Nizami rayonunun sosial-iqtisadi inkişafı: real vəziyyət və perspektivlər

Dünya yaranandan insan oğlu qurub-yaratmaqdan yorulmur, doymur. Sanki hər açılan səhəri bir yeniliklə tarixə yazmaq istəyir. Bakını yenidən quran, şəhərin gözəlliyi, təmizliyi üçün əlindən gələni edənlər də bu məqsədə xidmət edir. Paytaxtın Nizami rayonu da yenidənqurmadan qıraqda qalmayıb. Rayon günü-gündən dəyişir, əyninə geydiyi yeni libas onu daha da füsunkar, cəlbedici göstərir.

Nizami rayonunda davamlı olaraq həyata keçirilən tikinti-quruculuq layihələri sakinlərin problemlərinin həllinə, onların rahatlığına, komfort şəraitdə yaşamasına yönəlib. Hesab edirik ki, rayon ərazisində aparılan yenidənqurma və abadlıq işləri Nizami rayonu yaxın gələcəkdə şəhərimizin ən tərəqqi edən yaşayış ünvanlarından biri kimi nəinki sakinlərin, hətta qonaqların da diqqətini öz üzərində cəmləyəcək.

Nizami rayonu ərazisində yalnız respublika və paytaxt əhəmiyyətli deyil, dünya miqyasında xüsusi çəkisi olan Bakı Olimpiya Stadionunun tikilməsi böyük bir hadisədir. Doğrudur, hələ Stadion tam hazır deyil, stadionda quruculuq, təmir işləri davam etdirilir. Bilirik ki, əsası 6 iyun 2011-ci ildə qoyulan stadion paytaxtda öz müasir tikinti üslubu ilə fərqlənir və hesab edirik ki, tam hazır olduqdan sonra dünyanın ünlü stadionları ilə rəqabətə girmək iqtidarında olacaq. Rayon ərazisində AFFA tərəfindən 20000 tamaşaçı tutumuna malik müasir tipli stadionun inşa olunması rayonda hətta beynəlxalq yarışların keçirilməsinə perspektiv yaratmış olur.

Əlbəttə, 2015-ci ildə paytaxtımızda keçirilməsi planlaşdırılan Olimpiya Oyunları Nizami rayonu ərazisində start götürəcək. Bu rayonun adı idman tarixinə özəl bir ad olaraq yazılacaq. Bu da bəllidir ki, rayonun inkişaf konsepsiyasında idmanın inkişafına da xüsusi diqqət yetirilir. İnşası başa çatmayan Olimpiya stadionu öz yerində, bundan başqa rayon ərazisində fəaliyyətdə olan 5 stadion, 6 idman-sağlamlıq kompleksi, İxtisaslaşdırılmış Olimpiya Ehtiyatları Uşaq-Gənclər İdman Məktəbi əhalinin gənc kəsiminin sağlam həyat tərzinin qarantı kimi çıxış edərək sakinlərin daha sağlam həyat sürməsinə zəmin yaradır.

