Qaradağ rayonunun sosial-iqtisadi inkişafı: real vəziyyət və perspektivlər

Məlumdur ki, Prezident İlham Əliyevin xüsusi diqqət mərkəzində saxladığı vacib məsələlərdən biri də sosial-iqtisadi inkişafı şərtləndirən, müasir dövrün tələblərinə cavab verən islahatların aparılmasıdır. Ölkədə uğurla həyata keçirilən sosial-iqtisadi siyasətin başlıca hədəfləri isə sərbəst bazar münasibətlərinə və özünüinkişaf qabiliyyətinə malik sosialyönlü, diversifikasiya olunmuş milli iqtisadiyyatın formalaşdırılması və dünya təsərrüfat sisteminə inteqrasiyanın təmin edilməsidir.

Bu baxımdan Prezidentin imzaladığı «Azərbaycan Respublikasının regionlarının sosial-iqtisadi inkişafı Dövlət Proqramı», «Azərbaycan Respublikasının məşğulluq strategiyası», «2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı» və digər sərəncamları xüsusi əhəmiyyət kəsb edir.

Sözsüz ki, bu sərəncamların uğurla yerinə yetirilməsində ərazisi 1080 kv.km., əhalisi 114671 nəfər olan Qaradağ rayonunun da xüsusi rolu var.

Ötən doqquz ayın yekunlarına əsasən, rayon üzrə sənaye məhsulunun ümumi həcmi 447,0 milyon, nəqliyyat sektorunda xidmətlərin həcmi 8,7 milyon manat olub. Sosial-iqtisadi sahələrin inkişafı üçün bütün maliyyə mənbələri hesabına 403,7 milyon manat investisiyadan istifadə edilib. İqtisadiyyatın aparıcı sahəsini təşkil edən neft və qaz sənayesi müəssisələrində 430,0 min ton xam neft və 653,3 milyon kubmetr təbii qaz hasil olunub. Rayon üzrə 1,4 milyon ton sement, 97,2 min ton mişar daşı istehsal edilib. Hesabat dövründə rabitə xidmətlərinin həcmi 1,7 milyon, pərakəndə əmtəə dövriyyəsi 1,4 milyard, əhaliyə göstərilən pullu xidmətlər isə 84,7 milyon manat olub. Ötən dövr ərzində rayonda orta aylıq əməkhaqqı 765,0 manat olub.

Cari dövrdə əhalinin məşğulluğunun artırılması və ehtiyacı olan işsiz vətəndaşların ixtisasına uyğun işlə təmin edilməsi istiqamətində Rayon İcra Hakimiyyəti tərəfindən bir sıra məqsədyönlü işlər görülüb. Rayon Məşğulluq Mərkəzi ilə birgə əhalinin məşğulluğunu təmin etmək məqsədilə mütəmadi olaraq qəsəbələrdə səyyar əmək yarmarkaları keçirilib. Bundan əlavə, «BP-Azərbaycan» Şirkətinin təşkilatçılığı ilə Səngəçal qəsəbəsində həyata keçiriləcək yeni layihələrlə bağlı «Azfen», «Tekfen» şirkətləri ilə birlikdə Sahil qəsəbəsində işə qəbulla əlaqədar mütəmadi tədbir keçirilir.

Ümumiyyətlə, rayonda doqquz ay ərzində 1086 yeni iş yeri açılıb.

Əhalinin və sosial obyektlərin enerji daşıyıcıları və kommunal xidmətlərlə təminatının yaxşılaşdırılması istiqamətində xeyli işlər görülüb. Belə ki, ötən doqquz ayda rayonun elektrik enerjisi ilə təchizatının yaxşılaşdırılması üçün 6 ədəd yeni kompleks transformator məntəqəsi quraşdırılıb, 144 ədəd transformator məntəqəsində profilaktik təmir işləri aparılıb, 61,2 min metr müxtəlif diametrli kabel və hava xətləri çəkilib. Mövcud qaz təchizatının yaxşılaşdırılması, qaz təsərrüfatının təhlükəsiz istismarının təmin edilməsi məqsədilə müxtəlif diametrli 16,7 min p/metr mövcud qaz xətti yenisi ilə əvəz edilib. Doqquz ayda əhali tərəfindən istehlak olunan elektrik enerjisinin dəyəri 104, təbii qazın dəyəri 101, su və kanalizasiya xidmətinin dəyəri 96.8, istilik enerjisinin dəyəri isə 104 faiz ödənilib. Hesabat dövründə əhalinin içməli su təchizatının və kanalizasiya xidməti ilə təminatının normallaşdırılması üçün bir sıra işlər görülüb. Belə ki, ötən dövr ərzində Qaradağ Sukanal İdarəsi tərəfindən 45 min p/metr yeni su xətti çəkilib, 4 min p/metr müxtəlif diametrli su xətti dəyişdirilib. Hər il olduğu kimi, 9 ay ərzində də rayonun bütün qəsəbələrində iməciliklər təşkil edilib. Ərazilər mütəmadi təmizlənir, müxtəlif növlü ağac və bəzək kollarına aqrotexniki qulluq göstərilir. Məişət və istehsalat tullantılarının yığılması və daşınması sahəsində də bir çox işlər görülüb.

