Binəqədi rayonunun sosial-iqtisadi inkişafı: real vəziyyət və perspektivlər

Cəmi bir neçə il öncəyə kimi Bakının Binəqədi rayonunun adı çəkiləndə göz önündə ərazicə böyük, lakin elə özü boyda da problemlərlə dolu bir inzibati ərazi canlanırdı. Problemlərin çoxluğundanmı, maliyyənin yetərincə ayrılmamasındanmı, yoxsa məmur laqeydliyindənmi, bu rayon Bakının ümumi inkişaf tempindən bir qədər geridə qalması ilə diqqət çəkirdi.

Yetərincə ciddi problemlərin sanki üst-üstə qalaqlandığı rayonun icra orqanları və cavabdeh strukturlarının bir çox idarələr kimi mətbuata qapalı olması isə bu problemlərin və onu doğuran səbəblərin ictimailəşdirilərək diqqət mərkəzinə gətirilməsinə, beləliklə də çatışmazlıqların aradan qaldırılması yönündə media qurumlarının üzərinə düşən vəzifənin yerinə yetirilməsinə əngəl törədirdi. Səbəb, təbii ki, bəlli idi - həllini gözləyən problemlər, şikayətçi sakinlər, bütün bunlara cavabdeh qurumların barmaqarası münasibəti... Mətbuata qapalılıq isə ortada real fəaliyyətin ya qismən, ya da yetərincə olmamasından xəbər verir. Axı qurub-yaradan, cavabdehlik daşıdığı sahədə uğurlara imza atan şəxs bu uğurlarını hər zaman sərgiləməyə, gördüyü işlərlə qürur duymağa meylli olur. Elə Binəqədi Rayon İcra Hakimiyyəti kimi...

Dinamik inkişaf və rayonun qış mənzərəsi

Çox sevindirici haldır ki, artıq bir neçə ildir rayonda illərlə həllini gözləyən yol, kanalizasiya, istilik sistemləri, su, rabitə sahəsində insanların hər gün rastlaşdığı və onun normal yaşamına təsir edən sosial problemlərin bir çoxu haqqında keçmiş zamanda danışırıq. Ötən yazılarımızda rayon ərazisinin böyük bir tikinti meydançasını xatırlatdığını yazmışdıq və bunun müsbət və mənfi tərəflərini qeyd etmişdik. Müsbət tərəf, təbii ki, rayonda infrastrukturun yenilənməsi, aparılan abadlıq-quruculuq işləri sayəsində rayon mərkəzi və qəsəbələrin günbəgün simasını dəyişərək gözəlləşməsi, çəkilən yeni yolların göz oxşaması idi. Mənfi tərəf isə bu işlərin bir qədər ləng aparılması, bunun da sakinlərin gündəlik həyatına göstərdiyi təsir idi ki, bu gün artıq bu iki cəhət arasında balansın müsbətə doğru xeyli dəyişdiyinin şahidi olmaqdayıq. Əslində rayonun bir çox əraziləri yenə də tikinti meydançasını xatırladır, lakin əvvəlki illərdən fərqli olaraq, bu gün bu mənzərədə pozitiv bir dinamika hiss olunur, sanki hər tərəfdə işlər daha sürətlə və daha keyfiyyətli aparılır. Səbəb bəllidir: Bakının ümumi inkişaf tempindən geri qalmamaq və ölkə rəhbərliyinin rayonun yenidənqurulmasına göstərdiyi maddi və mənəvi etimadı doğrultmaq. Elə Prezident İlham Əliyevin cari il aprel ayının 22-də imzaladığı "Bakı şəhəri Binəqədi rayonunun sosial-iqtisadi inkişafının sürətləndirilməsinə dair əlavə tədbirlər haqqında" Sərəncamı da məhz bu etimadın bariz nümunəsidir. Bu Sərəncamın tələblərindən irəli gələrək, hazırda rayonun Xocasən və Biləcəri qəsəbələrində qəsəbədaxili yolların əsaslı təmiri və yenidənqurulması həyata keçirilir. Sözügedən qəsəbələrdə icrası davam etdirilən infrastrukturun yenilənməsi tədbirləri sırasında qəsəbələrin ərazisində əsas yollara çıxan yolların asfalt örtüyünün yenilənməsi həyata keçirilir ki, qış fəslinin yağıntıları öncəsi bu işlərin istər sürücülərin, istərsə də piyadaların rahatlığı baxımından əhəmiyyəti böyükdür. Ümumilikdə sözügedən iki qəsəbənin ərazisinə 12 min 200 kvadrat metr asfalt örtüyü döşənib ki, təkcə bu rəqəm bütün rayon ərazisində yol infrastrukturu üzrə yerinə yetirilən fəaliyyətin masştabını təxmin etməyə imkan verir. Bunun davamı olaraq daha 12 min 800 kvadrat metr yola asfalt örtüyünün döşənməsi planlaşdırılır.