Nizami rayonunda elə müsbət göstəricilərə rast gəlinir ki, başqa rayonlarda onun bənzəri yoxdur. Nizami rayonu Bakının o rayonlarındandır ki, burada əhalinin istiliyə olan tələbatı lazımı səviyyədə ödənilir. Nizami rayonu ərazisində aparılan abadlıq işləri özünü yalnız tikinti sahəsində göstərmir. Bu, həyətlərin, parkların təmirində, eləcə də təhsil və səhiyyə müəssisələrinin yenidən qurulmasında təzahür edir... Bu ilin yay aylarında Nizami rayon 17 saylı Uşaq Sahə Poliklinikasında həyata keçirilən əsaslı təmir işlərindən də aydın görmək olar ki, rayon rəhbərliyi uşaqların sağlam mühitdə müalicəsində maraqlıdır. Bu uşaq poliklinikasının çoxdan bəri idi ki, təmirinə ciddi ehtiyac vardı... Dəfələrlə bu tibb ocağında olduğumuz üçün deyə bilərik ki, bina yararsız vəziyyətdə idi, yağış yağanda sel-su tavandan dəhlizə tökülürdü. Bu da, istər-istəməz, valideynlərdə narahatlıq yaradırdı... Ancaq bu gün bu poliklinika təmirə cəlb edilib, hazırda burada yenidənqurma işləri aparılır. Nizami rayonunda təhsil müəssisələrinin, uşaq bağçalarının da təmirinə ciddi fakir verilir. Sanki Nizami rayonu öz qarşısına elm və təhsil sahələrinin daha da inkişaf etdirilməsi məqsədini qoyub. Sakinlərlə söhbətimiz zamanı məlum oldu ki, Nizami Rayon İcra Hakimiyyəti rəhbərliyi sakinlərin rifahı naminə çalışır. Hazırda Nizami rayonu təhsil sahəsində nəinki digər rayonlardan geri qalmır, hətta bəzilərindən öndə gedir. Əgər 2009-cu ildə rayon üzrə ali məktəblərə qəbul olunanlar 48 faiz təşkil edirdisə, 2013-cü ildə bu güstərici 59,8 faizə yüksəlib. Bundan başqa, 2009-2013-cü illərdə 10 məktəb "Ən yaxşı ümumtəhsil məktəbi", 33 müəllim isə "Ən yaxşı müəllim" müsabiqələrinin qalibi olub. Göstərilən müddətdə məktəblilərin hərbi-vətənpərvərlik tərbiyəsinin artırılması istiqamətində tədbirlər də həyata keçirilib. Belə ki, "kahin" hərbi-idman oyunlarında rayonu təmsil edən komanda iki il ardıcıl olaraq həm şəhər, həm də respublika mərhələsinin qalibi kimi birinci yerə layiq görülüb. Bütün bunlar rayonun həyatında müsbət bir hadisədir və sakinlər bu məsələlərə çox həssas münasibət sərgiləyirlər. Rayon sakinləri deyir ki, Tahir Budaqov Nizami Rayon İcra Hakimiyyətinin başçısı vəzifəsinə gəldikdən sonra rayonda uşaq və yeniyetmələrin asudə vaxtının səmərəli keçirilməsinə daha böyük şərait yaradılıb. Bundan başqa, sakinlər bildirir ki, son iki-üç ildə həyətlərdə uşaqların oynaması üçün müxtəlif əyləncə avadanlıqları, yelləncəklər, sürüşkənlər quraşdırılıb, mini stadionlar, meydançalar yaradılıb. Artıq uşaqlar yelləncəyə minmək üçün parklara üz tutmur, həyətdə təhlükəsizlik şəraitində istədiyi şəkildə əylənir. Oğlan uşaqları isə kiçik meydançalarda heç bir maneə ilə qarşılaşmadan futbol oynayır. Bakının bir çox rayon və qəsəbələrində binaların həyətində uşaq meydançaları olmadığı halda, T.Budaqov Nizami rayonunun hər yaşayış yerində balalarımıza belə gözəl şərait yaradıb. Bir də valideyn və uşaqların rayon ərazisində ən çox zövq aldığı dövlət bayrağımızın (Nizami Rayon İcra Hakimiyyətinin bayrağı Bakı şəhər rayonları icra hakimiyyətləri arasında ən böyük bayraqdır. Onun hündürlüyü 60 metrdir-İ.S) rayon icra hakimiyyəti qarşısında vüqarla, əzəmətlə dalğalanmasıdır. Rayon ağsaqqallarının sözlərinə görə, uşaq və yeniyetmələr bayrağı kitabdan, televizordan sevə bilməz, bayrağımızın göyün ənginliklərində dalğalanması uşaqların qəlbində üçrəngli bayrağa böyük bir sevgi, ehtiram, sadiqlik heykəli ucaldır. Bayrağa hörmət və əbədi sevgi uşaqlarımızı daha aydın sabahlara aparacaq. Bu sevgi müqəddəs və saf bir sevgidir. Nizami rayon İcra Hakimiyyətinin qayğısı nəticəsində kimsəsiz, valideyn himayəsindən məhrum uşaqların həyat şəraiti günü-gündən yaxşılaşır. Ata-ana sevgisinin nə olduğunu bilməyən, bu hissi yaşamaq nəsibi olmayanlara İcra Hakimiyyəti sahiblik edir. İcra Hakimiyyəti Şərifli küçəsində "Gənclər evi" inşa etdirib. Azərbaycan "Sos" Uşaq Kəndləri Assosiasiyası öz himayəsində olan 17 nəfər yeniyetməni köçürüb. 2011-ci ildə Azərbaycan "Sos" Uşaq Kəndləri Assosiasiyası öz himayəsində olan 19 nəfər yeniyetməni bu "Gənclər Evi"nə yola salıb. Buranın hər bir şəraiti olan evlə heç bir fərqi yoxdur desək, yanılmarıq. Bircə burada doğma ata-ana nəfəsi, qardaş-bacı addımlarının səsi gəlmir. Bu evin sakini olan qızların ata-anası dövlət, dost-sirdaşı bənzər tale yaşadıqları həmdəmləridir. Layihənin əsas hədəfi müxtəlif təlim və seminarlarda iştirak edən yeniyetmə və gənclərin hər hansı bir sənətə, peşəyə, ixtisasa yiyələnməsi, əmək fəaliyyətinə başlaması və ilkin gəlir əldə etməsi üçün şərait yaratmaqdır. Valideynsiz uşaqların yaşaması, həyatını davam etdirməsi üçün Nizami rayonunda tikilən "Gənclər Evi" də T.Budaqovun təşəbbüsü ilə yaradılıb. Nizami rayonunda uşaq və gənclərin tərbiyəsinə xüsusi önəm verilir. Belə ki, bu iş yalnız valideynlərin və təhsil müəssislərinin ixtiyarında deyil, buna İcra Hakimiyyəti də ciddi diqqət yetirir. Araşdırıb öyrəndik ki, artıq Nizami rayonunda uşaq əməyinin istismar olunması, şagirdlərin dərsdən yayınması məsələləri də öz həllini tapıb. İcra Hakimiyyətində yeniyetmə və uşaqların fəaliyyətinin izlənməsi, onlarla məşğul olunması üçün Yetkinlik Yaşına Çatmayanların İşləri və Hüquqlarının Müdafiəsi Komissiyası polis əməkdaşları ilə birgə uşaq əməyinin istismarının qarşısının alınması istiqamətində davamlı reydlər keçirib. Tarixə nəzər salsaq görərik ki, 2011-ci ildə uşaq əməyindən istifadə ilə bağlı iki fakt aşkar edilərək yerində araşdırılıb və o uşaqların valideynlərilə, özlərilə profilaktik söhbətlər aparılaraq onlar təhsilə qaytarılıb. Əslində bu müsbət hadisə başqa valideynlərin də belə səhvə yol verməməsi üçün bir nümunə olub. Uşaq və yeniyetmələrin əməyindən istifadə edən valideynlərin mövcudluğu adamda nifrət hissi yaradır. Azərbaycanda təhsilin məcburi olduğunu, nədənsə, bəzi valideynlər dərk etmək istəmir. Bəlkə onun təhsildən ayırdığı həmin uşaq gələcəkdə elm sahəsinə, mədəniyyətə, dövlət quruculuğuna, hərbi sahəyə böyük fayda verə bilər, Amma o, uşağının gələcəyini nəzərə almadan onu bir parça çörək arxasınca küçələrə ötürür. Nə yaxşı ki, Nizami Rayon İcra Hakimiyyəti kimi qurumlar uşaqların küçələrə düşüb müxtəlif vasitələrlə pul qazanmasının qarşısını alan tədbirlər görür. Nizami Rayon İcra Hakimiyyəti, eyni zamanda, uşaqların pis vərdişlərə aludə olmasına qarşı da kampaniya keçirir. Qurum siqaret, narkomaniya, spirtli içki kimi uşaq və yeniyetmələrin əxlaqını, sağlamlığını zədələyən məhsullardan istifadənin zərərlərilə bağlı vaxtaşırı profilaktik tədbirlər görür, kampaniyalar keçirir.

