Gənclərimizdə əxlaqi keyfiyyətlər və milli şüura onun təsir imkanları...

Mənəvi təmizlik, əxlaq gözəlliyi gəncliyin həyatını rövnəqləndirən, onların xalqa, dövlətə vicdanla xidmət etməsinə vasitə olan bir keyfiyyətdir. Azərbaycanın hazırkı vəziyyətində respublikamıza daha çox vətənpərvər gənclər lazımdır. Milli şüura sahib olan gəncin vətənpərvər olması şübhəsizdir.

Gəncliyin tarixi keçmişə, milli düşüncə, milli adət-ənənələrə sayğı göstərməsi, bu uca dəyərləri qoruyub təbliğ etməsi vacib bir işdir. Mədəniyyətinə, mentalitetinə, ruhuna bağlı gənc istənilən zaman əlinə silah götürüb torpaqlarımızı qorumağa hazırdır. Azərbaycan xalqı tarix boyu çox sınaqla üzləşib, çox ağırlıqları aşırıb, bu çətinliyi dəf etməkdə gəncliyin rolu, əməyi böyük olub. Ekspertlər bildirir ki, gənclərin vətənpərvərlik, dövlətimizə və xalqımıza məhəbbət ruhunda tərbiyə edilməsi ən mühüm vəzifələrdən biridir. Sözsüz ki, gənclərin tərbiyəsində milli adətlərin, böyüyə, kiçiyə hörmətin rolu var, bu onların vətənpərvərlik hisslərinin inkişafına səbəb olur.

Sosioloq Zümrüd Bayramovanın sözlərinə görə, bu gün gənc nəslin nümayəndələrinin vətənpərvərliyi, qeyrəti, təəssübkeşliyi özünü güclü şəkildə büruzə verir: "Gənc nəslin tərbiyəsi, onların milli şüura bağlılığı əsas şərtdir. Gənclərə qəhrəmanlarımız tanıdılır, tariximiz öyrədilir, onlar hər an Vətənin müdafiəsinə hazır olmaq ruhunda tərbiyə olunur, milli dəyərlərimizə zidd təzahürlərə qarşı qətiyyətli mübarizə aparan insanlar kimi formalaşırlar. Deyərdim ki, Qarabağ müharibəsi veteranları ilə gənclərimizin görüşlərinin təşkil olunması, müharibədə fədakarlıq göstərən igidlərimizlə aparılan söhbətlər gənclərin vətənpərvərlik tərbiyəsində xüsusi əhəmiyyət daşıyır. Bütün bunlar vətənpərvərlik hisslərinin aşılanmasında mühüm rol oynayır. Vətənpərvərlik tərbiyəsi və fiziki tərbiyə vəhdət təşkil edəndə daha səmərəli olur. Bu gün gənclərlə iş dövlətimizin siyasətinin əsas məsələlərindən biridir. Gənclərimizin sağlam və vətənpərvər ruhda böyüməsi üçün müxtəlif bölgələrdə idman qurğuları istifadəyə verilir. Dövlətimiz bu sahədə bütün imkanlarından istifadə edir".

Z.Bayramovanın sözlərinə görə, Azərbaycan Respublikasının Prezidenti İlham Əliyevin yeritdiyi məqsədyönlü siyasətin nəticəsidir ki, ölkəmizdə artıq 40-dan artıq müasir tipli Olimpiya İdman Kompleksi tikilib istifadəyə verilib. Onun dediyinə görə, həyata keçirilən tədbirlər Azərbaycan gənclərinin həm fiziki, həm də mənəvi tərbiyəsində, o cümlədən gənclərimizin Vətənə sədaqət ruhunda böyüməsində əvəzsiz rol oynayır: "Gənc nəslin milli mənlik şüurunun inkişaf etdirilməsi və onlarda vətənpərvərlik hisslərinin tərbiyəsi istiqamətində respublikamızın hər yerində lazımi işlər aparılır. Uşaqlarla Vətəni qorumaq və sevməklə bağlı müxtəlif mövzularda söhbətlər edilir. Vətənpərvərlik hissinin yaradılmasında əhəmiyyətli rol oynayan hərbi idman oyunlarının keçirilməsi də təqdirəlayiqdir. Məktəbli uşaqların əsgər forması geyinərək yarışda iştirak etməsi onların bir anlıq özlərini əsgər kimi hiss etməsinə şərait yaradır. Ona görə də belə tədbirlər gənc nəslin vətənpərvərlik ruhunda böyüməsinə öz müsbət təsirini göstərir. Gənclərin hərbi-vətənpərvərlik tərbiyəsi ilə bağlı işlərin forma və üsullarının müxtəlif və rəngarəng olması da əhəmiyyətli rol oynayır. Məsələn, Azərbaycan ordusunun yaradılması günü kimi bayram tədbirlərinə hazırlıq və təntənəli surətdə qeyd edilməsi, hərbi hissələrə, döyüş yerlərinə, qəhrəmanların abidələrinə ekskursiyaların təşkil olunması, Qarabağ müharibəsinin veteranları və milli ordunun nümunəvi əsgərləri ilə görüşlər keçirilməsi gənclərin yaddaşında dərin iz buraxır. Hərbi-vətənpərvərlik mövzularında görüşlər, söhbətlər, ədəbi-bədii gecələr, müzakirələr keçirmək, şəkilli albomlar, fotosərgilər, fotoalbomlar təşkil etmək və s. tədbirlər vətənpərvərlik tərbiyəsində ən təsirli formalardır. Bunlar həyata keçirilən zaman hər bir gənc Vətən qarşısında öz məsuliyyətini başa düşür, Vətəni qorumağa, onu sevməyə bütün varlığı ilə hazır olur. Danılmaz faktdır ki, böyüklərə hörmət, tələbkarlıq prinsipinə əməl etmək, obyektiv olmaq, ləyaqət və humanizm kimi əxlaqi keyfiyyətləri uca tutmaq da gənclərin hərbi-vətənpərvərlik tərbiyəsinə çox güclü təsir göstərir".

