Azərbaycanda atçılıq turizminin perspektivləri…

Bahadur Bilalov: “Atçılıq turizminin inkişafı istiqamətində əsas iş sahibkarların üzərinə düşür”

At Azərbaycan xalqının həyatında, məişətində, həmçinin, döyüş meydanlarında həmişə əvəzsiz rol oynayıb. Babalarımız at belində düşmən üstünə yürüyüb, zəfər qazanıblar.

Son illər ölkəmizdə qədim tarixə malik atçılıq ənənələrinin bərpasına xüsusi diqqət yetirilir. Azərbaycan Prezidentinin müvafiq Fərmanı ilə 2006-cı ildə Şəki rayonunda Atçılıq Turizm Mərkəzinin yaradılması bu qayğıya bariz nümunədir. Rayonun Daşüz kəndində yerləşən mərkəz 2007-ci ilin fevralından Respublika Atçılıq Turizm Mərkəzinin filialına çevrilib.

Məlumat üçün bildirək ki, aktiv turizm sahələrindən biri də atçılıqdır. Bu turizm növü dünyada geniş yayılıb və gəlir gətirən sahələrdən biridir. Atçılıq turizmi dünyada turistlərin diqqətini ən çox cəlb edən sahələrdən biridir. Bu turizm növünə maraq göstərənlərin sayı ildən-ilə artır. Ölkəmizdə turizmin digər sahələri kimi, atçılıq turizminin də inkişafı üçün kifayət qədər imkanlar var. Azərbaycanın relyefi atçılıq turizmi üçün olduqca əlverişli sayılır. Elə bu səbəbdən ölkə başçısının 2006-cı ilin aprelində imzaladığı Fərmana əsasən, Atçılıq Turizm Mərkəzi yaradılıb. 2007-ci ildən qurum Respublika Atçılıq Turizm Mərkəzi adlanır.

Qeyd edək ki, ölkənin bir sıra bölgələrində atçılıq mərkəzləri fəaliyyət göstərir. Həmin mərkəzlərdə xarici və daxili turistlərə atüstü gəzintilər və milli at oyunları nümayiş etdirilir.

Atçılıq turizminin Azərbaycanda inkişafı və bu sahəyə maraq hansı səviyyədədir?

Turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, atçılıq turizmi ilə bağlı Şəki rayonunda kompleks var. Bu sahənin inkişafı üçün öncə xüsusi atlara ehtiyac var: “Şəkidə bu sahədə lazımi işlər görülür. Ancaq digər regionlarda təşkil olunmuş formada proses həyata keçirilmir. Atçılıq turizmi ilə məşğul olmaq istəyənlərin öncə atları və təlimatçıları olmalıdır. Nəzərə almaq lazımdır ki, hər insan ata minə bilmir. Ata hansı tərəfdən yaxınlaşıb, hansı istiqamətdə minmək önəmlidir. Ata düzgün yaxınlaşmayanda o ürkərək xəsarət yetirə bilir. Bu kimi problemlərin yaşanmaması üçün mütləq təşkilati işləri aparılmalıdır”.

Həmsöhbətimiz hesab edir ki, Sahibkarlara Yardım Fondu vasitəsilə bu iş maliyyələşməlidir: “Nəzərə almaq lazımdır ki, turizmin inkişaf edən və hər zaman tələbat olan sahələrindən biri atçılıqdır. Bu sahənin inkişafı üçün sahibkarların üzərinə böyük iş düşür. Atçılıq turizmi gəlir gətirən sahələrdən biridir”.

Günel CƏLİLOVA

Bakı xədbər.- 2017.- 1 dekabr.- S.15.