İctimai həyatda gənclər təşkilatlarının rolu dövlət siyasəti ilə getdikcə daha çox uzlaşır

Gənclik dövlət siyasətinin mahiyyətini olduğu kimi anlayır desək yanılmarıq. Ekspertlər də bildirir ki, bu gün gənclər dövlətin onlarla bağlı yeritdiyi siyasətin mahiyyətini əsasən düzgün anlayır və zaman keçdikcə bu istiqamətdə görülən daha böyük işlərin şahidi olduqca dövlətin yürütdüyü siyasəti daha çox bəyənir. Bilirik ki, Azərbaycan hakimiyyəti son illər gənclərə verdiyi önəmi bir qədər də artırıb.

Ümumilikdə, get-gedə bu istiqamətdə görülən işlər daha rasional və dinamik xarakter daşıyır. Belə ki, Prezident İlham Əliyevin "Azərbaycan gəncliyi 2011-2015-ci illərdə Dövlət Proqramının təsdiq edilməsi haqqında" Sərəncamında əksini tapan müddəaların uğurlu icrası gənclər siyasətini daha da inkişaf etdirməyə, gənclərin işlə təminatına, sosial-iqtisadi problemlərinin həllinə öz müsbət təsirini göstərəcək. Qeyd edək ki, ölkədə gənclər siyasətinin əsasını ulu öndər Heydər Əliyev qoyub. O, Azərbaycanın gələcəyinin gənclərə məxsus olduğunu önə çəkərək, yüksək ixtisaslı kadrların yetişdirilməsi istiqamətində mühüm addımlar atıb. Minlərlə gəncin keçmiş SSRİ-nin ən nüfuzlu ali məktəblərində təhsil almağa göndərilməsi məhz onun ölkəyə rəhbərlik etdiyi dövrdə olub. O, gənclərin qarşısında bir sıra vəzifələr qoyurdu ki, bunlardan ən ümdəsi ana dilinə hörmətlə yanaşılması, vətənpərvərlik ruhunda tərbiyə olunmaları idi.

Tarixçi Təzəgül Yusifova bildirdi ki, o, uzun illərdir yeniyetmə və gənclərlə işləyir və dövlətin gənclər siyasətini yaxından izləyir. Onun sözlərinə görə, dövlətin yürütdüyü siyasət gənclərə müsbət təsir edir və gənclər burada özünü tam olaraq görür: "Vətənini, xalqını sevən gənc daim dövlətinə xidmət prinsipini fəaliyyətinin əsasında saxlayar. Heydər Əliyev 1993-cü ilin iyununda hakimiyyətə qayıdandan sonra da gənclərə diqqət və qayğı dövlətin siyasətinin əsas tərkib hissəsinə çevrildi. O, müstəqil Azərbaycana rəhbərlik etdiyi dövrdə gəncləri dövlətin idarə edilməsində aparıcı qüvvə kimi görürdü. Bu önəmin nəticəsi idi ki, 1994-cü ildə Prezidentin fərmanı ilə Gənclər və İdman Nazirliyi yaradıldı. Onu da qeyd edək ki, müstəqil Azərbaycan dövlətinin gənclər siyasətinin formalaşmasında və gənc nəslin geniş fəaliyyət meydanına çıxarılmasında ulu öndərin təşəbbüsü və iştirakı ilə keçirilən ölkə gənclərinin I Forumu xüsusi rol oynadı. 1996-cı il fevralın 2-də keçirilən Forum Heydər Əliyevin gəncliklə bağlı strategiyasının ilk təntənəsi oldu. 1997-ci ildə Prezidentin imzaladığı Sərəncamla 2 fevral Azərbaycanda Gənclər Günü kimi elan edildi. Daha sonra 1996, 1999 və 2003-cü illərdə Heydər Əliyevin təşəbbüsü ilə Azərbaycan gənclərinin forumlarının keçirilməsi gənclərimizin fəaliyyətində mühüm dönüş yaratdı. 1999-cu ildə Prezident "Dövlət gənclər siyasəti haqqında" Fərman imzaladı. Həmin sənədə uyğun olaraq təsdiqlənmiş tədbirlər planında gənclər siyasətinin bütün istiqamətləri öz əksini tapdı. Qəbul olunmuş qanun və dövlət proqramları, imzalanmış fərman və sərəncamlar gənc nəslin mütəşəkkil qüvvə kimi formalaşmasına, mənəvi cəhətdən yetkinləşməsinə, sosial problemlərinin həllinə, faydalı məşğulluğunun artmasına, habelə idmanın kütləviləşməsinə təsir göstərdi. Gənclərin hərtərəfli inkişafını təmin etmək məqsədilə hazırlanmış "Gənclər Siyasəti Haqqında" Qanun 2002-ci il tarixli Fərmanla təsdiqləndi. Bir məqamı da qeyd edim ki, son parlament və bələdiyyə seçkilərində gənclərin sözügedən qurumlarda təmsilçilik faizi əhəmiyyətli şəkildə artıb. Belə ki, 2004-cü il bələdiyyə seçkilərində gənclər bələdiyyələrin tərkibində 2-2,5 faiz təmsil olunurdusa, 2009-cu il seçkilərində onların təmsilçilik faizləri 27 faizə çatdırıldı. Gənclərin bələdiyyələrdə iştirak səviyyəsi bələdiyyə təcrübəsi əsasında 10 dəfə artıb. Bu, gənclərimizin ictimai fəallığının artmasından irəli gəlir. Dövlət başçısı İlham Əliyev gənclərin böyük qüvvə olduğunu, Azərbaycanın gələcəyinin onlara məxsusluğunu, eyni zamanda müasir dövrün informasiya-kommunikasiya texnologiyaları əsri olduğunu önə çəkərək, yüksək ixtisaslı gənclərin yetişdirilməsini qarşıya mühüm vəzifə kimi qoyur. Bu məqsədlə təhsil sahəsində kompleks tədbirlər həyata keçirilir".