Qışdan söz düşmüşkən, rayonun qəsəbələrinin təbii qazla təchizatına da diqqət yetirmək yerinə düşər. Rayon İcra Hakimiyyətinin rəsmi saytının məlumatına görə, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində ümumilikdə rayon ərazisində 15992 p/m qaz xətti çəkilib, hazırda isə rayonun Binəqədi, Sulutəpə, Xocasən və Rəsulzadə qəsəbələri, eyni zamanda 6-cı və 7-ci mikrorayonların ərazisində əhalinin qaz təchizatının yaxşılaşdırılması məqsədilə mövcud qaz xətlərinin yenidənqurulması ilə yanaşı, 63 yeni qaz xəttinin çəkilişi də həyata keçirilir. Rayonun istilik təchizatına gəldikdə isə, 4 mövcud qazanxananın modernləşdirilərək qazlaşdırılması ilə yanaşı 1 yeni qazanxananın da tikintisi həyata keçirilir ki, bununla da rayon ərazisində yaşayış evlərinin qızdırılması sahəsində ciddi irəliləyişə nail olunacağı şübhə doğurmur. Görülən işlərə paralel olaraq məhəllədaxili istilik xətlərinin bərpasının da sözügedən sahədə mövsüm xarakterli problemlərin çözümünə şərait yaradacağını deyə bilərik.

Eyni sözləri rayonun elektrik enerjisi ilə təchizatı ilə də bağlı deyə bilərik. Belə ki, bu sahədə həyata keçirilən əməli işlər sayəsində əhalinin qış aylarında elektrik enerjisi ilə bağlı Rayon İcra Hakimiyyətinə ünvanladığı şikayətlərin sayı minimuma endirilib.

Həllini gözləyən problemlər də az deyil, lakin...

Lakin görülən işlərlə yanaşı, rayonda həllini gözləyən problemlər də yetərincədir. Bu da, əsasən, aparılan tikinti işləri ilə bağlıdır. Belə ki, rayonun bəzi ərazilərində köhnə tikililər sökülsə də, onların yerində inşası nəzərdə tutulan obyektlərin tikintisi bir qədər yubanır. Buna misal olaraq rayonun 7-ci mikrorayon adlanan yaşayış sahəsində illər öncə "Bolluq bazarı" adını almış alış-veriş mərkəzinin, artıq xeyli müddətdir sökülməsinə baxmayaraq, yerində hansısa inşaatın getməməsini göstərə bilərik. Bu isə yaxınlıqda müasir standartlara uyğun inşa olunmuş çoxmərtəbəli modern yaşayış binalarının ümumi ansamblına xələl gətirməklə yanaşı, həm də söküntünün nəticəsi olaraq ərazidə quru havalarda toz-torpağın, yağmurlu havada isə palçığın insanların gediş-gəlişinə əngəl törətməsinə, sakinlərin diskomfort yaşamasına gətirir. O cümlədən, metronun "Azadlıq prospekti" stansiyasının çıxışından sözügedən əraziyə qədər uzanan yaşıllıq zolağının bərpası, buna paralel olaraq, yaşıllıq zolağı boyunca uzanan, Mərkəzi Seçki Komissiyasının binasının qarşısından keçən işlək yolun asfalt örtüyünün aylardır qaşınmasına baxmayaraq, onun yenidən asfaltlanması çoxdan həllini gözləyən problemlərdəndir. Lakin təbii ki, rayon ərazisində son illərdə görülən işlərin masştabına nəzər salınarsa, bu fəaliyyətin fonunda deyilən məsələlər çox kiçik görünür və sırası gəldikcə hər bir iradın çözüm tapacağına şübhə yoxdur.

Binəqədi RİH - "�urnalistlərin dostu" olsunmu?

Mətbuatla əlaqələrə gəldikdə isə, yəqin jurnalist həmkarlarım da razılaşar ki, bu gün Bakıda Binəqədi Rayon İcra Hakimiyyəti kimi mətbuata açıq ikinci icra strukturu yoxdur. O üzdən əminliklə demək olar ki, rayon icra hakimiyyətləri arasında da "�urnalistlərin dostu" nominasiyası üzrə müsabiqə təşkil olunarsa, birmənalı şəkildə onun qalibi Binəqədi Rayon İcra Hakimiyyəti olar. Hətta istərdim bu bir təklif olaraq qiymətləndirilsin, çünki belə bir nominasiyanın təşkili, məncə, çox gözəl nəticələrə yol açar, sağlam bir rəqabət mühiti yaradardı ki, bu da ümumi işin tempinə - paytaxtın daha sürətlə abadlaşmasına gətirərdi. Axı rəqabət olan yerdə inkişaf var. Binəqədi RİH-in İctimai-siyasi şöbəsinin mətbu orqanlarla apardığı iş - rayon ərazisində tikilib istifadəyə verilən, təmir və bərpa olunan müxtəlif təyinatlı obyektlərin Prezidentin iştirakı ilə açılışlarından tutmuş müxtəlif mədəni, ictimai və sosial tədbirlər barəsində onların mütəmadi bilgiləndirilməsi təqdirəlayiq olmaqla yanaşı, həm də digər icra strukturlarına örnək olası bir yenilikdir. Faktdır ki, sözügedən şöbə,təmsil etdiyim qəzet də daxil olmaqla, paytaxtda fəaliyyət göstərən xeyli sayda mətbu orqana istər Rayon İcra Hakimiyyətində, istərsə də RİH-in təşəbbüsü və başçılığı ilə rayon ərazisində baş tutan bütün tədbirlər haqqında press-reliz göndərir, beləliklə də həm Bakı sakinlərinin rayon miqyasında görülən işlərdən xəbərdar olmasına, həm də bizlərə apardığımız missiyada yardımçı olur. Bu isə paytaxt sakinlərinin sözügedən rayonda aparılan məqsədyönlü fəaliyyətdən vaxtında xəbər tutmasına və eyni zamanda, mətbuatın işinin yüngülləşməsinə səbəb olur. O üzdən Binəqədi RİH-in məmur-mətbuat ünsiyyətinin daha rahat və səmərəli forması kimi tətbiq etdiyi bu yeniliyi digər paytaxt rayonlarının da həyata keçirməsi yaxşı olardı.

