İstedadlı gənclərə qayğı vətənpərvərlik tərbiyəsinin tərkib hissəsi kimi...

"Prezident təqaüdçüləri"...

Gənclərə qayğı siyasəti özünü çox mükəmməl formada göstərir. Dövlətin həyata keçirdiyi kompleks tədbirlər sayəsində gənclər siyasətinin bütün tələbləri özünü göstərir. Bilirik ki, müasir Azərbaycanın mədəniyyət və incəsənət, ədəbiyyat, təhsil sahəsində xüsusi fərqlənən gənclər Azərbaycan dövləti tərəfindən qayğı ilə əhatə olunub.

Ölkəmiz müstəqil olduqdan sonra cəmiyyətimizdə milli mənlik şüuruna bağlı olan, içində vətənpərvərlik sevgisi yaşadan gənclər nəsli formalaşmağa başladı. O gənclərin potensialı, intellekti, aldıqları təhsil onların Azərbaycan dəyərlərinə daha mükəmməl münasibət bəsləmələrinə əsas verdi.

Son 20 ildə ölkəmizin gənclər siyasəti formalaşmağa başladı. Azərbaycanın mərhum prezidenti Heydər Əliyevin imzaladığı 9 aprel 2002-ci il tarixli "Gənclər Siyasəti haqqında" Azərbaycan Respublikasının Qanununun 6-cı maddəsi istedadlı gənclərə dövlət qayğısı ilə bağlıdır. Burada bildirilir ki, sosial və maddi vəziyyətindən asılı olmayaraq, istedadlı və yaradıcı gənclərin təhsilini davam etdirməsinə dövlət təminat verir. Bu maddənin 6.4. bəndində isə qeyd edilir ki, istedadlı gənclərin həvəsləndirilməsi məqsədilə dövlət və yerli özünüidarəetmə orqanları, hüquqi və fiziki şəxslər xüsusi təqaüd, mükafat və müavinətlər təsis edə bilər. Azərbaycan Respublikasının Prezidenti İlham Əliyevin də imzaladığı çoxsaylı qanun və sərəncamlarda istedadlı gənclərə mükafatların, təqaüdlərin verilməsi öz əksini tapır. Bu gənclər musiqi, təhsil sahəsində öz intellektləri, savadları və istedadları ilə yaşıdlarından seçilənlərdir. Musiqişünas Aybəniz Məmmədli bizimlə söhbətində bildirdi ki, dövlət istedadlı gənclərə hər zaman qayğı göstərir və onların qabiliyyətinin üzə çıxmasına şərait yaradır: " Bir qrup gənc muğam ifaçılarına fəxri adların verilməsi, onların eyni zamanda da təqaüdlə təmin edilməsi faktdır. 2005-ci ildə keçirilən Televiziya Muğam Müsabiqəsində öz istedadlarını nümayiş etdirən bir neçə ifaçıya əməkdar artist fəxri adı verildi. Onların sırasına bu müsabiqənin qalibi, çağdaş Azərbaycan opera səhnəsinin Şah İsmayılı Təyyar Bayramov da vardı. Ondan başqa, istedadlı gənc musiqiçilər tarzən Elçin Haşımov və kamança ifaçısı Elnur Əhmədov da əməkdar artist fəxri adı daşıyırlar. Onlara da Prezident təqaüdü verildiyi bildirilir. 2010-2011-ci illərdə ölkə başçısının sərəncamı ilə respublikanın bir sıra nüfuzlu musiqi məktəblərinin şagirdləri, yəni gənc istedadların bir çoxu Prezidentin xüsusi təqaüdünə layiq görülüb".

A.Məmmədlinin sözlərinə görə, Azərbaycan Respublikasının Prezidenti İlham Əliyevin 2010-cu il 17 sentyabr tarixli Sərəncamı ilə respublikamızın adını ucaldan bir sıra yeniyetmə və gənc ifaçı mükafatlarla təltif edilib. Diqqətimizi həmin sənədə çəkən ekspert bildirdi ki, burada "Azərbaycanda gənc istedadlara dövlət qayğısı haqqında" Azərbaycan Respublikası Prezidentinin 1996-cı il 22 iyun tarixli, 464 saylı Fərmanına uyğun olaraq qərara alınıb: "Musiqi sahəsində xüsusi istedadı olan aşağıdakı şəxslərin adları Azərbaycanın gənc istedadlarının "Qızıl kitabı"na yazılsın və onlar xüsusi aylıq təqaüdə layiq görülsünlər".