Hazırda rayonda abadlıq-quruculuq işləri aparılmaqdadır. Qəsəbələrarası və məhəllədaxili küçə və yollar yenidən qurulur. Müasir işıqlandırma sistemi quraşdırılır. Əhalinin mədəni istirahətini təmin etmək məqsədilə yeni parklar, nümunəvi məhəllələr salınır, xeyir-şər evləri tikilir.

Qaradağ rayonunun Qurd qapısı tərəfindən olan girəcəyi və Bakı-Astara (Qazax) magistral avtomobil yolunun rayonun inzibati ərazisindən keçən hissəsində 3 hektar ərazinin abadlaşdırılması işləri başa çatdırılıb və Qobustan qoruğuna gedən yol yaşıllıq zolaqlarının salınması üçün tam hazır vəziyyətə gətirilib. Ötən doqquz ay ərzində rayon ərazisində ümumilikdə 42 min 621 kv.metr ot və yaşıllıq sahələri salınıb, 10 mindən artıq gül, 12 mindən artıq müxtəlif növ ağac və bəzək kolları əkilib.

Rayon ərazisində olan yollara və məhəllədaxili həyətlərə ötən doqquz ay ərzində 51 min kv.m. asfalt döşənib. Qobustan qəsəbəsində yerüstü keçid inşa edilib və əhalinin istifadəsinə verilib.

Qaradağ rayonunda ekoloji sabitliyin qorunması, ətrafda olan göllərin qurudulması müvafiq Dövlət Proqramı əsasında həyata keçirilməkdədir.

Qaradağ rayonu ərazisində ötən doqquz ay ərzində təhsil, mədəniyyət sahələri üzrə də bir çox işlər görülüb.

Belə ki, Dövlət Proqramına əsasən, təhsil sahəsi üzrə 8 körpələr evi - uşaq bağçasında əsaslı təmir işləri yekunlaşıb, 2 uşaq bağçası üçün yeni bina və 2 məktəb üçün isə əlavə tədris korpusu tikilib.

7 nömrəli Bakı Peşə Məktəbi üçün yeni binanın tikintisi başa çatdırılıb.

Hesabat dövründə rayonda səhiyyənin inkişafı, əhalinin sağlamlığının qorunması, tibbi xidmətin səviyyəsinin yüksəldilməsi üçün də xeyli işlər görülüb.

Azərbaycan Respublikasının Prezidenti cənab İlham Əliyevin tapşırığına uyğun olaraq, respublikamızın bütün bölgələrində olduğu kimi, Qaradağ rayonunda da 18 yaşından yuxarı əhalinin tibbi müayinədən keçirilməsi uğurla başa çatdırılıb.

Hesabat dövründə sakinlərin asudə vaxtının təşkili istiqamətində də əməli tədbirlər görülüb. Bu istiqamətdə musiqi məktəbləri və mədəniyyət işçilərinin, yaradıcı kollektivlərin iştirakı ilə Novruz bayramı, Gül bayramı və Milli Qurtuluş Günü ilə əlaqədar rayonda mütəmadi maraqlı tədbirlər təşkil olunur.

Müvafiq Dövlət Proqramına əsasən, 26 may 2014-cü il tarixində Müşfiqabad qəsəbəsində mədəniyyət evinin əsaslı təmirdən sonra təntənəli açılışı olub. Eyni zamanda, Lökbatan qəsəbəsindəki 9 nömrəli musiqi məktəbi üçün yeni binanın inşası başa çatdırılaraq istifadəyə verilib. Qızıldaş mədəniyyət mərkəzinin tikintisi isə davam etdirilir.

Hesabat dövründə dövlət gənclər siyasətinin layiqincə həyata keçirilməsi, yeniyetmə və gənclərlə işin təkmilləşdirilməsi Rayon İcra hakimiyyətinin diqqət mərkəzində olub.

Hazırda Ələt, Puta və Səngəçal qəsəbələrində mini futbol meydança və idman zallarının, Qobustan qəsəbəsində idman zalının tikintisi davam etdirilir. Sahil qəsəbəsindəki «Gənclər evi»nin tikintisi isə başa çatdırılıb.