Rayon rəhbərliyi novatorluğu ilə digərlərinə örnək ola bilər

Ümumiyyətlə, bu rayonun İcra Hakimiyyətinin öz novatorluğu ilə seçildiyi faktdır. Dediklərimizə ən bariz nümunə isə Rayon İcra Hakimiyyətinə müraciət formasının elektronlaşdırılmasıdır. Sakinlərin Müraciəti Xidməti adlandırılan 1646 elektron xidmət növü İcra Hakimiyyətinin saytında cari ilin fevral ayının 6-dan Rayon İcra Hakimiyyəti başçısının müvafiq Sərəncamı ilə fəaliyyətə başlayıb. Bu xidmətin üstün cəhətləri isə onun sakinlərin rayon rəhbərliyinə şikayət və sorğularının ünvanlanmasına daha rahat şərait yaratmaqla icra strukturlarına müraciətin əlçatanlığını təmin etməsidir. Faktdır ki, bu yenilik Rayon İcra Hakimiyyətinin binasında bu zamana qədər qəbul günlərində yaşanan əsəbi gərginlik, uzun növbələr kimi halların ümumi işin tempinə ziyan vurma perspektivini heçə endirir, normal iş ahənginin saxlanması fonunda şikayət və ərizələrin baxılmasını təmin edir. Məmur-vətəndaş ünsiyyətinin çox unikal forması kimi düşünülmüş bu yeniliyin daha bir üstünlüyü burada hər bir müraciətin diqqətə alınaraq müvafiq şöbəyə yönləndirilməsindən sonra onun arxivləşdirilməsidir ki, bunun da nəticəsində mübahisəli məsələlərin ortaya çıxma perspektivi sıfıra enir. Şikayət vərəqəsi vətəndaşın müraciətində qeyd olunan problem tam çözümünü tapana kimi nəzarətdə saxlanır, çözüm sonrası isə vətəndaşla əlaqə saxlanaraq onun nəticə ilə bağlı mövqeyi dinlənir ki, bu da vətəndaşların məmnunluq səviyyəsinin müəyyən olunmasında əhəmiyyətli rola malikdir. Maraqlı olanı isə bu üslubun eyni zamanda hesabatlılıq prinsipinə əsaslanmasıdır. Belə ki, daxil olan zənglər, edilən müraciətlər qeydiyyata alındığı kimi, verilən cavabların, göstərilən xidmətlərin də qeydiyyatı aparılır ki, bu da icra strukturlarının fəaliyyətində şəffaflığın təmin olunmasını təmin edir.

Son söz əvəzi

Yazının əvvəlində Bakının Binəqədi rayonunu böyük bir inşaat meydançasına bənzətmiş, bunun mənfi və müsbət tərəflərinə nəzər salmışdıq. Ərazisinin böyüklüyü nəzərə alınarsa, rayon ərazisində hələ uzun illər inşaatın gedəcəyi şəksizdir. Təbii ki, insan amili olan yerdə problemlərin bitməsi mümkün deyil. Əsas olanı da bu işlərin nə zaman bitəcəyi deyil, onun hansı sürət və keyfiyyətlə aparılacağıdır. "Görünən dağa nə bələdçi" atalar sözü prizmasından çıxış etsək, əminliklə deyə bilərik ki, az qala hər gün simasını dəyişərək yenilənən, göz oxşayan abad əraziyə çevrilən bu rayon çox keçmədən Bakının mərkəzindən seçilməyəcək. Bunu biz demirik, əlahəzrət reallıq deyir. Bizə isə bu yolda rayon rəhbərliyinə yalnız uğurlar diləmək qalır, Vətəninin hər qarışının gülüstana çevrilməsini kim istəməz ki?..

Samirə SƏFƏROVA

Bakı xəbər. - 2013.- 9 dekabr.- S.10.