Gənc nəslin tərbiyəsində 20
Yanvar ibrətləri...
"Nəzərə
alsaq ki, bu bizim yaxın tariximizdir, o zaman məsələnin
mahiyyətini daha dərindən anlamağa imkan yaranır"
Hansı əsrdə,
dövrdə yaşamadan asılı olmayaraq, tariximizi, adət-ənənələrimizi,
dəyərlərimizi yaşatmalı, ona hər zaman sahib
çıxmalıyıq. Bu cür düşüncə tərzi
milli şüurun ayrılmaz tərkib hissəsi
olmalıdır. Tariximizin bir sıra keşməkeşli mərhələlərində
baş verən acı dərslərdən düzgün nəticə
çıxarmaq və bunu gənc nəslin diqqətinə əhatəli
formada çatdırmaq lazımdır.
Düzgün dəyərləndirmə
və bundan çıxış edərək nəticə
çıxarmağın yolu obyektiv yanaşma tərzindən
keçir. Ola bilsin, tarixin hansısa dönəmlərində
buraxılan səhvləri qəbul, həzm etmək çox
üzücü görünsün. Ancaq real əsaslara
söykənərək nəticə çıxarmaq
baxımından bunun əhəmiyyəti danılmazdır.
Eyni zamanda, dövlətin malik olduğu prinsipial dəyərlərin
qorunması baxımından bunun önəmi
böyükdür. Çünki bir növ bu deyilənlər
ümumilikdə dövlətin milli ideologiyasını təşkil
edir. Bütövlükdə dövlətin malik olduğu
ideologiyanın vəd etdiyi fayda yetərincə müxtəlif
və çoxşaxəlidir. Yetər ki, onun prinsipial əsaslarını
qoruyub saxlaya, böyüməkdə olan gənc nəslə
aşılaya, ötürə biləsən. Bunun
üçün də başlıca olaraq gənclərə
milli mənlik şüurunun aşılanmasını həyata
keçirmək lazımdır. Sözügedən zümrəyə
arzuolunan səviyyədə bunu aşılaya bilsək,
sadalanan dəyərlərin yaşadılmasında elə də
çətinlik olmaz. Qeyd edək ki, milli mənlik
şüuru özünüdərk, özünütapmaq deməkdir.
Milli özünüdərk deyəndə ilk növbədə
insan bağlı olduğu tarixi kökü, milli mənsubiyyətini,
vətəninin tarixini bilməli və dərindən təhlil
etməyi bacarmalıdır. Hər bir gənc, vətəndaş
dərk etməlidir ki, hansı vətəni, milləti, milli
xüsusiyyətləri təmsil edir. Eyni zamanda, hansı
özünəməxsus və səciyyəvi spesifik
xüsusiyyətlərə sahibdir. Bütün bunlar həm də
milli kimlik məsələsinin dərk olunması deməkdir.
Yuxarıda sadalananlar milli mənlik şüuruna aid olan
faktorlardır. Milli mənlik şüurunu, vətənpərvərlik
hisslərini qavrayıb dərk etmək üçün bir
sıra tələblərə əməl olunması təmin
edilməlidir. Çünki haqqında
danışdığımız məfhum uşağın tərbiyəsində,
xüsusən də gənclik dövründə çox
mühüm şəkildə özünü biruzə verən
məsələdir. O üzdən, sözügedən ideya gəncliyə
aşılanmalıdır.
Tarix boyu Azərbaycan
xalqı min bir faciə ilə üzləşib. Bir sıra
istilaçı hücumlar nəticəsində zaman-zaman malik
olduğu tarixi əraziləri itirmək məcburiyyətində
qalıb. Bu da millətimizin yaddaşında acı izlər
buraxıb. Xüsusən də ötən yüz il ərzində
millətimizin başına bir sıra müsibətlər gəlib
və nəticədə xalqımız olmazın iztirablara, əzab-əziyyətə
düçar olub. İndinin özündə də o yaralar
sağalmaq bilmir ki, bilmir. Tarix nə qədər amansız
olsa da, bütün bu baş verənləri heç cür
unutmaq olmaz. Məsələ ondadır ki, XIX-XX əsrlər
bununla bağlı ən faciəli və dramatik hadisələrin
baş verməsilə yadda qalıb. Belə ki, 1813-cü ildə
İranla Rusiya arasında imzalanan "Gülüstan", daha
sonra 1828-ci ildə imzalanan "Türkmənçay"
müqavilələrilə böyük Azərbaycan iki yerə
bölünərək işğal edildi. Yüzlərlə kənd
yandırıldı, tarixi abidələr məhv edildi və
s. Nəticədə xeyli sayda soydaşımız doğma
yurdunu tərk etməli oldu. Bununla kifayətlənməyən
rus imperiyası şimali Azərbaycanda erməniləri məskunlaşdırmağa
başladı. 1918-ci ildə Azərbaycan müstəqillik əldə
etsə də, bunun ömrü çox uzun olmadı.