Erməni təcavüzünə məruz qalan qaçqın və köçkünlərlə iş, onların məişət problemlərinin həlli də, təbii ki, İH-nin gündəlik diqqətindədir. Belə ki, burada məskunlaşan sakinlər üçün istifadəyə verilən kottec tipli fərdi yaşayış evlərinə qaz xətti çəkilib. Onların yaşadığı binalar təmir edilib. Ehtiyacı olan məcburi köçkün ailələri ünvanlı sosial və digər yardımlarla təmin edilib.

Perspektivlər

Hazırda Ələt qəsəbəsində Beynəlxalq Dəniz Limanının inşası uğurla davam etdirilir. Puta qəsəbəsində Metanol zavodunun tikintisi isə başa çatdırılıb və açılışa hazır vəziyyətdədir. Qeyd edək ki, bu zavod nəinki respublikamızda, eləcə də Cənubi Qafqazda ən nəhəng özəl müəssisələrdən biri olacaq. Rayonun Səngəçal qəsəbəsində Neft-Qaz Emalı və Neft-Kimya Kompleksinin salınması üçün 1875 hektar yer ayrılıb. Bu kompleksdə təqribən 2000 nəfər işlə təmin olunacaq. Həmin ərazidə yeni yaşayış massivləri salınacaq, parklar, otellər, idman meydançaları, mədəni istirahət yerləri və digər yeni sosial obyektlər inşa ediləcək, əhalinin yaşayışı üçün yüksək səviyyəli müasir standartlara uyğun şərait yaradılacaq. Beləliklə, rayonun sosial-iqtisadi sahəsində xüsusi yeri olan bu müəssisələrin mövcud sənaye obyektlərilə birlikdə istismarı Qaradağ rayonunu yaxın gələcəkdə ikinci Bakıya çevirəcək.

«2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»na əsasən, əhalinin təhlükəsizliyini təmin etmək məqsədilə rayonun qəsəbələrində sel sularının qarşısının alınması üçün kanalların çəkilməsi nəzərdə tutulub. Bundan əlavə, baş verə biləcək fövqəladə halların qarşısının alınması zamanı operativ tədbirlərin həyata keçirilməsi məqsədilə Səngəçal qəsəbəsində yanğına qarşı yeni su hovuzunun tikintisi, Lökbatan, Sahil və Qobustan qəsəbələrinin ərazisində yanğına qarşı mövcud su hovuzunun təmiri, Qaradağ Rayon Dövlət Yanğından Mühafizə Hissəsinin yanğından mühafizə bölməsinin tikintisi də Tədbirlər Planına salınıb.

Artıq Sahil, Səngəçal və Müşfiqabad qəsəbələrində Dövlət Yanğından Mühafizə hissəsinin yanğından mühafizə bölmələrinin açılışı olub. Çeyildağ və Ələt qəsəbələrində isə müvafiq qurumların tikintisi yekunlaşıb. Burada son tamamlama işləri aparılır. Hazırda Qobustan qəsəbəsindəki körpələr evi-uşaq bağçasında əsaslı təmir işləri davam etdirilir. Heydər Əliyev Fondunun təşəbbüsü ilə rayonun 3 qəsəbəsində yeni uşaq bağçasının tikintisi nəzərdə tutulub və artıq 2 qəsəbədə bu işlərə başlanıb.

2016-cı ildən Səhiyyə Nazirliyi tərəfindən 23 nömrəli Birləşmiş Şəhər Xəstəxanasının ərazisində uşaq poliklinikası üçün yeni binanın inşası nəzərdə tutulub. Qobustan qəsəbəsindəki 17 nömrəli Birləşmiş Şəhər Xəstəxanası və Lökbatan qəsəbəsindəki yeni müasir xəstəxana binalarının inşası isə başa çatdırılıb və hazırda burada tamamlama işləri aparılır. Yaxın perspektivdə nəzərdə tutulan işlərdən biri də məişət tullantılarının müntəzəm yığılması, kanalizasiya sisteminin yaxşılaşdırılması olacaq. Qeyd edək ki, idarəetmənin plüralizm, şəffaflıq və demokratikliyini təmin etmək məqsədilə Rayon İcra Hakimiyyəti başçısı yanında daimi şura fəaliyyət göstərir.

Göründüyü kimi, sadalanan uğurlar, göstərilən rəqəmlər və yaxın perspektivə hesablanan işlər Qaradağ rayonu İH-nin məqsədyönlü fəaliyyətindən xəbər verir. Bu inkişafın ərsəyə gəlməsində isə, şübhəsiz ki, ölkə Prezidentinin, bütün bölgələrdə olduğu kimi, Qaradağ rayonuna da xüsusi diqqət ayırmasıdır. Jurnalist olaraq əminik ki, bu qayğıdan ruhlanan Qaradağ Rİ bizi yeni nailiyyətlərilə sevindirəcək.

Namiq QULİYEV

Bakı xəbər.- 2014.- 19-20 dekabr.- S.15.