"Azərbaycanda
məlumat azadlığının qanunvericilik əsasları"
Rəşid
Hacılı: "Çox vaxt vətəndaşlar özləri
qanundan istifadə etməyə səy göstərmir"
Ələsgər Məmmədli:
"Bu qanunların ən uğurlusu..."
Azadlıq bütün cəmiyyətlərdə
arzuedilən bir məfhumdur. Amma hamı azadlığı
olduğu kimi dərk etmir. Bir qisim insanlar ondan tələb
olunduğu səviyyədə istifadə edir, müəyyən
şəxslər isə, azadlıqdan sui-istifadə edərək,
ağlına gələni edir. Düşünmür ki,
azadlığın da sərhədi ola bilər.
Fikir və söz
azadlığı cəmiyyətin inkişafında
böyük rol oynayır. Vətəndaşlar, əsasən
kütləvi informasiya vasitələrindən istifadə edərək,
öz fikir və düşüncəsini aidiyyəti orqanlara
çatdırır.
Bəzi insanlar deyir ki, ölkəmizdə
söz və məlumat azadlığı qanunla tənzimlənir
və vətəndaşların istənilən məlumatı
almağa, ötürməyə, yaymağa ixtiyarı var. Mətbuat
nümayəndələri də həmçinin. Onlar da cəmiyyəti
maraqlandıran bütün məlumatları araşdırmaq,
yaymaq, barəsində müzakirələr açmaq məsələlərində
haqlı olduqlarını daim gündəmə gətirir.
"Azərbaycanda məlumat
azadlığının qanunvericilik əsasları"nı
araşdırıb, qanunun kimin nə nəyin tərəfində
olduğunu uzə çıxarmağa
çalışdıq.
Məlum oldu ki, Azərbaycanda məlumat
azadlığının qanunvericilik əsasları hələ
XX əsrin əvvəllərində - (1918-20) ilk demokratik respublikamız
olan Azərbaycan Xalq Cumhuriyyəti (AXC) dönəmində
formalaşdırılıb. Həmin dövrdə "Azad Mətbuat
Haqqında" Bəyannamə imzalanıb. AXC-nin söz və
məlumat azadlığının qayda və prinsiplərini
özündə ehtiva edən bu sənəddən ölkəmiz
ikinci dəfə müstəqillik əldə etdikdən sonra
da istifadə edilib. Yəni 1992-ci ildə "Azad Mətbuat
Haqqında" Bəyannamə arxivdən üzə
çıxarılaraq hökumət tərəfindən tətbiq
edilib. Ekspertlərin sözlərinə görə, hazırda
söz və mətbuat azadlığı, fikir plüralizmi həm
dövlətimizin Konstitusiyasında, həm "İnformasiya Əldə
Etmək Haqqında" Azərbaycan Respulikası Qanununda, həm
də digər qanunların müvafiq bəndlərində
öz əksini tapır.
"Məlumat Azadlığı
Haqqında" Azərbaycan Respublikasının Qanununun birinci
maddəsində bildirilir ki, məlum qanunun 50-ci maddəsinə
uyğun olaraq hər kəsin istədiyi məlumatı qanuni
yolla axtarmaq, əldə etmək, ötürmək,
hazırlamaq və yaymaq azadlığı vardır: "Bu
qanunun məqsədləri üçün məlumat dedikdə,
təqdimat formasından asılı olmayaraq təbiətə,
cəmiyyətə və dövlətə baş vermiş
hadisələr, proseslər, faktlar, şəxslər
haqqında xəbərlər nəzərdə tutulur".
"Məlumat Azadlığı
Haqqında" Qanunun ikinci maddəsində isə məlumat
azadlığının təminatı məsələsi yer
alır. Burada hər kəsin məlumat almaq üçün
müraciət etmək hüququ var. Məlumat
azadlığının həyata keçirilməsi fiziki və
hüquqi şəxslərin hüquq və mənafelərinin
pozulmasına səbəb olmamalıdır. Məlumat
azadlığının məhdudlaşdırılmasına
yalnız Azərbaycan Respublikasının Konstitusiyasında nəzərdə
tutulmuş hallarda yol verilir. Məlumat azadlığından
istifadə edilməsi qaydaları Azərbaycan
Respublikasının Konstitusiyası və ona müvafiq olaraq
Azərbaycan Respublikasının qanunları ilə müəyyən
edilir.
Məlumat üçün bildirək
ki, məlumat azadlığı haqqında qanun 1998-ci ildə
mərhum prezident Heydər Əliyev tərəfindən
imzalanıb. Qanunda əks olunan müəyyən məsələlər
isə uzun müddət müzakirə mövzusu olduğundan
və buradakıların əksəriyyətinin mübahisə
doğurduğu nəzərə alınaraq 2005-ci ildə
sözügedən qanuna əlavə və dəyişikliklər
edilib. Bu dəfə sənədi prezident İlham Əliyev
imzalayıb. Hazırkı qanunvericilik sənədlərinin
daha mükəmməl olduğunu və burada yer alanların
tam olaraq məlumat alma azadlığını təmin etdiyini
deyirlər.