Tarix müəlliminin dediyinə görə, bu gün məktəblərimizdə hər 20 şagirdə bir kompyuter var. O deyir ki, yeni texnologiyaların öyrənilməsi və tətbiqi ölkənin hərtərəfli inkişafında mühüm amil kimi önə çəkilir: "Dövlət başçısı İlham Əliyev çıxışlarında gənclərin peşəkarlıq səviyyəsinin artırılmasını xüsusi qeyd edir: "Peşəkar kadrların hazırlanması bu gün nəinki təhsil sahəsində, yaxud da ki, hansısa ayrı bir neft-qaz sahəsində, ümumiyyətlə ölkə qarşısında duran ən vacib problemlərdən biridir və biz bütün sahələrdə buna nail olmalıyıq". Azərbaycanın iqtisadi inkişafı reallıqdır. Bu inkişaf səviyyəsi kadr hazırlığını günün tələbinə çevirir. Gənclərə diqqət və qayğı, onların təhsilinin inkişafına yönələn addımlar Azərbaycan Dövlət Neft Şirkətinin də fəaliyyətinin əsas tərkib hissələrindəndir. ARDNŞ 2006-cı ildə Təqaüd Proqramını qəbul edib. Proqram çərçivəsində hər il 50-dən artıq tələbəyə xarici ölkələrin ən nüfuzlu universitetlərində neft ixtisasları üzrə təhsil almaq imkanı yaradılır. Tələbələr Təqaüd Proqramında iştirak etməklə, həmçinin, təhsilini başa vurduqdan sonra ARDNŞ-də ixtisasları üzrə işləmək imkanı əldə edir. Prezident İlham Əliyevin Sərəncamı ilə təsdiqlənən gənclərin xarici ölkələrdə təhsilinə dair Dövlət Proqramı da Azərbaycan gənclərinin intellektual səviyyəsinin artırılmasına xidmət edir. Görülən işlərin davamı olaraq dövlət başçısı 6 aprel 2011-ci il tarixdə "Azərbaycan gəncliyi 2011-2015-ci illərdə Dövlət Proqramı haqqında" Sərəncam imzaladı. Bu sənədə uyğun olaraq 7 iyul 2011-ci il tarixli Sərəncamla Dövlət Proqramının təsdiq edilməsi gənclər siyasətini daha da inkişaf etdirməyə, gənclərin menecment sahəsində fəal iştirakına şərait yaratmağa, gənc mütəxəssislərin işlə təminatına, sosial-iqtisadi problemlərin həllinin təmin edilməsinə xidmət edəcək. Həmçinin, dövlət başçısı müxtəlif sahələrdə uğurlar qazanmış bir qrup gənci və tələbə gənclər təşkilatlarının nümayəndələrini qəbul edərkən Dövlət Proqramında gəncləri narahat edən bütün məsələlərin öz əksini tapacağını bildirib".

