400 min
kv.km idik, 86 min kv.km-ə düşdük...
Onun da 20 faizi...
Hər
bir dövlətin ümdə vəzifəsi ərazi
bütövlüyü və sərhədlərinin
toxunulmazlığını təmin etməkdir. Bu mənada,
belə demək mümkünsə, Azərbaycanın bəxti
elə də gətirməyib. Ona görə ki, zaman-zaman bu və
ya digər səbəblərdən torpaqlarımızı
itirə-itirə gəlmişik. Bunun obyektiv və subyektiv səbəbləri
olub. Çünki vaxtilə 400 min kvadrat kilometrlik əraziyə
malik bir ölkədən indi cəmi-cümlətani 86 min
kvadrat kilometrlik ərazi qalıb.
Erkən
orta əsrlərdə Azərbaycan deyilən diyar iki dövlət
arasında bölünmüşdü. Bu dövlətlərin
hər ikisi də türk mənşəli idi. Cənubda
Atropatena, şimalda isə Albaniya yerləşirdi. Həmin ərazilər
bəzən müstəqil siyasət yeritsələr də,
bir çox hallarda daha böyük dövlətlər olan
Sasanilərdən asılı qalmışdılar. Buna
baxmayaraq, hər ikisi öz təbii ərazilərini qoruyub
saxlaya bilmişdi. Sonradan Azərbaycan adlanan diyar
bütünlüklə Ərəb Xilafətinin nəzarəti
altına keçdi. Bu dövrdə Azərbaycan xilafətin tərkibində
olsa da, bütöv bir tam halında birləşdirilmişdi.
Yəni onun əraziləri hansısa başqa vilayətlərdə
deyil, vahid Azərbaycan vilayətində cəmləşdi. Azərbaycan
adlı məfhum da əsasən məhz bu dövrlərdə
meydana gəlib inkişaf etməyə başladı. Bu vaxtlar
Azərbaycanın ərazisi şimalda Dərbənd
keçidindən başlayıb, cənubda Həmədana,
Şərqdə Xəzər sahillərindən Qərbdə
indiki Ermənistanın Türkiyə ilə sərhədlərinədək
uzanırdı. Bu ərazidə yaşayan başlıca xalq da
azəri türkləri idi. Amma buna baxmayaraq, elə həmin
dövrlərdə müsəlman ərəbləri, erməni
hiyləsinə uyaraq, onlara münasibətdə azərbaycanlılara
nisbətən daha səmimi olmağa başladı. Bunun nəticəsidir
ki, ərəb zülmünə qarşı 20 ildən
çox mübarizə aparan Böyük Babəki əsir edib
ərəblərə təhvil verən də məhz erməni
Sumbat olub. Hansı ki, Babəkin
başçılığı altında başlanan bu
azadlıq mübarizəsi çox keçməmiş,
başqa ərazilər kimi, Azərbaycan torpaqlarının da
müstəqilliyinə gətirib çıxardı.
Düzdür, həmin dövrdən başlayaraq, XII əsrin
ortalarına qədər Azərbaycan ərazisində bir
çox xırda feodal dövlətlər meydana gəldi.
Sasanilər, Sacilər, Rəvvadilər, Şəddadilər
bu qəbildən olan feodal dövlətləri idi. Onların
bir çoxu Azərbaycanın cənub məkanında, digərləri
isə Kürlə Araz çaylarının
qovşağında yaranmışdı. Ən şimalda isə
Şirvanşahlar hakimiyyət başında idi. Bu zamandan
başlayaraq, Azərbaycan ərazisinin müxtəlif xırda
feodal dövlətlərinə bölündüyünün
şahidi oluruq. Düzdür, onların hər biri, xüsusən
də Şirvanşahlar ölkənin vahid bir məkanda birləşməsinə
çalışırdı. Amma feodal pərakəndəliyi
və şəxsi maraqlar bu ideyanın reallaşmasına əngəl
oldu. Bütün bunlara baxmayaraq, həmin dövlətlərin
ərazisi çərçivəsində olsa da, Azərbaycan
torpaqları öz bütövlüyünü əsasən
qoruyub saxlayırdı. Hətta Səlcuq türklərinin
hakimiyyəti altında olanda belə torpaq
bütövlüyünə elə də ciddi ziyan dəyməmişdi.