Nizami rayonunda olarkən Qara Qarayev metrosu ətrafında yaşayan sakinlərdən bir xahiş eşitdik. Onlar bildirdi ki, "Təbriz" (keçmiş "Sevinc") Kinoteatrının yerləşdiyi parkın yenidən qurulmasına böyük ehtiyac var. Bu parkın uzun illərdən bəri təmirsiz olduğunu deyən sakinlər bildirdilər ki, burada uşaqların oynaması, yaşlı sakinlərin istirahəti üçün heç bir şərait yoxdur. Sakinlərin sözlərinə görə, bu parkın yenidən qurulması, abadlaşdırılması rayonun inkişafına xidmət edən amillərdən biri olardı. Sakinlər hesab edir ki, parkın təmirilə bağlı rayon rəhbərliyi müvafiq tapşırıq verəcək.

Nizami rayonunda bir neçə parkın olduğu bəllidir... "Koroğlu" metrosu ətrafında salınan yeni park da onlardan biridir, ancaq bu parkda uşaqların əylənməsi üçün heç bir şərait yoxdur... Odur ki, sakinlər ümid edir ki, "Təbriz" Kinoteatr binasının yerləşdiyi park əsaslı təmirə cəlb ediləcək...

Nizami rayonu paytaxtın inkişafa doğru gedən rayonlarından biri kimi gündəmdədir. Düşünürük ki, görülən işlər sadaladıqlarımızla və sadalamadıqlarımızla bitmir, hələ qarşıda görüləcək çoxlu işlər, həll növbəsi gözləyən qayğılar var. Ümid edirik ki, rayon rəhbərliyi növbəti ildə də rayonin sosial-iqtisadi inkişafına önəm verəcək və sakinlərin ürəyindən xəbər verən işləri həyata keçirəcək... Yeni ildə yeni uğurlarını gözləyirik Nizami rayonu, uğurlar!!!

İradə SARIYEVA

Bakı xəbər.-2013.-12 dekabr.-S.11.