Nizami rayonunun sosial-iqtisadi inkişafı: real vəziyyət və perspektivlər

Paytaxtımızın Nizami rayonunun yaradılması ruhu və cismi ilə doğma Azərbaycana, ədəbi irsi ilə bütün dünyaya məxsus olan dahi Nizami Kəncəvinin adını əbədiləşdirmək üçün mərhum Prezident Heydər Əliyevin hələ SSRİ dövründə-1980-ci ildə milli maraqlarımıza xidmət edən qərarlarından biri idi. Həmin vaxtda N.Kəncəvinin adına çoxsaylı küçə, məktəb, kitabxana, kolxoz və s. qurumlar olsa da, fəqət, bu qərar həm də mütəfəkkiri özününküləşdirmək-farslaşdırmaq istəyən dairələrə tutarlı cavab idi.

Nizami rayonu sosial-iqtisadi inkişaf yolunda

Ərazisi 19,6 kv.km, əhalisi 1 oktyabr 2013-cü il tarixinə 191830 nəfər olan Nizami rayonu hazırda Bakı şəhərinin inkişaf etmiş sosial-iqtisadi, biznes, təhsil, inzibati mərkəzlərə və müxtəlif təyinatlı infrastruktura malik ərazi vahidlərindən biridir.

Nizami rayonu paytaxtın ən kiçik rayonu olmasına baxmayaraq, burada əhalinin sıxlığı kifayət qədər yüksəkdir. Məncə, bunun səbəblərindən biri də burada vətəndaşların işlə təmin olunması istiqamətində RİH-nin apardığı məqsədyönlü siyasətdir desək, yanılmarıq. Rayonun iqtisadiyyatının formalaşmasında istehsal sahələri və xidmət sektoru mühüm rol oynayır. Hazırda burada "Bakı Yağ Qida" fabriki, müxtəlif növ şokolad məmulatları istehsal edən "Ulduz" şokolad fabriki, dəmir-beton məmulatları istehsal edən "Azərtunelmetrotikinti" SC-nin DBK zavodu, "Körpü Tunel" ATSC, neft məhsulları istehsal edən Heydər Əliyev adına Bakı Neft Emalı Zavodu və s. istehsal müəssisələri fəaliyyət göstərir.

Bakı şəhəri və rayonların hərtərəfli inkişaf etdirilməsi üzrə dövlət proqramlarını uğurla həyata keçirən Nizami Rayon İcra Hakimiyyətinin fəaliyyəti əsasən sosial yönümlüdür. Və bu tamamilə təbiidir. Çünki müstəqil Azərbaycan dövlətinin əsas prioriteti xalqa xidmət etmək - ölkə vətəndaşlarının rifah halını yaxşılaşdırmaq, aztəminatlı əhalinin sosial müdafiəsini yüksəltmək, yeni iş yerləri açmaq, vətəndaşların sağlamlığının keşiyində dayanmaq, elm, maarif və təhsilin keyfiyyətini yüksəltmək, quruculuq-abadlıq işləri aparmaq və yaşıllıqlar salmaq, minimum əməkhaqqı məbləğini artırmaq və s. tədbirləri davamlı həyata keçirməkdir.

Fəaliyyətini bu istiqamətdə quran Nizami RİH keçən illərdə olduğu kimi, bu ilin 9 ayı ərzində də yeni uğurlara imza atıb. Belə ki, cari ilin yanvar - sentyabr aylarında rayonda orta aylıq əməkhaqqı 436,4 manat olub. Həmin dövrdə 1450 yeni iş yeri açılıb. Ümumiyyətlə, 2003-cü ildən bu günədək 22914 yeni iş yeri açılıb ki, bunun da 22817-ci daimidir. Qeyd edek ki, 9 ay ərzində rayonda fəaliyyət göstərən Məşğulluq Mərkəzində 549 nəfər işaxtaran qeydə alınıb. Onlardan 446 nəfəri işlə təmin olunub. Bakı Biznes Universitetində keçirilən Əmək Yarmarkasında 5 nəfər işə götürülüb. Bu dövrdə 53 nəfərə işsizlik statusu verilib, 57 nəfərə isə işsizlik müavinəti təyin olunub. 9 ay müddətində Nizami Rayon Əhalinin Sosial Müdafiəsi Mərkəzində 3352 ailəyə ünvanlı sosial yardım təyin edilib. Hazırda bu Mərkəzdən 4044 ailə ünvanlı sosial yardım alır. Bundan başqa, rayon ƏSMM-nin sosial məişət xidməti sektorunda 480 nəfər tənha və kimsəsiz qocalara, əlillərə evlərində sosial və məişət xidməti göstərilir. Təqdirəlayiq haldır ki, bu xeyirxah işdə yerli bələdiyyələr fəal iştirak edir. Bunu həmin qurumların dəstəyi ilə Q.Qarayev 66 ünvanında yerləşən xeyir-şər evində imkansız ahıllara yemək verilməsi də sübut edir.

