Dövlət büdcəsindən maliyyələşdirilən layihələrin gənclərin milli şüuruna təsiri...

Gənclər hər zaman öz yenilikləri, maraqlı fikirlərilə diqqəti cəlb edir. Gəncliyin enerjisindən doğulan yüzlərlə nümunənin reallığa çevirilməsi üçün böyük dəstəyə ehtiyacı olur. Azərbaycanda bir müddət əvvələ qədər gənc istedadların, gənc ictimaiyyətçilərin həyata keçirmək istədiyi ideyalar maliyyə çətinliyinin yaratdığı problemlər üzündən ya kağız üzərində qalırdı, ya da alayarımçıq şəkildə reallığa çevirilə bilirdi.

Ancaq bu gün şərait tamam başqa cürdür. Demək olar ki, gənclərin fərdi və qrup şəklində həyata keçirmək istədiyi sağlam istiqamətli layihələr maneəsiz üzə çıxa bilir. Bu gün Azərbaycanda Azərbaycan Respublikasının Prezidenti Yanında Gənclər Fondu fəaliyyət göstərir. Əlbəttə, gənclərə dayaq olmaq, onların qolundan tutmaq çox böyük bir işdir. Sosioloqlar bildirir ki, Azərbaycanda belə bir təşkilatın işlək olması gənclərin milli mənlik şüuruna və vətənpərvərlik tərbiyəsinə xeyir verir. Sosioloq Təranə Musalının dediyinə görə, vaxt olub ki, bəzi Azərbaycan gəncləri öz layihələrini hansısa xarici qurumların ayırdığı maliyyə, qrant vasitəsilə həyata keçirib, bu da o gənclərin əxlaqına, mənəviyyatına zərər vurub, onların vətənpərvərlik tərbiyəsinin zəifləməsinə səbəb olub. Bu gənclərin o təşkilatların təsirinə düşüb milli düşüncədən uzaqlaşmaq mövqeyi tutduqlarını xatırladan T.Musalı bildirdi ki, belələrində heç zaman milli şüur işığı olmayıb.

T.Musalının bildirdiyinə görə, respublikamızda Azərbaycan Respublikası Gənclər və İdman Nazirliyinin, Mədəniyyət və Turizm Nazirliyinin, eləcə də Azərbaycan Respublikasının Prezidenti Yanında Gənclər Fondu gənclərin əməlli-başlı dayağına çevriliblər. Bu gün xüsusi layihələr təqdim etməklə gənclər həm təşkilat, həm də fərdi qaydada Gənclər Fondundan qrant ala bilirlər. Yəni layihələri Fondun keçirdiyi müsabiqədə qalib gələrək həyata vəsiqə alır. T.Musalı dedi ki, Azərbaycan Gənclər Fondunun yaradılması gənclərin fəaliyyətinə böyük stimul verir. Onun sözlərinə görə, Azərbaycan Respublikasının Prezidenti yanında Gənclər Fondu Azərbaycan Respublikasının Prezidenti cənab İlham Əliyevin 19 dekabr 2011-ci il tarixli 542 nömrəli fərmanı ilə təsis olunub. Gənclər Fondu gənclər siyasəti ilə bağlı elm, təhsil, mədəniyyət və digər sosial sahələrə yönəlmiş fəaliyyətlərin stimullaşdırılmasını təmin edən qurumdur: "Gənclər Fondu Azərbaycan Respublikasının Prezidenti yanında fəaliyyət göstərir, Gənclər Fondu Azərbaycan Respublikasının Prezidenti cənab İlham Əliyevin 7 iyul 2011-ci il tarixli Sərəncamı ilə təsdiq olunmuş "Azərbaycan gəncliyi 2011-2015-ci illərdə" Dövlət Proqramının həyata keçirilməsi üzrə Tədbirlər Planın 6.1.4-cü bəndinə əsasən yaradılıbdır. Gənclər Fondunun yaradılmasında məqsəd odur ki, gənclər cəmiyyətdə öz yerini tapa bilsin. Gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində məqsədli maliyyələşdirmək, həmin sahədə konfrans, seminar, festival, olimpiada və digər tədbirlərin təşkili üzrə layihələri dəstəkləmək, maddi-texniki bazanın gücləndirilməsinə və müasir tələblərə uyğunlaşdırılmasına yardım etmək Fondun əsas məqsədidir. Gənclər Fondu gənclərin, gənclər təşkilatlarının, eləcə də yerlərdə gənclər siyasətini həyata keçirən dövlət və yerli özünüidarəetmə qurumlarının elmi-tətbiqi, sosial əhəmiyyətli və idarəetmə sahəsindəki innovativ ideyalarını dəstəkləyir, dövlətin və cəmiyyətin inkişafında gənc nəslin təşəbbüskarlığını və iştirakını artırır, ideyaların yaradılması və idarəedilməsində bacarığını stimullaşdırır".