Media Hüququ İntitutunun rəhbəri
Rəşid Hacılının sözlərinə görə,
Azərbaycanda məlumat azadlığının qanunvericilik əsasları
2005-ci ildə qəbul edilən "İnformasiya əldə
etmək Haqqında" Qanunla tənzimlənir. R.Hacılının
sözlərinə görə, qanunun özü çox
yaxşı bir qanun olsa da, amma onun tətbiqi, həyata
keçirilməsi istənilən səviyyədə deyil. Onun
fikrincə, qanunun həyata keçirilməsilə
bağlı lazımi addımlar atılmır. O bildirdi ki,
qanun urnalistlərə informasiya almaq hüququnu versə də,
çox zaman onlar informasiya almaqda problemlə üzləşir.
"Başqa qanunvericilik aktları da var. O qanundan
danışmaq istəyirəm ki, vətəndaşlar ona
söykənib dövlət qurumlarından onu maraqlandıran məsələ
ilə bağlı informasiya ala bilsin. Çox vaxt vətəndaşlar
özləri qanunlardan və onlara verilən hüquqdan istifadə
etməyə səy göstərmir. Çünki onların
bu qanunlardan xəbəri yoxdur" deyə R.Hacılı
bildirdi. Bu sahədə ciddi maarifləndirmə işinin
aparılmasına ehtiyac olduğunu deyən Media Hüququ
İnstitutunun rəhbəri hesab edir ki, qəzetlər və
qeyri-hökumət təşkilatları bu sahədə maarifləndirmə
işi aparır. R.Hacılının dediyinə görə,
maarifləndirmə işini daha geniş şəkildə
dövlət məmurları və televiziyalar apara bilər:
"Televiziyalar müxtəlif vasitələrlə bu maarifləndirmə
prosesini sürətləndirməlidir. Müxtəlif sosial
roliklər çəkərək qanun haqda məlumat verə
bilərlər. Şəhərdə stendlər vurub vətəndaşların
dövlət orqanlarından məlumat almaq hüququnun nələrdən
ibarət olduğunu orada göstərmək olar".
Media Hüququ üzrə ekspert,
"İREX" təşkilatının
hüquqşünası Ələsgər Məmmədli də
bizimlə söhbətində bildirdi ki, bu məsələdə
ilk növbədə Konstitusiyamızın 50-ci maddəsinə
və 47-ci (ifadə azadlığı) maddəyə istinad
edilir: "Təbii ki, məlumat azadlığının
qanunvericilik əsasları bununla tənzimlənmir, bununla
bağlı başqa qanunlar da qəbul olunub. Bu qanunların da
ən uğurlusu 2005-ci ildə qəbul edilən
"İnformasiya Əldə Etmək Haqqında" Qanundur. Baxmayaraq
ki, "Məlumat Azadlığı Haqqında Qanun"
1998-ci ildə qəbul olunub. Ancaq o qanun, daha çox, deklarativ
xarakterli idi. Burada müəyyən prinsiplər sadalansa da,
praktik olaraq qanun necə işləyir, bu yox idi. Amma
"İnformasiya Əldə Etmək Haqqında" Qanun bu məsələni
olduqca geniş şəkildə təmin etdi. Təəssüf
edirəm ki, bu qanunda nəzərdə tutulan İnformasiya
üzrə müvəkkillik institutu yaradılmadı. Bu 6 ay ərzində
yaradılmalı idi".
Ə.Məmmədli dedi ki, 2001-ci
ildən sonra Avropa İnsan Hüquqları üzrə
Konvensiyaya qoşulmuşuq və bu sənədin 10-cu maddəsi
də məlumat azadlığını təmin edən ciddi
hüquqi sənəddir. Onun sözlərinə görə,
10-cu maddədə təsbit edilən məlumat
azadlığını və ifadə almaq azadlığını
məhdudlaşdıracaq əsaslar bizim 2002-ci ildə qəbul
olunan Konstitusiya Qanununda göstərilib: "Öncə
Konstitusiyamızın 50-ci maddəsində belə bir məhdudiyyət
yox idi".
Ə.Məmmədlinin bildirdiyinə
görə, bəzi məmurlar və məhkəmələr
vətəndaşların məlumat azadlığının
təmin olunmasına əngəl törədir: "Bəzən
görürsən ki, hansısa bir icra strukturu, informasiya sahibi
məlumat almaq istəyən vətəndaşların
azadlığını məhdudlaşdırır.
Ə.Məmmədlinin sözlərinə
görə, məlumat azadlığı haqqında
qanunvericilik bazası zəngin olsa da, onun tətbiqində
müəyyən problemlər var: "Qanunlar var, bu sənədlər
məlumat azadlığını tənzimləyir. Bu müsbət
haldır. Qanunda açıq şəkildə göstərilir
ki, ictimai vəsaitləri idarə edənlər informasiya
sahibidir. Amma məhkəmələrdə bəzi hakimlər
bu amili nəzərə almaq istəmir. Qanunlar bəzi məmurlar
və bəzi məhkəmələr tərəfindən
pozulur".
