"Açıq qapı" günündə Bakıdakı muzeylər necə yad edildi?

Suala maraqlı cavablar gəldi

Bütün dünyada muzey işçiləri 18 May tarixini peşə bayramları kimi qeyd edir. Beynəlxalq Muzey Günü münasibətilə muzeylərdə açıq qapı təşkil edilir, maraqlı ekskursiyalar və sərgilər keçirilir. Azərbaycanda fəaliyyət göstərən muzeylərə də giriş həmin gün pulsuz olur, amma bəzən yenə də muzeylərə yollananların sayında artım hiss edilmir.

Sanki insanlar tariximizə və mədəniyyətimizə biganə münasibət göstərir. Yəni muzeylərə üz tutan gənclərimiz arasında muzeyə könüllü şəkildə gəlməyən xeyli sayda insana rast gəlmək mümkündür. Halbuki, muzeyə giriş heç bir manat da deyil. Hətta bəzi muzeylər də var ki, eksponatlarla tanış olmaq üçün pul ödəmirsən. Maraqlıdır, muzeylərdə açıq qapılar təşkil ediləndə, bura könüllü gələnlərin sayı nə dərəcədə dəyişir?

Azərbaycan Tarix Muzeyinin direktoru Nailə Vəlixanlı bildirdi ki, indi muzeyə gələnlərin sayı artmaqdadır: "Muzey günündə bura gələnlərin sayı təqribən 2500 nəfər idi. Həm orta məktəblərdən gələnlər var idi, həm də xarici qonaqlar təşrif buyurmuşdu. Həmin gün muzey saat 11-də açılsa da, bir saat əvvəl muzeyin qarşısında izdiham hiss edilirdi. Qalan vaxtlarda isə hər gün 4-5 orta məktəbin böyük məktəbli qruplarını qəbul edirik. Əlbəttə ki, indi muzeyə ziyalıların bəziləri gəlir. Gündəmdə baş verən hadisələr də muzeyə gələnlərin sayına təsir edir. Yəni əhəmiyyətli bir hadisə baş verəndə daha az adam qəbul edirik. Ancaq əvvəlki illərə nisbətən daha çox insan axını var".

Hüseyn Cavidin Ev Muzeyinin direktoru Gülbəniz Babaxanlının sözlərinə əsasən, bayram günündə muzeyə giriş pulsuz oldu, lakin bura gələnlərin sayı azlığı ilə seçildi: "Bu gün (dünən-red.) muzeyimizə cəmi 30-dək adam gəlib. Bayram günündə bundan bir qədər artıq oldu. Qalan vaxtlarda isə muzeyə giriş 50 qəpikdir. Doğurdan da, bəzən əməlli-başlı məktəblilər, tələbələr muzeydəki eksponatlara baxmağa həvəs göstərir. Onu da deyim ki, muzeyin saytının mövcudluğu da gələnlərin sayına yaxşı mənada təsir edir. Bəzən gənclərimiz internetdə fəallıqları ilə xüsusi seçilir. Yəni Hüseyn Cavidin yaradıcılığına maraq göstərdiklərinin şahidi oluruq. Bu da bizi müəyyən qədər sevindirir".

Cəlil Məmmədquluzadənin Ev Muzeyinin elmi işçisi Yeganə Məmmədova deyir ki, internetin inkişafı və elmi-tərəqqi ilə əlaqədar muzeylərə üz tutanların sayı o qədər də qaneedici deyil: "Muzeyimizə, əsasən jurnalist tələbələr gəlir. Baxmayaraq ki, muzeyə giriş bütün vaxtlarda pulsuzdur. Arada məktəblilərin içərisindən bir neçə nəfəri gəlmək fikrinə düşür. Az olsa da, könüllü gələnlər də rast gəlirsən. Bir də görürsən ki, gələnlərin sayı həddindən artıq azalır. Hərdən isə müəyyən qədər insan axını olur. Amma Türkiyədən, İrandan olan qonaqlarımız muzeyə də gəlməyi yaddan çıxarmır. Muzeyə gələnlərin azlıq təşkil etməsi bizdən asılı deyil. Açığı, insanların yadına çox az hallarda muzey düşür. Təbii ki, internetin mövcudluğu da muzeyə gələnlərin sayına təsir göstərir".

Zaur Zahidoğlu

Bakı xəbər.- 2011.- 20-22 may.- S. 14.