Azərbaycan poçtunun dünəni və
bu günü
Bəşər
övladı mövcud olandan yer üzünün sakinləri
bir-birilə xəbərləşmək, əlaqə saxlamaq
üçün müxtəlif vasitələrdən istifadə
edib. Yazı icad olunmazdan əvvəl insanlar uzaq diyarlarda
yaşayan yaxınlarına müəyyən əşyalar, hətta
meyvələr göndərməklə öz sözlərini
onlara çatdırıblar.
Yazı meydana gəldikdən
sonra məktub yazmaq, namə göndərmək ənənəsi
formalaşıb. Bu məktubları ünvanlarına, əsasən
həmin yerlərə gedən səyyahlar, qasidlər, tacirlər,
göyərçinlər aparır, yaxud da çaparlar
çatdırırdı. Bu da Azərbaycan poçtunun
yaşının çox qədim olduğunu deməyə əsas
verir. Məlumatlara görə, dəmir yolu çəkilməzdən
əvvəl poçtun daşınması at qoşulmuş
xüsusi faytonlarla həyata keçirilirdi. XIX əsrin
ortalarından başlayaraq poçt sahəsi sistemli şəkil
almağa başlayıb. Dəmiryolu nəqliyyatının
işə düşməsi ilə bu sahə daha geniş
inkişaf yoluna qədəm qoyub. Bu inkişafa ən
böyük təkanı isə Azərbaycanın, paytaxt
Bakının ziyalıların, maqnatların, sahibkarların
maraq göstərdiyi məkana çevrilməsi verib.
Sözsüz ki, onların xaricdə yaşayan qohumları ilə
əlaqələri, yaxud onlara bağlama, məktub, pul
baratları göndərmək istəyi də poçt vasitəsilə
həyata keçirilib. Azərbaycan poçtunun böyük
bir mərhələsi Sovet dövrünə təsadüf
edib. Mütəxəssislərin bildirdiyinə görə,
SSRİ dönəmində poçt sahəsi müəyyən
qədər inkişaf edib. O dövrdə bu sahədə
böyük problemlər olduğunu qeyd edən mütəxəssislərin
sözlərinə görə, burada işin 99 faizi əl əməyi
nəticəsində ərsəyə gəldiyi
üçün insanlar çox əziyyət çəkirdi.
Müstəqillik illərində isə poçtun
özünün yeni inkişaf yoluna qədəm qoyduğunu
deyən poçt işçiləri hazırda əhaliyə
yüksək səviyyədə xidmət göstərmələri
üçün hər cür şərait
yaradıldığını bildirir.
Azərbaycan
poçtunun dünənini və bu gününü bu sahənin
mütəxəssisi, 1974-cü ildən fasiləsiz olaraq bu
sistemdə çalışan, "Azərpoçt" Məhdud
Məhdud Məsuliyyətli Cəmiyyətin 1 saylı
filialının 33 saylı şöbəsinin rəisi
Dadaş Məmmədovla birgə müqayisə etdik.
Dadaş Məmmədovun
sözlərinə görə, SSRİ dövründə Azərbaycanda
mövcud olan poçt sistemi tam olaraq əhalinin tələbatını
ödəyə bilmirdi. Buna səbəb kimi poçt rəisi
o dövrdə hazırkı mobil şəraitin
olmamasını göstərir: "Uzun illərdir bu sahədə
işləyirəm. Sovetlər Birliyi dövründə fəaliyyət
göstərən poçtla bugünkü poçtu
müqayisə etmək mümkünsüzdür. Bu gün
poçt sahəsi çox yüksək səviyyədə
inkişaf edib. Hazırda poçt sahəsində tətbiq
edilən texnologiyalar haqda o illərdə düşünmək
belə mümkün deyildi. Sovetlər Birliyi dövründə
bu işlər əllə görülürdü, yəni
insan əməyi nəticəsində meydana
çıxırdı. Bu da çox gərgin zəhmət tələb
edirdi. Poçt vasitəsilə yola salınan bağlamalar, məktublar,
pul göndərişləri aylarla ünvanına
yetişmirdi. Bu məsələ böyük problemə
çevrilirdi. Bütün növ göndərişlər, hətta
teleqramlar belə yerlərə vaxtında çatmırdı.