Bunun nəticəsidir ki, sırf türk mənşəli Eldəgizlər
dövləti də məhz Azərbaycan ərazisində
formalaşdı. Yəni həmin sülalənin hakimiyyəti
zamanı, Şirvanşahlar istisna olmaqla, bütün Azərbaycan
torpaqlarının bir bayraq altında birləşdirilməsi
mümkün oldu. Hətta monqol işğalları
dövründə də Azərbaycan bir əyalət olaraq
bütövlüyünü saxlayırdı. Amma həmin vaxt
da ermənilər, monqollara sığınaraq, müsəlmanlara
qarşı fitnə-fəsadlar törətməkdə idi. Azərbaycan
ərazisi tam olaraq bir də Səfəvilərin hakimiyyəti
dövründə dövlət çərçivəsində
bütöv bir hala gətirildi. Şah İsmayıl və
oğlu I Təhmasib əsas torpaqları Azərbaycan olan
bütöv bir imperiyanı yaratdılar. Bu zaman dövlət
dili kimi də məhz azərbaycan türk dili işlədilirdi.
Səfəvilərin iki əsrdən artıq hakimiyyəti
dövründə Azərbaycan dövlətin ən vacib və
mühüm əhəmiyyət kəsb edən ərazisi kimi
olduqca böyük rol oynayırdı. Hətta bu ərazilər
o zamankı orta əsr Avropa ölkələri tərəfindən
belə tanındı. Amma iki qardaş türk dövlətinin
- Səfəvilərlə Osmanlı imperiyasının daim
bir-birilə çarpışması sonda hər iki möhtəşəm
imperiyanın zəifləməsinə gətirib
çıxardı. Məhz bu müharibələr sonrakı əsrlərdə
Azərbaycan ərazilərinin parçalanmasında, demək
olar ki, mənfi mənada özünəməxsus rol
oynadı. Onların qardaş qırğını törətdiyi
ərəfələrdə Azərbaycan torpaqlarının bir
hissəsi növbə ilə gah osmanlıların, gah da səfəvilərin
nəzarəti altında olurdu. Osmanlılarla səfəvilərin
qardaş qırğınından istifadə edən Rusiya
imperiyası yavaş-yavaş Cənubi Qafqaza yaxınlaşmağa
başladı. Üzücü müharibələrdən zəifləyən
Səfəvilərin süqutu ilə Azərbaycan torpaqları
da xırda feodal xanlıqlara bölündü. 400 kvadrat
kilometrlik bir ərazidə nə az, nə çox - düz 18
müstəqil xanlıq yarandı. Onların da arasında,
eyni millətdən olmalarına baxmayaraq, daim soyuqluq
yaşanırdı. Belə ki, xanlıqlar yaxınlaşan
xarici təhlükə dönəmində dayaq olmaq əvəzinə,
bir-birinə quyu qazmaqla məşğul idilər. Bunun da nəticəsində
xanlıqların ərazisi tez-tez qardaş qanına
bulaşırdı. Təkcə Qubalı Fətəli xan
torpaqların birləşdirilməsi uğrunda ardıcıl
mübarizə aparırdı. Hətta bir müddət o, Azərbaycanın
şimal-şərq ərazisini birləşdirməyə nail
oldu. Lakin digər xanların fitnə-fəsadı birləşmə
ideyasının sona qədər davam etdirilməsinə maneə
yaratdı. Nəticədə də bunun ardınca Azərbaycan
ərazisinin daha ağır günləri başladı.
Qüdrətlənən şimal qonşumuz Rusiya
imperiyasının ekspansionist siyasəti və təcavüzü
nəticəsində torpaqlarımız iki hissəyə
parçalandı ki, hazırda da eyni situasiyadır. XIX əsrin
ikinci və üçüncü onilliyində baş tutan iki
Rus-İran müharibəsilə Azərbaycanın
şimalı Rusiya, cənubu isə İran tərəfindən
işğala məruz qaldı. Araz çayı iki Azərbaycan
arasında bir sərhəd oldu. 280 min kvadrat kilometrə
yaxın ərazimiz o gündən İranın nəzarəti
altına keçdi. Bu fürsətdən sui-istifadə edən
ermənilərin İran və Türkiyədən Azərbaycan
torpaqlarına, xüsusən də Qərbi Azərbaycan və
Qarabağa axını başladı. Xalqımızın
başına gələn başlıca bəlalar da məhz
ondan sonra özünü göstərdi. Mənfur ermənilər
torpaqlarımızda yerləşər-yerləşməz, ərazi
iddialarında bulundular. Çar Rusiyası isə bu işdə
onlara yardımçı idi. Ərazimizin bir hissəsinin
İrəvan quberniyasına düşməsindən
iştahlanan erməni cəlladlar yavaş-yavaş həmin
yerləri özününküləşdirdi. Beləliklə,
torpaqlarımızın itirilməsinə start verildi. Əsas
bəlalar isə XX əsrin əvvələrindən
özünü göstərdi. Şimali Azərbaycan
torpaqları işğal ərəfəsində 120 min kvadrat
kilometr əraziyə malik idi. XX əsrin əvvəlində,
çar Rusiyası imperiyasının dağılması ilə
onun ərazisində yeni-yeni dövlətlər meydana gəldi.