Gənclər Fondunun fəaliyyətini yaxından izlədiyini deyən ekspert bildirdi ki, Azərbaycan Respublikasının Prezidenti yanında Gənclər Fondu, Azərbaycan Respublikasının Gənclər və İdman Nazirliyi, Azərbaycan Tələbələr Birliyi və Gənclər ğzğn Təhsil Mərkəzinin birgə təşkilatçılığı ilə 10 fevral 2014-cü il tarixində, Bakıda "Erasmus+" proqramının təqdimatı keçirilibdir. Bu proqramın gənclər ğzğn əhəmiyyətini qeyd edən sosioloq dedi ki, "Erasmus+" proqramının təqdimatı mərasimə Avropa Komissiyasının Təhsil, Audiovizual və Mədəniyyət üzrə İcraçı Agentliyinin gənclər sahəsində eksperti Maksymilian Fras aparıcılıq edib. Azərbaycan gənclərinin fəaliyyətində mühüm rol oynayan bu proqramın əhəmiyyətindən danışan ekspertin sözlərinə görə, bu tədbirdə Avropa Komissiyasının 2014-2020-ci illəri əhatə edəcək "Erasmus+" proqramının fəaliyyət istiqamətləri, mümkün layihə perspektivləri və Azərbaycan gənclər təşkilatlarının proqram çərçivəsində əldə edə biləcəyi imkanlar barədə ətraflı məlumat verilib: " Həmçinin, tədbirdə Azərbaycan gənclər təşkilatları ilə əlaqələrin yaradılması və gələcəkdə müxtəlif birgə layihələrin icrasını müzakirə edə bilmək üçün təqdimatda İtaliya, Hollandiya, Litva, Ukrayna, Gürcüstan, Türkiyə kimi ölkələrdən ən aktiv gənclər təşkilatlarının rəhbərləri də qonaq qismində iştirak ediblər".

Qeyd edək ki, təqdimatda açılış nitqi ilə çıxış edən Gənclər Fondunun icraçı direktoru Fərhad Hacıyev proqramın əhəmiyyətini önə çəkərək bildirib ki, təxminən 10 il öncə Azərbaycandan olan gənclər təşkilatları Avropaya inteqrasiya etmək üçün məhz Avropanın özündən dəstək almağa çalışırdısa, bu gün artıq onlar Azərbaycanda öz imkanları haqqında məlumat verirlər: "Təbii ki, bu, gənclər siyasəti sahəsində olan uğurlu inkişafdan və əməkdaşlıqdan xəbər verir. Biz çox istəyirik ki, gənclərimiz ölkəmizi əhatə edən bütün sahələrdə aktiv olsunlar. Bu ildən fond tərəfindən gənclər təşkilatları üçün struktur qrantları üzrə müsabiqə elan olunur. Burada əsas şərt isə həmin təşkilatın heç olmasa həyata keçirilmiş 1 beynəlxalq layihəsinin olmasıdır".

Bundan başqa, Azərbaycan Respublikasının Prezidenti yanında Gənclər Fondunun icraçı direktoru, 2015-ci ildə Bakı şəhərində keçiriləcək Avropa Oyunlarının Təşkilat Komitəsinin üzvü Fərhad Hacıyev bildirib ki, qısa müddətdə fəaliyyətə başlamasına baxmayaraq, Gənclər Fondu gənclər arasında kifayət qədər tanınıb: "Yüzlərlə gənc və gənclər təşkilatları müxtəlif ideyalarla, təkliflərlə fonda müraciət edib və dəstək alıblar. Hazırda fond tərəfindən elan olunmuş 3-cü qrant müsabiqəsi icra olunur və 4-cü qrant müsabiqəsində qalib olmuş layihələr start götürür. Maliyyə dəstəyi göstərilən layihələrlə yanaşı, fond tərəfindən də onlarla layihə və tədbir reallaşdırılıb". O qeyd edib ki, müsabiqələr zamanı xüsusilə regionlardan olan gənclərin aktivliyi və yeni təşəbbüslərlə çıxış etməsi sevindirici haldır: "Prezident İlham Əliyev tərəfindən imzalanmış "Azərbaycan gəncliyi: 2011-2015-ci illərdə" Dövlət Proqramına əsasən, regionlarda gənclər evlərinin, gənclər mərkəzlərinin yaradılması, region gəncləri üçün intellektual klubların təsis olunması, region gənclərinin inkişafına yönəlmiş bir sıra layihələrin həyata keçirilməsi bir daha dövlətin gənclərə olan diqqət və qayğısının nümunəsidir".