İyirmi üç aydan sonra bolşevik Rusiyası Azərbaycan
Demokratik Respublikasının müstəqilliyinə son qoydu.
ADR ölkənin o dövrdə bir sıra beynəlxalq
qurumlarda tanınması üçün böyük iş
gördü. Məhz həmin işlərin nəticəsi idi
ki, 1920-ci ilin yanvarında Versal konfransında iştirak edən
ölkələr Azərbaycanın müstəqilliyini
tanıdı. Ondan sonrakı dövrdə Azərbaycan
işğal olunduğuna görə ölkəmizin beynəlxalq
qurumlarda təmsil olunması olduqca məhdud çərçivədə
oldu. 80-ci illərin sonlarında başlayan xalq hərəkatı
və müstəqilliyə gedən yol heç də rahat
olmadı. O dövrdə vüsət alan erməni separatizmi və
onlara himayədarlıq edən Sovet Rusiyası
soydaşlarımızın öz dədə-baba yurdundan didərgin
salınmasına, torpaqların işğalına
çalışırdı. Çox təəssüflər
olsun ki, qüvvələr nisbətinin qeyri-bərabərliyi və
Azərbaycanın yaşadığı informasiya blokadası
qismən də olsa məkrli niyyətlərin həyata
keçməsinə səbəb oldu. O dövrdə Azərbaycanın
üzləşdiyi ən böyük faciələrdən
biri də 20 Yanvar qətliamı oldu. Belə ki, sovet
imperiyası Azərbaycanda milli azadlıq hərəkatını
boğmaq üçün 1990-cı ilin 20 yanvarında dinc
nümayişçilərə divan tutdu. Gülləbaran nəticəsində
131 nəfər şəhid edildi, yüzlərlə insan
yaralandı. Lakin bütün bu repressiyalara baxmayaraq, xalqın
azadlıq istəyini boğa bilmədilər. Əksinə,
azadlıq uğrunda mübarizə yüksələn xətt
üzrə inkişaf etməyə başladı. Nəticədə
1991-ci ilin avqustun 30-da müstəqillik haqqında bəyənnamə,
həmin ilin 18 oktyabrında isə müstəqillik haqda
Konstitusiya aktı qəbul olundu. Hər il xalqımız
böyük izdihamla 20 yanvar şəhidlərini yad edir,
onların müstəqillik uğrunda göstərdiyi rəşadəti
qiymətləndirir. 20 Yanvar müstəqilliyə gedən
yolun mühüm bir hissəsidir. O şəhidlər həm də
gənclər üçün bir azadlıq, vətənpərvərlik
rəmzi hesab olunur. Bu nöqteyi-nəzərdən, 20 Yanvar
hadisələri gənclərə vətənpərvərlik
hisslərinin aşılanmasında, milli mənlik
şüurunun dərkində nə kimi rol oynayır?
Müasir
İnkişaf İctimai Birliyinin rəhbəri Mübariz
Aşırlının sözlərinə görə, 20
Yanvar faciəsi, Xocalı və 31 Mart soyqırımları
bizim qan yaddışımızdır: "O üzdən
bunları unutmamalıyıq və çox yaxşıdır
ki, hər il bununla bağlı geniş tədbirlər
keçirilir. Hesab edirəm ki, bütün bunlar gənc nəslin
vətənpərvərliklə bağlı tərbiyəsində
çox mühüm rola malikdir. Bu həm də gənclərin
milli kimliyini tanımalarına, milli mənlik şüurunu dərk
etmələrinə stimul verən hadisədir. Milli kimliyini,
keçmişini bilən bir millətin gəncliyi, gənc
nümayəndələri yoxdursa, onda o millətin
axırı yoxdur. Bu baxımdan, 20 Yanvar gənclərin
düşüncə tərzində çox mühüm
çəkiyə malik olan tarixi hadisədir. Nəzərə
alsaq ki, bu bizim yaxın tariximizdir, o zaman məsələnin
mahiyyətini daha dərindən anlamağa imkan yaranır.
