda kifayət qədər fikirilər dərc edilib. Nə mütəxəssislər, nə ictimaiyyət, nə də seçim turunda iştirak edənlər bu heyəti yetərli qəbul edir. Baxmayaraq ki, bəziləri beşliyin tərkibinin istedadını göylərə qaldırır. Bəziləri, xüsusən də xalq artisti Aygün Kazımovanın qızı İlqarəni və əməkdar artist Aybəniz Haşımovanın qızı Aynişanı tərifləməkdən yorulmur.

Musiqi sahəsindən anlayışı olan insanların çoxu deyir ki, ictimaiyyətə təqdim edilən beşlik "Eurovision" yarışmasının tələblərinə cavab vermir. Birinin səsinin olmaması, o birinin xarici görünüşü, başqa birinin geyimi və ingilis dilini bilməməsi tamaşaçıları razı salmır.

Beş nəfərin arasından kimi, "Eurovision-2011" yarışmasında ölkəmizi təmsil etməsini istəyirsiniz?

Sadə vətəndaşlar, ziyalılar və media nümayəndələri arasında sorğu keçirdik. Araşdırmamız göstərdi ki, tamaşaçılar məlum beşliyin tərkibini zəif hesab edir. Söhbət elədəyimiz insanların böyük əksəriyyəti bildirdi ki, o biri iştirakçılarla müqayisədə Eldar Qasımov nisbətən daha layiqli namizəd dir. Respondentlərin sözlərinə görə, nə Samirlə Elnurun, nə Aysellə Araşın, nə də Səfurənin orada iştirakı onları qane edib. Onlar deyir ki, iki il dalbadal "Eurovision"da ölkəmizi qızlar təmsil edib. Bu il isə ora oğlan iştirakçının getməsi daha məqsədəuyğun olardı. Qızlara gəlincə, səs imkanları baxımından nisbətən İlhamə Qasımova dəstəklənir.

Yeri gəlmişkən, Eldar Qasımov məsələsində Milli Konservatoriyanın rektoru, əməkdar incəsənət xadimi, bəstəkar Siyavuş Kəriminin də fikirləri tamaşaçıların fikrilə üst-üstə düşür. Bir neçə gün əvvəl S.Kərimi İTV-nin efirində bildirmişdi ki, Eldarın çox gözəl səsi, tələffüzü var: "Eldar, sənin çox gözəl səsin var. İki-üç ildən sonra sənin qabağında duran olmayacaq, oxumaqla hər yeri sökəcəksən". Məlumatlara görə, S.Kərimi də "Eurovision-2011"də Azərbaycanı Eldar Qasımovun təmsil etməsini istəyir.

Görək, seçimlər hansı nəticəni göstərəcək...

Aytəkin KƏRİMLİ

Bakı xəbər.- 2011.- 3 fevral.- S. 15.