Ekspert dedi ki, tarixin Azərbaycan xalqına yaşatdığı ağır illərdə Vətənin cəsur oğulları torpaqlarımızın hər qarışı uğrunda canlarından keçməyə hazır olub. O bildirir ki, Vətən təhlükədə olanda çiyin-çiyinə dayanmaq, səngərdə arxa-arxaya söykənmək ən vacib məsələdir: "Qarabağda baş verən müharibə bir daha göstərdi ki, bu xalq Vətənin başı üzərində qara buludlar toplaşanda birləşməyi bacarır. Doğma torpaqlarımızın azadlığı uğrunda aparılan qanlı döyüşlərdə minlərlə oğul və qızlarımız şəhidlik zirvəsinə ucaldı, öz adlarını qanları ilə tarixə yazdılar. Xalqımızın ədalətli müharibəsində Azərbaycanın bütün bölgələrinin fədakar, vətənpərvər insanları silaha sarıldılar. Düşmənə qarşı aparılan mübarizədə çiyin-çiyinə söykənən oğullarımız göstərdilər ki, Vətən hamımızındır. Bütün bunlarla yanaşı, unutmaq olmaz ki, bu gün yurdumuzun dilbər guşəsi Qarabağ düşmən tapdağı altındadır. Əzəli Vətən torpağının azad edilməsi Azərbaycanımızın ümdə məsələsidir. Bu baxımdan, gənc nəslin hərbi-vətənpərvərlik, Vətənə, dövlətə sədaqət, torpaqlarımızın bütövlüyünün müdafiəsinə hazır olmaq ruhunda tərbiyə edilməsi dövlətimizin hər an diqqətindədir".

Z.Bayramovanın sözlərinə görə, əxlaqi dəyərlərə, milli keyfiyyətlərə, sağlam dini kimliyə bağlı olan gənclərdə vətənpərvərlik hissinin yüksək olduğu bəllidir. Zümrüd xanımın dediyinə görə, gənclərin düzgün yola yönəldilməsi üçün müxtəlif prinsiplər, qaydalar var. Sözsüz olaraq, gənclərimizin hərbi-vətənpərvərlik tərbiyəsi əsas götürülməlidir, götürülür də. Torpaqlarımızın 20 faizdən çoxu erməni qəsbkarlarının işğalı altındadır. 1 milyondan çox qaçqın və məcburi köçkünümüz var. Deyərdim ki, hətta sayı artır. Bu mənada ki, onların ailələri genişlənir, dünən uşaq olanların indi özləri ailə sahibidir. Demək istəyirəm ki, belə bir vəziyyətdə qarşıda duran əsas vəzifələrimizdən biri gənclərimizi düzgün istiqamətləndirmək və onların hərbi-vətənpərvərlik ruhunda tərbiyəsi işinə xüsusi önəm verməkdir. Ölkəmizin hər yerində olduğu kimi, paytaxtımız Bakı şəhərində də bu işə xüsusi diqqətlə yanaşılır. Azərbaycan Respublikasının Prezidenti İlham Əliyevin rəhbərliyi ilə, digər sahələrdə olduğu kimi, gənclərlə iş sahəsində də çoxsaylı dövlət proqramları qəbul olunub və həyata keçirilir".

