Son vaxtlar Azərbaycanda bel ağrılarının artımı müşahidə edilir

Vaqif Verdiyev: "Bel ağrılarının səbəbi odur ki, urbanizasiyaya uğramış böyük şəhərlərin əhalisi, xüsusən imkanlılar..."

"Bel ağrılarının yaranmasında kompyuterin təsiri daha yüksəkdir"

Son illər Azərbaycanda bel ağrılarından şikayətlənənlərin sayı artıb. Bununla bağlı ölkə vətəndaşları arasında müxtəlif fikirlər səslənir. Bel ağrılarının artması müxtəlif faktorlarla əlaqələndirilir. Bəziləri bunu ekoloji amillərlə, digərləri isə oturaq rejimlə əlaqələndirir.

Əhali arasında artan bel ağrılarının başlıca səbəbləri nədir?

Professor Vaqif Verdiyev hesab edir ki, bunun bir sıra səbəbləri var: "Uşaq ana bətnində inkişaf edərkən əlavə fəqərələr, yarım fəqərələr, digər qüsurlar yarana, qabırğaların sayı dəyişib normaldan fərqli ola bilər. Onurğa əyrilikləri içərisində neyrogen deformasiyalar xüsusi qeyd edilməlidir. Sinir sistemində xəstəliyi olan insanların əzələ sistemində balansın pozulması onurğa əyriliklərinə gətirib çıxarır. Neyrofibromatoz nəticəsində skolioz əmələ gələ bilər. Uşaqlıqda əmələ gələn skoliozun müalicəsi də bu dövrdə başlamalıdır. Bel ağrılarının səbəbi odur ki, urbanizasiyaya uğramış böyük şəhərlərin əhalisi, xüsusən imkanlılar hər gün işə maşınla gedir, evə liftlə qalxır, fiziki işlə, idmanla məşğul olmur. Geni dəyişilmiş keyfiyyətsiz, tərkibində ziyanlı maddələr, konservantlar olan qidalardan istifadə edirik. Bütün dünyada məhsuldarlıq artsın deyə gübrələr, nitratlar, nitridlər tətbiq olunur. Bu da insan orqanizminə və onun sümük-oynaq sisteminə, həmçinin onurğaya öz mənfi təsirini göstərir.

Onurğanın degenerativ dəyişiklikləri əsasən insanın həyat tərzi ilə bağlıdır. Daimi hərəkət, idmanla məşğuliyyət belə fəsadların qarşısını alır. Ən faydalı müalicə üzgüçülükdür. Üzgüçülüyün üstün cəhəti odur ki, suda batmamaq üçün bədənin hər iki tərəfi eyni qaydada hərəkətə gətirilir, əzələ sistemindəki balans bərpa olunur. Su insan orqanizminin ağırlığını öz üzərinə götürür, onurğaya heç bir yük düşmür və əzələlər də hər iki tərəfdə eyni rejimdə çalışır.

Kompyuterin təsiri isə daha yüksəkdir. Çox vaxt kompyuterdə çalışarkən qaməti tənzimləmək yaddan çıxır. Göz yorulur, müvazinət pozulur, bel, boyun, döş fəqərələri əlverişsiz vəziyyətdə qalır. Uzun müddət kompyuter arxasında oturanlar bütün onurğanı gücə salır, yükləyir".

Vidadi ORDAHALLI

Bakı xəbər. - 2014.- 4 fevral.- S.14.