Ancaq bir məqam da var ki, onu qeyd etməmək doğru olmaz. Məsələ
ondadır ki, biz hər il faciələrimizin ildönümlərini
daha yaxşı şəkildə keçirdə bilərik, nəinki
təkcə ümumrespublika matəm günü kimi qeyd etməklə
kifayətlənmək. Biz bir qədər daha fərqli formada
və daha təsirli vasitələr seçərək bunu təbliğ
edə və gənclərə aşılaya bilərik. O
üzdən, bu istiqamətdə bir qədər düzəlişlər
etsək yaxşı olar. Nəzərə almaq lazımdır
ki, gəncliyin üzərinə böyük yük
düşür. Bu istiqamətdə gəncliyə hər
cür yardım göstərmək lazımdır ki, onlar bu
işin öhdəsindən layiqincə gələ bilsin. Bunun
başlıca meyarlarından biri də vətənpərvərlik
hisslərinin aşılanmasından ibarətdir".
M.Aşırlının mövzu ilə bağlı səsləndirdiyi
fikirlərdən o da məlum oldu ki, "Tariximizi elə təqdim
etmək lazım deyil o mənada ki, biz hər zaman əzilmişik,
iztiraba məruz qalmışıq. Doğrudur, 200 il müstəmləkə
əsarəti xalqımıza çox böyük zərbələr
vurub. Ancaq bundan çıxış edərək
xalqımızı məzlum formasında təqdim etmək
doğru deyil. Bu cür yanaşma tərzi məğlubiyyət,
kölə, qul psixologiyası aşılayır. Ona görə
də mümkün qədər bu cür təfəkkür tərzindən
imtina etmək lazımdır. Yəni bu yöndə
aparılan təbliğatı bir balaca dəyişmək və
fərqli yol seçmək lazımdır. O düzəlişlər
ona gətirib çıxarmalı və elə bir metodlar
seçilməlidir ki, insanlarda sabaha güclü bir ümid,
inam olsun. Gənclər qalibiyyət şüuru, təfəkkürü,
hiss və həyəcanı ilə yaşasın. Gənclər
daim qalib gəlmək və bu qalibiyyətə çatmaq
mübarizəsilə yaşasın. Bu cür təbliğat
metodu seçilərsə gənclərdə vətənpərvərlik
və döyüş ruhu bir az da artacaq. Bütövlükdə
milli dəyərlərimizə söykənən və bu dəyərləri
düşüncələrində, davranışlarında,
iş fəaliyyətində yaşadan gənclərimiz
çoxdur. Sadəcə, çalışmaq lazımdır
ki, aparılan təbliğat nəticəsində onların
sıraları bir qədər də genişlənsin. Milli dəyərlərə
önəm verən təşkilatlara şərait yaratmaq və
onları stimullaşdırmaq lazımdır. Unutmaq olmaz ki,
sözügedən gənclər milli-mənəvi dəyərlərin
daşıyıcılarıdır və onların üzərinə
böyük iş düşür. Bu nöqteyi-nəzərdən
müasir gənclik 20 Yanvarı bir qəhrəmanlıq məktəbi
kimi qəbul etməlidir.
Vətənə,
torpağa bağlılıq kimi qəbul etməli, onun
azadlığı uğrunda aparılan mübarizə kimi dəyərləndirməlidir.
Mənə elə gəlir ki, milli mənlik şüurunun gənclərə
aşılanması istiqamətində təbliğat-təşviqat
işləri ciddi şəkildə aparılmalıdır.
Lazım gələrsə, bu genişmiqyaslı kampaniya formasında
olmalıdır. Bütün çətinliklərə
baxmayaraq, Azərbaycanda milli-mənəvi dəyərləri
aşılayan sistem formalaşdırılmalıdır. Ailə
tərbiyəsindən tutmuş, təhsil müəssisələrinin
timsalında qabarıq şəkildə bu özünü
göstərməlidir. Bir daha qeyd edim ki, gənclərin
timsalında milli-mənlik şüurunun yaşadılması
təbliğatdan keçir".
Vidadi ORDAHALLI
Bakı
xəbər.- 2012.- 17 yanvar.- S. 15.