\ Onun sözlərinə görə, bu günə qədər 4 qrant müsabiqəsi üzrə fonda gənclərdən və gənclər təşkilatından 1507 müraciət daxil olub və onlardan 1021-i maliyyələşdirilib. Fondun icraçı-direktoru qeyd edib ki, müsabiqələr yerli, beynəlxalq, fərdi, səfər qrantları və təşkilati inkişaf layihələri olmaqla 5 kateqoriya üzrə keçirilib":Müsabiqələrdə qalib olmuş və icra edilmiş layihələr Azərbaycanın bütün bölgələrini əhatə edib. Qrant müsabiqələri ilə yanaşı, gənclər il boyu fondun səfər qrantı kateqoriyasına müraciət edərək xarici ölkələrdə keçirilən təlimlərə, seminarlara, tədbirlərə qatılmaq imkanı əldə edə bilirlər".

Bəllidir ki, Azərbaycan Gənclər Fondunun ayırdığı maliyyə çərçivəsində respublika ərazisində həm gənclər təşkilatları, həm də fərdi qaydada çoxlu sayda layihələr, təlim və treninqlər həyata keçirilib. Gənclərin həyatında özəl yeri olan bu tədbirlər onların dövlətə, vətənə bağlanmasında əsaslı rol oynayır.

Gənclər Fondunun dəstəyilə həyata keçirilən layihələr sırasında "İctimai Həyatda Gənclərə Dəstək" İctimai Birliyinin "Həyatımızı sağlam keçirək" layihəsi də var. Artıq layihənin icrası həyata keçirilib. Layihənin məqsədi Azərbaycanın regionlarında (Qazax, Ağstafa rayonları) insanlara sağlam həyat tərzi aşılamaqdır. Narkotiklərdən necə uzaq olmaq, AİDS-in yayılmasına qarşı qabaqlayıcı və profilaktik tədbirlərin həyata keçirilməsi yollarını öyrənmək, mənəvi-əxlaqi tərbiyənin yüksəldilməsini aşılamaq, sağlam yaşamaq üçün dəyərli məlumatlar vermək layihənin məqsəd və vəzifələrinə daxildir.

İctimai Birliyin sədri Vüqar Süleymanlının verdiyi məlumata görə, layihə çərçivəsində Qazax və Ağstafa rayonlarında Gənclər Fondunun əməkdaşı Emil Yusifovun iştirakı ilə təlimlər olub. Təlimlərə rayon gəncləri, orta məktəb şagirdləri, yerli icra strukturlarının nümayəndələri qatılıb.

Gənclər Fondunun maliyyə dəstəyilə Müasir Gənclərin İnkişafına Dəstək" İctimai Birliyi "Mənim ictimai məsuliyyətim" adlı inşa müsabiqəsi elan edib. Müsabiqə Azərbaycan Respublikası Prezidenti yanında Gənclər Fondunun maliyələşdirdiyi "Təşəbbüskar və Kreativ gənclik" layihəsi çərçivəsində həyata keçirilir. Müsabiqə müəyyən edilmiş mövzu əsasında gənclərin yaradıcı düşüncələrini ifadə etmək, bununla da öz fikirlərini və mesajlarını cəmiyyətə çatdırmaq məqsədilə təşkil olunub.

Həyata keçirilən bütün layihələrin bir məqsədi var - Azərbaycan gənliyində milli mənlik şüurunu inkişaf etdirmək, gənc nəslin vətənpərvərlik tərbiyəsinin formalaşmasında rol oynamaqdır. Bilirik ki, gənclərin bu layihələrdə iştirakı, bura qatılmaları onlara böyük fayda verir. Onlar bu layihələrə qatılmaqla özlərini ifadə etməklə yanaşı, həm də bir vətənpərvər, milli uğura sahib olan gənc kimi özlərini təsdiq edə bilirlər.

İradə SARIYEVA

Bakı xəbər.-2014.-17 fevral.-S.12.