01 oktyabr 2013-cü il tarixində isə bilavasitə rayon İH-nin təşkilatçılığı ilə Heydər bağı park-bulvarda Beynəlxalq Ahıllar Günü münasibətilə ahıllar arasında stolüstü oyunlar keçirilib, iştirakçıların hamısı mükafatlandırılıb.

2012-2013-cü tədris ilində rayonun orta ümumtəhsil məktəblərini 1828 şagird bitirib. Onlardan 961 nəfəri ali məktəblərə daxil olub. Bu il tədris müəssisələrində beynəlxalq əlaqələrin inkişaf etdirilməsi, müəllim heyətinə optimal şəraitin yaradılması, təhsilin keyfiyyətinin artırılmasında da uğurlar qazanılıb. Belə ki, 220 saylı məktəb-lisey Avropa Şurasının ölkələrarası əməkdaşlıq layihəsinə qoşulub. Rayon ərazisində yerləşən tibb müəssisələri davamlı olaraq əhaliyə tibbi xidmət göstərir ki, bu da bir sıra infeksion xəstəliklərin sayını kəskin surətdə azaldıb. 2013-cü ilin 9 ayı ərzində rayonun təhsil və səhiyyə ocaqlarında Dövlət Proqramına uyğun olaraq təmir işləri aparılıb, yenidənqurma və əlavə korpusların tikintisi həyata keçirilib.

Bu ilin noyabr ayında Heydər Əliyev Fondunun prezidenti Mehriban Əliyevanın iştirakı ilə Fond tərəfindən E.Süleymanov küçəsi 120a ünvanında inşa edilən Daun Sindromlu Şəxslərin Reabilitasiya Mərkəzinin açılması isə rayonun ictimai həyatında mühüm hadisələrdən biri kimi yadda qaldı.

Rayonda su, qaz, kanalizasiya, işıq və istilik təsərrüfatlarının işi yaxşılaşdırılıb.

Ordu sıralarına çağırışın vəziyyəti və gənclərin hərbi vətənpərvərlik ruhunda tərbiyəsi ilə bağlı görülən işlər rayon İH-nin daim nəzarəti və diqqət mərkəzində olub. Belə ki, hesabat dövründə çağırışla əlaqədar Səfərbərlik və Hərbi Xidmətə Çağırış üzrə Dövlət Xidməti Bakı şəhəri Nizami rayonu idarəsinə verilən plan-tapşırıq müvəffəqiyyətlə yerinə yetirilib.

2013-cü ilin üç rübündə RİH-nə sakinlərdən 1453 ərizə daxil olub. Ərizələrdə əsasən mənzil, tikinti, torpaq, məişət problemləri, maddi yardım və digər məsələlərə toxunulub. Vətəndaşların İcra Hakimiyyətinə operativ müraciət etməsi üçün "qaynar xətt" - 422-10-01 nömrəli telefondan istifadə olunur. RİH-nin saytı bu əlaqələrin daha da genişləndirilməsinə şərait yaradıb. Bununla yanaşı, İH sakinlərin qəbuluna da xüsusi diqqət ayırır. Mövcud problemlərin, sakinlərin sosial əhəmiyyətli sifarişlərinin, tələb və təkliflərinin öyrənilməsi məqsədilə ayda iki dəfədən az olmayaraq yerlərdə RİH başçısının sakinlərlə səyyar görüşləri keçirilir. Cari ilin 9 ayı ərzində keçirilən 19 səyyar görüşdə 92 müraciətə baxılıb. Bununla yanaşı, 153 vətəndaş bilavasitə RİH başçısı tərəfindən Aparatda qəbul edilib.

Nizami RİH ölkə KİV-i ilə sıx əməkdaşlıq edən azsaylı yerli icra orqanlarından biridir. Bunu 19 noyabr 2013-cü il tarixdə (üçüncü dəfə) İH-nin "Yerli icra hakimiyyəti orqanları ilə kütləvi informasiya vasitələri arasında əməkdaşlığın inkişaf etdirilməsi" mövzusunda keçirilən konfrans da sübut edir. Qeyd edək ki, konfransda çıxış edən rayon İH-nin başçısı Tahir Budaqov gələcəkdə də media ilə sıx əməkdaşlıq edəcəyini bəyan etdi.