Ekspertin fikrincə, müasirləşmə dövlət siyasətinin düzgün qurulmasından və bununla bərabər, gənclərin fəaliyyətindən asılıdır. Onun sözlərinə görə, Azərbaycan gəncləri müasir, Vətənə, millətə bağlı, dövlətçiliyə sadiq olmalı, eyni zamanda, bütün mütərəqqi təcrübələri öyrənməyə səy göstərməlidirlər. T.Yusifova dedi ki, bütün bu deyilənlərin fonunda, ölkədəki gənclər təşkilatları müasir dövrdə aparılan gənclər siyasətinin mahiyyətini dərindən anlayır.

QHT təmsilçisi Təranə Əliquliyevanın sözlərinə görə, son on ildə gənclər təşkilatları Azərbaycanın ictimai-siyasi, mədəni həyatının ayrılmaz bir parçasına çevrilib: "Daha dəqiq desək, ölkənin əsas subyektlərindən birinə çevriliblər. Bu da dövlətin gənclərlə bağlı yeritdiyi dinamik və rasional siyasətdən irəli gəlir. Azərbaycanda vətəndaş cəmiyyəti quruculuğu sahəsində, qanunvericilik planında gedən müzakirələr, qəbul olunan qərarlar bu yöndə işlərin müsbətə doğru getdiyinin göstəricisidir. Eyni zamanda, bu, nəticə etibarilə gənclər təşkilatlarının, QHT sektorunun bəlli bir səviyyəyə gəlib çıxmasına və müvafiq konsepsiya, qanunvericilik aktları əsasında fəaliyyət göstərməsinə gətirib çıxarıb. Digər tərəfdən, gənclər təşkilatları konfederativ qurum kimi də digər QHT-lərdən daha çevik proseslərə qoşulub. Müstəqilliyin ilk illərindən başlayaraq sonrakı təbəddülatlı dövrlərdə belə, gənclər mümkün olduğu qədər fəal mövqe nümayiş etdirib.

Bununla paralel, hər zaman dövlətin, dövlətçiliyin yanında olublar. Bu gün gənclər dövlətin onlarla bağlı yeritdiyi siyasətin mahiyyətini əsasən düzgün anlayır. Yəni sözügedən məsələdə onların fəaliyyətini müsbət qiymətləndirmək olar".

Onun fikrincə, aparılan siyasətin mahiyyətini düzgün anlamayan gənclər də var. O deyir ki, bütövlükdə gənclər təşkilatlarının spektri monoton deyil: "O üzdən, birmənalı şəkildə hamısına eyni sözü aid etmək doğru olmaz. Sadəcə, əsas dəyərləndirmə odur ki, Azərbaycanda öz təşkilatlarını qurmuş gənclərin önəmli hissəsi dövlət və milli maraqlarını mümkün olduğu qədər beynəlxalq səviyyədə müdafiyə etməyə çalışır. Virtual şəbəkələrin timsalında da bunu açıq-aydın müşahidə etmək olar. Bu bir daha gənclərlə bağlı yeridilən siyasətə verilən önəmin sübut olunduğunu göstərir. Bir növ bu, gənclərin milli və vətəndaş missiyasıdır. Ancaq sırf təşkilati mənsubiyyət baxımından gənclik dünyasından çıxış etdikdə isə, təbii ki, gənclərin özünəməxsus dünyası, problemləri var. Zaman-zaman onlar sözügedən problemləri təşkilatlarda, mətbuat səhifələrində və onlayn rejimində dilə gətirirlər. Onu da qeyd edim ki, regionlarda yaşayan gənclərin müasir informasiya-kommunikasiya texnologiyalarına, yeni ixtisaslara yiyələnməsi gündəmdədir. Bu ildən başlayaraq yeni ikinci Dövlət Gənclər Proqramında regionlarda yaşayan gənclərlə bağlı ayrıca maddələr nəzərdə tutulub".

Ekspert dedi ki, hazırda bu maddələrin də icrasına başlanıb. Bölgələrdə gənclər təşkilatlarının işinə böyük təkan verildiyini qeyd edəy QHT təmsilçisinin dediyinə görə, rayon və kəndlərdə yaşayan gənclər də dövlətin gənclər siyasətini yaxından izləyir və anlayır:

"Gənclər siyasəti bütün ölkə gəncliyini əhatə edir. Və gənclər çox yaxşı anlayır ki, dövlət nə edirsə onların xeyrinə, yaxşılığına görə edir. Gənclərin, onların təmsil olunduqları təşkilatların dövlət siyasətinə xidmət etməsi, dövlətin siyasətinə dəstək olması şərtdir. Gənclər də bunu anlayır və buna əməl edir".

İradə SARIYEVA

Bakı xəbər.-2014.-20 may.-S.15.