Eləcə də respublikaya gələn məktublar,
bağlamalar, pul baratlarının
çatdırılmasında çətinliklər vardı. Əsas
problem isə nəzarət keçid məsələlərilə
bağlı olurdu. Yadınıza gəlirsə, Sovetlər
Birliyi dağılandan sonra başqa respublikalarla əlaqələr
qırıldı. Bu da poçt sahəsinin
inkişafını dayandırdı. Demək olar ki, bu sahə
çökdü. İşimizin
həcmi aşağı endi, göndərişlərin
sayı azaldı". D.Məmmədovun dediyinə görə,
hazırda isə bu problemlərdən əsər-əlamət
qalmayıb. Müsahibimiz bildirdi ki, İnformasiya Kommunikasiya
Texnologiyaları (İKT) poçt sisteminə tətbiq edildikdən
sonra əhaliyə yüksək səviyyədə xidmət
göstərilir: "Bizə bir çox hallarda pul göndərişləri
üçün müraciət edirlər. Müştəri,
məsələn, Tərtər rayonuna pul göndərir, biz
iki-üç kəlmə danışana kimi artıq o pul
sahibinə çatır. Belə də ola bilər ki, buradan
bir rayona pul göndərilirsə, həmin adam hansısa səbəbdən
o rayonu tərk edib başqa bir rayona gedirsə, maneəsiz
olaraq olduğu rayonun poçt şöbələrindən həmin
pulu ala bilər. Bu məbləğ kompüterə yüklənir
və əməliyyatçı sistemə daxil olaraq
müştərini yola salır. Sözümün canı odur
ki, Sovet dövründə bu mobillik, çeviklik yox idi. Bu
gün isə İKT-nin meydana gəlməsi bir sıra xidmət
növlərini daha aktiv edib. Poçt vasitəsilə xarici
ölkələrə göndərilən istənilən bağlamanın
ünvanına hansı formada
çatdırıldığını nəzarətdə
saxlamaq imkanımız var. Bu da İKT sayəsində baş
verir. Tutalım, vətəndaş Rusiyanın hansısa şəhərinə,
yaxud Yaxın və Orta Şərq ölkələrindən
birinə bağlama göndərib. Biz kompüterin bazasına
daxil olub o göndərişin harada olduğunu, hansı
növ nəqliyyat vasitəsilə
daşındığını, nə zaman sahibinə
çatdırılacağını öyrənə bilirik.
Qeydiyyatda olan bütün poçt göndərişləri
haqda istənilən informasiyanı almaq mümkündür.
İnformasiya Komunnikasiya Texnologiyalarının bizim işimizə
tətbiqi poçt işçilərinin daha keyfiyyətli
xidmət göstərməsinə imkan verir. Əvvəllər
belə şeylər nə gəzirdi? Hansısa bir məktub,
bağlama, pul köçürmələri haqda məlumat
almaq üçün sorğular verilərdi və o
sorğunun cavabı aylarla uzanırdı. Keçmiş Sovetlər
Birliyinə daxil olan indiki MDB üzvü və Birliyə
üzv olmayan respublikaların heç birində İKT bizdəki
kimi geniş inkişaf etməyib. Azərbaycan poçtu bu sahədə
onlardan xeyli irəlidədir. Onların çoxu bizim tətbiq
etdiyimiz texnologiyalardan yararlana bilmir. Son illər poçt sahəsində
çox böyük tərəqqiyə nail olmuşuq.
Aparılan islahatlar elmi-texniki nailiyyətlərə söykənir".