A.Məmmədli dedi ki, adları "Qızıl kitab"a yazılan və Prezidentin xüsusi aylıq təqaüdünü alan gənclərin sırasında çox istedadlar var. Onun dediyinə görə,adı "Qızıl kitab"a yazılanlar arasında Sumqayıt Musiqi Kollecinin tələbəsi Əlizadə Fuad Telman oğlu, Bakı şəhər Rauf Hacıyev adına 15 nömrəli Uşaq Musiqi Məktəbinin şagirdi Həsənov Kamil Sənan oğlu, - Bakı şəhər Qara Qarayev adına 8 nömrəli Uşaq Musiqi Məktəbinin şagirdi Hüseynova Nərgiz Ələkbər qızı, Bakı şəhər Leopold və Mstislav Rostropoviçlər adına 21 nömrəli Uşaq Musiqi Məktəbinin şagirdi Mayılov Kənan Eldəniz oğlu, - Azərbaycan Milli Konservatoriyası tərkibində Respublika İncəsənət Gimnaziyasının şagirdi Nəcəfzadə Minirə İlham qızı, Bakı şəhər Leopold və Mstislav Rostropoviçlər adına 21 nömrəli Uşaq Musiqi Məktəbinin şagirdi Ömərli Kamran İmran oğlu, Bakı şəhər Rauf Hacıyev adına 15 nömrəli Uşaq Musiqi Məktəbinin şagirdi Yunusov İsmayıl Səbuhi oğlu da olub. Bakı şəhər Georgi Saroyev adına 35 nömrəli onbirillik Musiqi Məktəbinin şagirdi Əmiraslanov Nəriman Sabir oğlu, Bakı şəhər Tofiq Quliyev adına 12 nömrəli onbirillik Musiqi Məktəbinin şagirdi Həsənov Yasin Etibar oğlu, Bakı şəhər Qara Qarayev adına 8 nömrəli onbirillik Musiqi Məktəbinin şagirdi Həsənova Aygül Elçin qızı, Bakı şəhər Tofiq Quliyev adına 12 nömrəli onbirillik Musiqi Məktəbinin şagirdi Hüseynov Emin Valeh oğlu, - Bakı şəhər Qara Qarayev adına 8 nömrəli onbirillik Musiqi Məktəbinin şagirdi Şahgəldiyeva Mədinə Elçin qızı yuxarıda adları qeyd edilən yaşıdları ilə eyni mükafatları paylaşıblar.

2002-ci ildə Bülbül adına Orta İxtisas Musiqi Məktəbinin skripka sinfinə daxil olan və hazırda bu təhsil ocağında oxuyan, beynəlxalq müsabiqələr laureatı Ceyla Uran qızı Seyidova da Prezident təqaüdçüsüdür. Onun da adı Azərbaycanın gənc istedadlarının "Qızıl kitabı"na yazılıb.

Yeri gəlmişkən, bu məktəbin bir neçə istedadlı şagirdi də adını "Qızıl kitab"a yazdıra bilib və Prezidentin xüsusi təqaüdünə layiq görülüblər. Onlardan istedadlı gənc vokalçı Amil Həsənoğlu və tanınmış tarzən-dirijor Əyyub Quliyevi indi də xatırlayırıq. Onlar kimi saysız-hesabsız gənc və istedadlı musiqiçilərə, ifaçılara ölkə Prezidenti müntəzəm olaraq qayğı göstərir. Bildiyimiz qədər, Heydər Əliyev Fondunun təşəbbüsü ilə keçirilən ikinci televiziya muğam müsabiqəsindən tanıdığımız və öz gözəl səsi ilə ürəkləri riqqətə gətirən Elməddin İbrahimov da Prezidentin xüsusi təqaüdünə layiq görülən istedadlardandır. Azərbaycan Respublikası Prezidentinin xüsusi təqaüdünə layiq görülən və adı "Qızıl kitab"a düşən istedadlarımız kifayət qədərdir. Yeri gəldikcə biz onları sizə təqdim edəcəyik.

