"Eurovision"dan sonra Azərbaycana turist axını başlaya bilər

Qeyri-neft sektorunu inkişaf etdirməkdən ötrü inkişafı vacib əhəmiyyət kəsb edən sahələrdən biri də turizmdir. Son müşahidələr göstərir ki, Azərbaycanda bununla bağlı bir sıra işlərin görülməsinə ehtiyac var. Çünki aparılan sorğular göstərir ki, Azərbaycana gələn turistlərin ölkəmizə üz tutmasının əsas səbəbi işgüzarlıqla bağlıdır.

Yəni Azərbaycan daha çox iş adamlarını özünə cəlb edir. Digər tərəfdən, ölkəmizə gələn turistlərin böyük əksəriyyəti Bakıda qalmağa üstünlük verir. Əsas səbəb paytaxtda inkişaf etmiş infrastrukturun və yüksək xidmətin olmasıdır. Regionlarda turizm infrastrukturunun inkişaf səviyyəsi, hələ ki, qənaətbəxş sayılmır. Bu, turizmin ən ciddi problemidir. Ümumən turistlər göstərilən xidmətdən razıdır. Lakin o da məlumdur ki, bizdə qiymətlər bir qədər bahadır. Məsələ ondadır ki, ölkəmizdə turizm obyektlərində həm istirahət qiymətləri bahadır, həm də xidmətin səviyyəsi aşağıdır. Hesab edilir ki, qiymətin ucuzlaşması üçün, ilk növbədə, turist müəssisələrinin sayı çoxaldılmalı və rəqabət mühiti yaradılmalıdır. Nəzərə almaq lazımdır ki, Azərbaycanın çox zəngin turizm potensialı var. Həm təbii-coğrafi, həm də zəngin tarixi abidələr baxımından ölkənin olduqca gəzməli və görməli yerləri var. Bu baxımdan çalışmalıyıq ki, ölkəyə daha çox turist gəlsin. Dünyada qəbul olunan müəyyən standartlar var. Onlardan biri də turizm obyektlərinin aeroporta yaxın ərazidə yerləşməsidir. Həmçinin, yol infrastrukturunun inkişaf etməsi, maşın kirayəsi bazarının, çoxlu sayda mehmanxanaların olması vacib şərtdir. Ona görə ki, hamının gəlib beşulduzlu mehmanxana kirayələmək imkanı yoxdur. Bu baxımdan orta təbəqənin maraqları nəzərə alınmalıdır. O da məlumdur ki, bir neçə gündən sonra Azərbaycan "Eurovision" mahnı müsabiqəsinə ev sahibliyi edəcək. Bu məqsədlə ölkəyə 30 min nəfərə qədər turistin gələcəyi gözlənir. Hökumət səviyyəsində turistləri qarşılamaq üçün bir sıra hazırlıq işləri görülüb. Artıq yavaş-yavaş turistlər ölkəmizə gəlməyə başlayıb. Ümumilikdə sözügedən mahnı müsabiqəsindən sonra turizm sektorunun inkişafında hansı yeniliklər və irəliləyişlər gözlənir? Müsabiqə bu sektorun bundan sonrakı inkişafına nə kimi təkan verə bilər?

Məsələyə münasibət bildirən ekspert Elxan Mikayılov hesab edir ki, sözügedən müsabiqə turizmin inkişafına keyfiyyətcə yeni impuls verə bilər: "Məsələ ondadır ki, çoxsaylı qonaqların ölkəmizə gəlməsi Azərbaycanın turizm potensialının tanıdılmasına şərait yaradır. Çünki ölkəyə gələnlər eyni zamanda turizm obyektlərinə baş çəkəcək. Bu da ölkənin turizm potensialının ortaya çıxarılması, turist axınının cəlb edilməsi üçün olduqca əlverişli fürsətdir. Həmçinin bu o deməkdir ki, bundan sonra Azərbaycana daha çox turistin gəlmə ehtimalı var. Ancaq inanmıram ki, bu, turizm obyektlərində qiymətlərin düşməsinə təsir göstərsin. Ən azından bu gözlənilmir. Yəni turizm obyektlərinin müştəri problemlərinin olduğu bir vəziyyətdə mövcud qiymətlər təklif olunursa, tələb artdıqca qiymətlərin aşağı salınmasına heç bir əsas yaranmaz. Ona görə də qiymətlərin düşmə ehtimalı yoxdur. Ancaq mahnı yarışması ilə əlaqədar turizm obyektlərinin tanınması, öz növbəsində, yeni-yeni obyektlərin açılmasına və mövcud olanların daha yüksək keyfiyyətlə xidmətlər təklif etməsinə təkan verəcək. Bu da, öz növbəsində, ümumilikdə turizm sektorunun inkişafına gətirib çıxara bilər".

E.Mikayılovun fikrincə, kompleks tədbirlər görülsə, turizm sektorunun ölkə iqtisadiyyatında çəkisini artırmaq mümkündür: "Azərbaycanın mövcud coğrafi təbiəti, iqlim şəraiti və malik olduğu tarixi abidələr imkan verir ki, ölkə mühim turizm məkanına çevrilsin. Digər tərəfdən nəzərə almaq lazımdır ki, bir sıra dövlətlərin ümumi daxili məhsul istehsalında turizm sektoru əhəmiyyətli çəkiyə malikdir. Azərbaycanın da bu sahədə zəngin potensialı var. Bunun ÜDM-də çəkisinin nə qədər olacağını konkret proqnozlaşdırmaq olmasa da, irəliləyiş var. İş ondadır ki, ölkənin turizm sektorunda ilbəil artım müşahidə olunur. Qeyri-neft sektorunun inkişafı baxımından gələcəkdə turizmin əsaslı inkişafına nail olmaq mümkündür. Tam məsuliyyətlə demək olar ki, Azərbaycanın bununla bağlı imkanları var".

Vidadi ORDAHALLI

Bakı xəbər.- 2012.- 11-13 may.- S. 10.