Qeyd edək ki,
şöbə rəisi poçt sahəsində peşəkar
kadrların mütəmadi olaraq yetişdirildiyini də diqqətə
çatdırdı. Onun dediyinə görə, hazırda
rabitə sahəsində çalışan mütəxəssislərin
əksəriyyəti xaricdə təhsil alıb: "Biz kadr
sarıdan da başqa respublikalardan fərqlənirik. Xaricdə
təhsil almış mühəndislərimiz İKT sahəsində
böyük nailiyyətlərə imza atır. Bir poçt rəisi
olaraq kadrların yetişdirilməsini gözlərimlə
görürəm. Poçt sahəsində mütəmadi
olaraq kadr hazırlığı həyata keçirilir.
Vaxtaşırı poçt işçiləri
üçün treninqlər, kurslar keçirilir. Kadrlar, əsasən
yerlərdə, müəssisələrdə
hazırlanır. Eyni zamanda da Rabitə Kollecində kadrlar
yetişdirilir. Poçt əməliyyatçıları orada
oxuyur, daimi olaraq poçt şöbələrində,
poçt filiallarında, "Azərpoçt"da təcrübə
keçirlər. Ehtiyac olanda isə onlar işə
götürülür.
Dörd ilə
yaxındır poçt sistemində İKT nailiyyətlərindən
yararlandıqlarını deyən D.Məmmədov bildirdi ki,
bu texnologiyanın poçt sahəsində tətbiqi "Azərpoçt"
tərəfindən həyata keçirilib: "Azərpoçt"
poçt sisteminin simasını, quruluşunu dəyişdi. Bu
gün köhnə poçt sistemindən, onun
yaratdığı problemlərdən əsər-əlamət
yoxdur. İndi poçt sahəsində heç bir neqativ
halın baş verməsi mümkün deyil. "Azərpoçt"da
işləyən istənilən şəxs sistemə daxil
olmaqla istənilən poçt işçisinin, rəisinin
işinə nəzarət edə bilər. Yəni proqram elə
qurulub ki, başqa şey etmək mümkünsüzdür.
İKT-nin tətbiqi poçt işçilərinin işini əməlli-başlı
yüngülləşdirib. Onların hansısa işi əllə
görməsinə heç bir ehtiyac qalmayıb. İndi
onlardan yalnız savad, zehin tələb olunur".
Poçt
işçilərinin əməkhaqqının o qədər
də qənaətbəxş olmadığını deyən
D.Məmmədovun sözlərinə görə, buna
baxmayaraq, onlar öz işlərinə fədakarlıqla
yanaşır. Rübdən-rübə maaşların
artırıldığını bildirən şöbə rəisi
ümid edir ki, gələcəkdə əməkhaqlarında
artım olacaq: "Son il yarımda, az da olsa, bir neçə
dəfə əməkhaqqımız qalxıb. Yeni ildən
yenə də artırılacağı gözlənir. Gərək
poçta o gəliri gətirəsən. Hazırda
bütün poçt sisteminə rentabellik tətbiq
olunmaqdadır. Rentabellik nədir? Yəni gələn gəlir
sərf edilən vəsaitdən yüksək olmalıdır.
Bu da, təbii ki, müştərilərdən və onlara
göstərilən yüksək servisdən asılıdır.
Bütün poçtların xərclədiyi mənfəətdən
artıq deyil ki, onlar eyni səviyyədə olsun. Poçtlar
özləri də pul qazanmalıdır ki, işçilərin
əməkhaqqı artsın".
D.Məmmədov
axır zamanlar poçta müraciət edənlərin
sırasının genişləndiyini də qeyd etdi:
"Poçtun xidmətindən istifadə edənlərin
sayı çoxalıb. Çox adam faks göndərişini
poçta etibar edir, onu öz evindən deyil, poçt vasitəsilə
göndərir. Sovetlər Birliyi dağıldıqdan sonra
insanlar pul göndərişlərini poçta etibar etmirdi,
onu avtobus sürücülərilə, qatar vasitəsilə
yola salırdılar. Halbuki, poçt o pulun
toxunulmazlığını tam qoruyaraq onu ünvanına
avtobusdan, qatardan 8-10 dəfə tez çatdırardı.