Barəsində danışılan ekspert dedi ki, dövlət proqramlarında hərbi-vətənpərvərlik tərbiyəsi işinə xüsusi yer ayrılıb. Onun sözlərinə görə, bu baxımdan, bu işlə bilavasitə məşğul olanların üzərinə çox böyük məsuliyyət düşür: "Ölkəmizdə fəaliyyət göstərən ayrı-ayrı təşkilatların əsas məqsədi böyüməkdə olan gənc nəsli bu işə cəlb etməkdir. Yəni gənc nəslin hərbi-vətənpərvərlik tərbiyəsi ölkəmizin siyasətinin əsasını təşkil edir. Mən sevinirəm ki, respublikamızda ən müasir tələblərə cavab verən idman qurğuları tikilərək gənclərin istifadəsinə verilib. Bu idman ocaqları gənc nəslin sağlamlığının qorunmasına xidmət edir. Azərbaycan ordusunun əsasını təşkil edən isə, şübhəsiz ki, gənclərdir. Onların fiziki sağlamlığı Vətənimizin keşiyində dayanmağa imkan yaradır. Qeyd edim ki, gənclərin orduya hazırlığı istiqamətində aparılan işlər alqışa layiqdir. Bu səpkidə keçirilən tədbirlər ictimaiyyət tərəfindən çox böyük razılıqla qarşılanır. Dövlətimizin gənclərə göstərdiyi qayğı onların maddi və mənəvi problemlərinin aradan qaldırılmasına təkan verir. Bütün bunlar isə gənc nəslin vətənpərvərlik tərbiyəsinə müsbət təsir göstərir. Sözsüz ki, məktəblilərin iştirak etdiyi "Cəsurlar" və "Şahinlər" hərbi-idman oyunları bu baxımdan böyük əhəmiyyət kəsb edir. Orduya hazırlaşan gənclərin hərbi-idman oyunlarında iştirakı, onların arasında vətənpərvərlik mövzusunda geniş söhbətlərin aparılması gənclərimizin Vətənin müdafiəçiləri kimi formalaşmasında xüsusi rol oynayır. Dövlətimizin bu sahədə gördüyü işlər hər birimizin ürəyincədir".

Z.Bayramova bildirdi ki, həm qəbul olunan rəsmi sənədlərdə, həm böyüklərin verdiyi qiymətli tövsiyələrdə gənclərin əxlaqi-mənəvi dəyərlərə bağlılıq ruhunda inkişafı göz önünə alınıb. Onun sözlərinə görə, gənclər nə qədər milli kimliyə bağlı olsa, bir o qədər Vətənə yaxın olar: "Gənclərimizin keçmişə münasibəti hər zaman aydın olmalıdır. Bunun üçün də hər zaman tariximiz, adət-ənənələrimiz, folklorumuz, mədəniyyətimiz təbliğ olunmalıdır. Hesab edirəm ki, tariximizi bilməyən gəncin vətənpərvərliyi də bir qədər süni görünə bilər. Çünki gənclik tamam başqa bir ruhda yetişməlidir ki, bu gününə və gələcəyinə sahib dura bilsin. Artıq sağlam ruhlu, sağlam fikirli gənclər bizim aramızda çoxluq təşkil edir. Onlar milli əxlaqi prinsiplərə sadiq olmaqla yanaşı, adət-ənənələrimizə sadiqliklə də seçilirlər. Əlbəttə, sağlam ruh və sağlam düşüncə gənclərin əsas yol yoldaşıdır".

Sosioloqun fikrincə, biz əxlaqi dəyərlərin gənclərin milli mənlik şüuruna və vətənpərvərliyinə hansı formada təsirindən danışırıqsa, onda gənclərin vətənpərvərlik tərbiyəsinin bu məsələdə ən önəmli faktor olduğunu qeyd etməliyik. Təbii, Azərbaycanın gəncləri torpaqlarımızın qorunmasına hər an hazır olmalıdır. Uşaqlarımızın vətənpərvərlik ruhunda böyüməsinə dövlətimiz hər cür şərait yaradıb. Onlarda Vətənə sevgi və dövlətə sadiqlik hissi formalaşdırılır. Düşünürük ki, əxlaqi keyfiyyətlər günü-gündən daha güclü şəkildə gənclərə təbliğ edilməlidir ki, onlar milli mənlik şüuruna daha bağlı olsunlar.

İradə SARIYEVA

Bakı xəbər.-2014.-4 fevral.-S.15.