A.Məmmədli dedi ki, onlar Azərbaycanın adı ilə öyündüyü istedadlı, intellektli, dəyərli inciləridir: "Yaxşı olardı ki, bəzi KİV-lər öz meydanını ucuz reklam axtaran şou-biznesçilərə deyil, bu istedadlara versin. Onların həm dövlət, həm də xalq qarşısında alınları açıq, üzləri ağdır. Gənc bəstəkarlar, rəssamlar, rejissorlar, aktyorlar, ssenaristlər, şair və yazıçılar, tənqidçilər də bu qayğıdan kənarda qalmayıb. Mərhum prezident Heydər Əliyevin mədəniyyətə, ədəbiyyata, təsviri incəsənətə, kinoya olduqca yaxşı münasibət bəslədiyi hər kəsə məlumdur. O bu sahədə gənclərin daim irəlidə getməsini istəyirdi. Prezidentliyi dövründə Azərbaycan Yazıçılar Birliyinin, Azərbaycan Rəssamlar İttifaqının, Kinematoqraflar İttifaqının, Bəstəkarlar İttifaqının və digər yaradıcılıq qurumlarının üzvləri olan gənc istedadlar birillik Prezident təqaüdünə layiq görülüb. Hətta elə gənc olub ki, mütəmadi olaraq hər il təqaüd alıb. Bu, birbaşa dövlətin gənc nəslə diqqət və arxa-dayaq olmasının təzahürüdür. H.Əliyevin qoyduğu bu ənənə bu gün də davam edir. İstedadlı gənclərə qədir-qiymət qoyulur. Dövlətimiz ali məktəblərə yüksək bal toplayaraq daxil olan gəncləri də yaddan çıxarmayıb. İndiyə qədər onlarla gənc Prezidentin aylıq xüsusi təqaüdünü alıb. Bu gün də almaqdadır. Bu təqaüd gəncləri əlavə problemlərdən azad edir. Onları yalnız qəbul olunduqları ixtisas üzrə bütün bilikləri mənimsəmək maraqlandırır. Bir nüansa diqqətinizi yönəltmək istəyirik. Prezidentin xüsusi təqaüdünü alan tələbələr arasında orta məktəbi bölgələrdə bitirənlər də az deyil. O gənclər heç bir repititor yanına getmədən, özləri müstəqil olaraq ali məktəbə hazırlaşıblar və yüksək balla ölkənin nüfuzlu ali məktəblərinə daxil olublar. Bu fikirləri o tələbələr televiziyada çıxışları zamanı səsləndiriblər.

Prezidentin 1 sentyabr 2011-ci il tarixli Sərəncamı ilə 2011/2012-ci tədris ilində Azərbaycan Respublikasının ali məktəblərinə daxil olmuş 100 tələbə Prezident təqaüdünə layiq görülüb. Onlar müxtəlif ali məktəblərdə ayrı-ayrı ixtisaslar üzrə təhsil alıblar. Yaddan çıxmamış, bir məqamı qeyd etmək istəyirik. Respublikada elə məktəblər var ki, hətta onun bir neçə məzunu Prezident təqaüdü alır". Məlum olduğu kimi, respublika məktəblərinin məzunlarının bir çoxu imtahanlarda fərqlənərək yüksək bal toplayır. Hətta qəbul imtahanlarında 700, 690 bal toplayıb ali məktəblərə yüksək nəticə ilə qəbul olunan gənclər də Prezident təqaüdü alırlar. Bilirik ki, bu vacib nüans gənclərin həyatında mühüm rol oynayır. Dövlət qayğısı ilə əhatə olunan gənclər həm də kifayət qədər vətənpərvər gənclərdir. Bu qayğı onlarda milli mənlik və vətənpərvərlik hissinin yaranmasında, inkişafında mühüm rol oynayır.

Təhsil eksperti Kəmalə Babayevanın bildirdiyinə görə, bir qrup gəncin xüsusi proqramlar çərçivəsində, yaxud başqa yollarla xarici ölkələrdə təhsil alması da dövlətin diqqətində olan məsələdir: " Xaricdə oxuyan tələbələrə dövlət büdcəsindən aylıq təqaüd ayrılır. Bu da onların normal şəraitdə təhsillərini davam etdirməsinə təkan verir.

Prezident İlham Əliyevin Azərbaycan kinosunun inkişafı ilə bağlı imzaladığı Dövlət Proqramına əsasən kinonun müxtəlif sahələri üzrə kadrların hazırlanması önə çəkilir. Bir çox sahələr üzrə mütəxəssislərin hazırlanması Azərbaycanda mümkün olmadığı üçün onların xarici ölkələrə göndərilməsi artıq reallaşıb.

Gənclərimizin bir qismi Moskvada, bir qismi keçmiş Sovet İttifaqı respublikalarında, bir qismi isə Avropada təhsil alır. Bu ənənə musiqi sahəsində də davam etdirilir. Artıq mədəniyyət və incəsənətin bir sıra qolları üzrə mütəxəssislərin hazırlanması xarici ölkələrin o sahələr üzrə ixtisaslaşmış ali məktəblərinə və təcrübəli pedaqoqlarına həvalə edilib. İnanıram ki, həmin gənclər də Azərbaycanımızın işıqlı gələcəyi naminə böyük işlər görəcək. Onların yaratdığı sənət nümunələrində Azərbaycan gəncliyinin milli mənlik şüuru, onların vətənpərvərlik ruhu canlandırılacaq. O yaradıcılıq əsərləri gəncliyi torpağa, milli düşüncəyə bağlayacaq".

İradə SARIYEVA

Bakı xəbər.-2014.-10 fevral.-S.12.