Ağır illərdə poçt itirdiyi müştərilərini
son illər geri qaytarmağa başlayıb. Müştərilərimiz
görür ki, tətbiq edilən texnologiyalar bütün məsələləri
çox çevik şəkildə həyata keçirir. Odur
ki, bizim xidmətlərdən yararlanırlar. Biz poçt
işçiləri də əhaliyə yüksək səviyyədə
xidmət göstərməyə
çalışırıq. Biz qeydiyyatda olan bütün məktubları,
digər göndərişləri kompüterdə də qeydiyyata
alırıq".
Poçtlarda yeni xidmət
növlərinin də yaradılacağı haqda məlumat verən
D.Məmmədovun sözlərinə görə, bu müəssisələrdə
müştərilərin bütün suallarına cavab verilməli
və tələbləri ödənilməlidir: "Bu ərazidə
yaşayan sakinlərin çox hissəsi bütün kommunal
xidmətlərin haqqını bizim poçta ödəyir. Onlara
yaxşı xidmət göstərməsək, təbii ki, bizə
müştəri gəlməyəcək. Bu gün poçt
şöbələrinin 99 faizində valyutadəyişmə
xidməti həyata keçirilir. Orada işləyənlər
idarənin rəisləri tərəfindən təlimatlandırılır.
Əvvəllər belə şey yox idi. Bu gün-sabah
poçtlarda bank xidməti də göstəriləcək.
Artıq bank sistemilə də işlənəcək.
Poçt bankın həyata keçirdiyi bir neçə
proqramı artıq tətbiq etməyə başlayıb".
Azərbaycanın ən
ucqar kənd və rayonlarında belə müasir tipli
poçt şöbələrinin
açıldığını deyən D.Məmmədovun
sözlərinə görə, bu qurumlar əhaliyə
yüksək xidmət göstərir": Vaxtilə poçt
açılması mümkün olmayan ucqar
rayonlarımızda "Azərpoçt" tərəfindən
poçt şöbələri açılıb. Müasir
texnologiya o yerlərdə də geniş şəkildə tətbiq
olunur. Burada hansı səviyyədə texniki vasitələr
görürsünüz, onların hamısı Gəncədə,
Şəmkirdə, Tovuzda, Qazaxda və digər
rayonlarımızda fəaliyyət göstərən
poçtlarda da var. Burada da çox güclü mütəxəssislər
çalışır. Bunların hamısı Rabitə və
İnformasiya Texnologiyaları Nazirliyinin və "Azərpoçt"un
qəhrəmanlığıdır. Təkcə poçt
sistemi deyil, bütün telekommunikasiya sistemi kökündən
dəyişib. Biz bu sahədə heç bir problem
yaşamırıq. Texniki baxımdan çətinliyimiz olanda
"Azərpoçt"un əməkdaşlarına
müraciət edirik. Onlar can-başla bizə kömək
edir".
Köhnə poçt
işçilərinin də yeni texnologiyaları
qavradığını vurğulayan D.Məmmədov
onların bu nailiyyətləri kurslarda mənimsədiyini dedi.
Poçt rəisi onu
da bildirdi ki, poçt sistemində çalışan əməkdaşlara
müştərilərlə həddindən artıq mədəni
davranılması yönündə təlimat verilir:
"İşçilər, təbii ki, öz işini
yüksək səviyyədə görür. Onlardan həmçinin
tələb olunur ki, müştəri ilə şirin dillə
davransınlar. Biz öz işimizdə "hər zaman
müştəri haqlıdır" devizinin rəhbər
tuturuq.
Azərbaycan
poçtunun dünənini inkişafdan geri
qaldığını, əhalinin tələbatını tam
şəkildə ödəyə bilmədiyini qeyd edən D.Məmmədov
bildirdi ki, poçtumuzun çağdaş durumu inkişaf zirvəsindədir.
O, sonda poçt sahəsinin gələcəkdə bundan da yüksək
şəkildə tərəqqiyə nail olacağını
dedi: "Çünki bu sahəyə çox böyük
önəm verilir. Poçtumuz növbəti illərdə
daha da yüksəklərə qalxacaq".
Samirə
SƏFƏROVA
Bakı xəbər.-
2011.- 17 noyabr.- S. 11.