Onlar arasında, Azərbaycanla yanaşı, Ermənistan da
vardı. Hansı ki, onların yaratdığı dövlət
sırf Azərbaycan torpaqları olan ərazidə
formalaşdı.
Təəssüf ki,
yenicə formalaşan Azərbaycan dövləti ermənilərin bu fəaliyyətinin qarşısını
ala bilmədi. Amma bu da son
deyildi. Azərbaycan Cumhuriyyəti dönəmində 114 min
kvadrat kilometr əraziyə malik dövlətimiz bolşevik
işğalından sonra daha da kiçildildi. Göyçə,
Zəngəzur mahalları uzağı görməyi bacarmayan
Nərimanovlar tərəfindən Ermənistana peşkəş
edildi.
Bu
azmış
kimi, qədim Azərbaycan
şəhəri olan Dərbənd də
birdəfəlik olaraq Rusiyanın himayəsi altına keçdi.
Borçalı mahalı isə Gürcüstana verildi. Belədə,
cumhuriyyət dövründə 114 min kvadrat kilometr əraziyə
malik ərazimiz 86 min kvadrat kilometrə qədər
azaldıldı. Bütün bunlar azmış kimi, Ermənistanda
öz dədə-baba torpaqlarında yaşayan
soydaşlarımız zaman-zaman oradan didərgin
salındı. 1948-1953-cü illərdə xaricdən gələn
ermənilərin yerləşdirilməsi bəhanəsilə
150 minə yaxın azərbaycanlı Qərbi Azərbaycandan
deportasiya olundu. Keçən əsrin 80-ci illərinin sonu,
90-cı illərin əvvəlində isə azərbaycanlıların
Qərbi Azərbaycandan qovulması prosesi erməni vəhşiliyi
nəticəsində başa çatdırıldı. Yenidən
müstəqilliyə qovuşan Azərbaycana dikilən
düşmən gözləri onun yeni bir ərazisinin itirilməsinə
gətirib çıxardı. Ermənistanın himayəsinə
sığındığı Moskvanın ekspansionist siyasətilə
Dağlıq Qarabağ və ətraf ərazilərimiz mənfur
qonşularımız tərəfindən işğal edildi.
Hazırda, Dağlıq Qarabağ da daxil olmaqla, işğal
altında olan ətraf məkanlar ölkə ərazisinin 20
faizini təşkil edir. Belədə, indi dövlətimizin nəzarəti
altında qalan torpaqlar cəmi-cümlətani 70 min kvadrat
kilometr ərazini əhatə edir. Birləşmiş Millətlər
Təşkilatı və dünya dövlətləri tərəfindən
ölkəmizin ərazisi 86 min kv.km olaraq tanınsa da, dediyimiz
kimi, onun 20 faizi Ermənistan tərəfindən işğal
edilib. Amma bu o demək deyil ki, Azərbaycan xalqı bununla
barışıb. Əsla. Ölkəmiz hər an
torpaqlarını erməni tapdağından azad etməyə
hazırdır.
Bunun üçün onun yetərincə
qüvvəsi və
iqtisadiyyatı da var. Gec-tez onsuz da Dağlıq Qarabağ və ətraf
rayonları azad edəcəyik. Onu da qeyd edək ki, Azərbaycan
zaman-zaman torpaqlarını itirməklə bərabər, həmin
ərazilərdəki maddi-mədəni abidələrindən
də məhrum olub. Azərbaycan xalqının qədimliyini
göstərən bu maddi-mədəni abidələrimizi indi
düşmənlərimiz öz adlarına çıxmaqla məşğuldur.
Belədə, vaxtilə 400 min kv.km əraziyə malik nəhəng
bir ərazimizdən indi 86 min kv.km qalıb ki, onun da 20 faizi hələ
də işğaldadır.
Məqalə
Azərbaycan Respublikası Prezidenti yanında KİV-ə
Dövlət Dəstəyi Fondunun maliyyə dəstəyilə
hazırlanıb
Rüfət SULTAN
Bakı xəbər.- 2011.- 11-13 fevral.-
S. 12.