Beynəlxalq Avrasiya Fondu mətbuat
xidmətinin rəhbəri Rey Kərimoğlu isə hesab edir
ki, məlumat azadlığı ilə bağlı qəbul
edilən bütün qanunvericilik aktlarında, maddələrdə
müsbət məqamlar var. Dövlətin mətbuata və
söz azadlığının təmin edilməsinə səy
göstərdiyini, bu sahədə müəyyən işlər
gördüyünü deyən R.Kərimoğlunun sözlərinə
görə, illər öncə yaradılan Mətbuat
Şurası, sonradan formalaşdırılan Prezident
Yanında Kütləvi İnformasiya Vasitələrinə Dəstək
Fondu (KİVDF) məlumat, söz azadlığının
qorunması və dəstəklənməsi məqsədilə
yaradılıb: "Azərbaycanda bu məsələ ilə
bağlı kifayət qədər qanunvericilik bazası var. Bu
baza da çox mükəmməldir. Sadəcə olaraq, onun
işləməsində müəyyən problemlər olurdu və
Mətbuat Şurasının, Prezident Yanında Kütləvi
İnformasiya Vasitələrinə Dəstək Fondunun
yaradılması bu amala xidmət edirdi. "Kütləvi
İnformasiya Haqqında" Qanun, "İnformasiya Əldə
Etmək Haqqında" Qanun var. Bu qanunların icrasında
problemi bəzi məmurların ucbatından yaranır. Mətbuat
Şurasına yeni bina tikildi, ölkə
başçısı da açılış mərasimində
iştirak elədi. O bu stuktura dəstək oldu. Qanunvericilikdə
məlumat azadlığını təmin edən bəndlər
var. Söz azadlığı da onların sırasındadır.
Qarabağ müharibəsi dövründə ən böyuk
çətinliyimiz informasiya blokadasını yara bilməməyimiz
idi. Əslində, Sovet dövründə söz
azadlığı, məlumat azadlığı deyilən
anlayış yox idi... Həm Konstitusiyadakı müvafiq bəndlər,
həm də digər sənədlərdə göstərilən
məsələlər söz azadlığına xidmət edən
amillərdir".
Müsahibimizin dediyinə görə,
ölkə başçısı İlham Əliyev də
söz və məlumat azadlığına təkan verir. Jurnalistlərin
həbs edilməsinin əleyhinə olduğunu deyən R.Kərimoğlu
bildirdi ki, qələm adamları yazdıqlarına görə
məhbəsə atılmalı deyil: "Yadınıza gəlirmi,
Asif Mərzili həbs ediləndə ölkə
başçısı buna reaksiya verdi və baş redaktorun
azadlığa qovuşmasını reallaşdırdı. Prezident
o vaxt öz davranışı ilə dedi ki, jurnalist niyə həbs
olunmalıdır, başqa cəza metodları da var. Nə gizlədək,
görürsən ki, jurnalistlərin informasiya almasında bəzi
problemlər mövcuddur. Eyni zamanda, jurnalistikamızda peşəkarlığının
artırılması və digər sahələrdə
çox zəruri işlər var, onlar görülməlidir. Hazırda
bu sahədə ciddi işlər gedir.
R.Kərimoğlunun bildirdiyinə
görə, bundan sonra dövlət bu sahəyə daha
çox diqqət ayırmalıdır: "Diqqət,
qayğı göstərilir, bundan sonra da göstərilsə
çox yaxşı olar. Hesab edirəm ki, görüləcək
işlər çoxdur. İş gedir, amma onunla yanaşı
nöqsanlar da var. Sözsüz ki, iş olan yerdə nöqsan
da olur. Müəyyən boşluqlar nəzərə
çarpır, onlar aradan qaldırılmalıdır. İndi
"Diffamasiya Haqqında" Qanunun qəbulundan söhbət
gedir. Olsa bilsin, bu qanun Azərbaycanda qəbul edilsin. Halbuki bu,
Avropa ölkələrinin çoxunda qəbul edilməyib.
Amma bizi bunu qəbul etməyə məcbur edirlər".
Ekspertlər hesab edir ki, hər bir
vətəndaş qanunun ona verdiyi səlahiyyətdən
istifadə edərək ona lazım olan məlumatı istədiyi
orqandan ala bilər. Bəzi özəl qurumların məlumat
alma azadlığını pozmasına gəlincə, mütəxəssislər
deyir ki, onlar informasiya verməkdə cavabdeh
olmadığından, mətbuata, cəmiyyətə
açıq olub-olmamaq onların öz işidir.
Yazı Azərbaycan Respublikası
Prezidenti Yanında Kütləvi İnformasiya Vasitələrinin
İnkişafına Dövlət Dəstəyi Fondunun
keçirdiyi müsabiqəyə təqdim edilir
Namiq
QULİYEV
Bakı
xəbər.-2011.-21 fevral.- S.11.