Həlli gözlənilən işlər

Göründüyü kimi, sadalanan və sadalanmayan xeyirxah işlər Nizami Rİ-nin son 3-5 ildəki uğurlarıdır. Ərazidəki park, istirahət yerləri, yaşıllıq zolaqları, abadlıq-quruculuq işləri sakinlərlə yanaşı biz jurnalistləri də sevindirir. Təqdir olunası haldır ki, rayon rahbərliyi görülən işlərlə kifayətlənməyib, hər hesabatında problem və nöqsanların həll edilməsi yollarını gəstərir. Biz artıq hər hesabatdan sonra bu nöqsanların həll olunduğunu görürük. Ərazini gəzərkən bu nöqsan və problemlərin bəziləri ilə biz də əyani tanış olduq. Belə ki, Keşlə dəmir yolu istiqamətində yerləşən bəzi sənədsiz yaşayış binalarının taleyi hələ də açıq qalmaqdadır. Bakı metropoliteninin "Xalqlar dostluğu" stansiyası yanında fəaliyyət göstərən və Heydər Əliyev adına parkla üzbəüz yerləşən eyniadlı yarmarka müasir tələblərə cavab vermədiyi kimi, həm də parkın ümumi görünüşünə kölgə salır. Hesab edirik ki, bu bazarın əvəzinə həmin yerdə müasir ticarət mərkəzi tikilərsə, o, Heydər Əliyev parkını daha gözoxşayan etməklə yanaşı, sakinlərin həmin yarmarkadan daha səmərəli istifadəsinə şərait yaradar. Nizami rayonunda bəzi küçələrin, məsələn, müxtəlif saylı 10-a yaxın Köndələn və Uzununa adlı küçələrin adlarının dəyişdirilməsinə də ehtiyac var. Qeyd edək ki, bu küçələrin adlarının dəyişdirilməsi elə bir vəsait də tələb etmir.

Lakin bu nöqsanlar RİH-nin məqsədyönlü, davamlı fəaliyyətinə, görülən abadlıq-quruculuq işlərinə heç vəchlə kölgə sala bilməz. Şübhəsiz ki, bu nöqsanları hamıdan daha çox rayon rəhbərliyi görür, bilir və ümidvarıq ki, İH yaxın vaxtlarda bu problemləri də uğurla həll edəcək. Bu inam RİH-nin yaxın perspektivdə hədəflədiyi işlərə start verməsindən doğur.

Perspektivlər

RİH bu ilin sonuna qədər qarşıya qoyulan vəzifələrin icrası istiqamətində işləri yekunlaşdırmaq üzrədir. Qeyd edək ki, bu işlərin bəziləri ümumşəhər infrastrukturu ilə əlaqəlidir. Məsələn, Şərifli, E.Süleymanov və Rüstəmov küçələrinin kəsişməsində tunel yolunun tikintisi; Babək prospektində yeraltı keçidlərin tikintisinin başa çatdırılması və s. İH öz imkanları hesabına ilin sonunadək 8-ci km yarımstansiyasından 7 saylı paylayıcı qurğuyadək 2 dövrəli hava xəttinin kabelləşdirilməsini, Keşlə qəsəbəsində su təchizatının yaxşılaşdırılmasını, istismar müddəti başa çatmış liftlərin dəyişdirilməsi, Heydər Əliyev bağı park-bulvarın C.Naxçıvanski küçəsindəki hissəsinin əsaslı şəkildə yenidən qurulması və digər işləri yekunlaşdırmaq üçün bütün imkanlarını səfərbər edib. Artıq rayonda beynəlxalq standartlara cavab verən Bakı Olimpiya Stadionunun tikintisi və ATS 421/422-nin müasir texnologiya əsasında rekonstruksiyası işləri yekunlaşmaq üzrədir. Rayonun Əhalinin Sosial Müdafiəsi Mərkəzinin əhaliyə müxtəlif növ sosial xidmətlərin təqdim edilməsi istiqamətində gördüyü tədbirlər də tamamlanmaq üzrədir.

Beləliklə, Nizami rayonundakı sosial-iqtisadi inkişafla əyani tanışlığımız, rastlaşdığımız problemlərin İH-nin diqqət mərkəzində olması və perspektivə hədəflənən səylər göstərir ki, bu rayon müstəqil Azərbaycanın inkişafı naminə layiqli töhfələr verəcək. Və jurnalist olaraq biz də əminik ki, Nizami Rİh keçən illərdə olduğu kimi, bu il də qarşıya qoyulan vəzifələrin öhdəsindən layiqincə gələcək. Bu məsul işlərlə yanaşı, RİH hazırda Prezident İlham Əliyevin tapşırığı ilə "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın hazırlanması ilə əlaqədar təkliflər paketi hazırlayır. Bu tapşırıqların yerinə yetirilməsində Rayon İcra hakimiyyətinə uğurlar arzulayırıq.

Vaqif CƏLİLOĞLU

Bakı xəbər.-2013.-18 dekabr.-S.12.