Ölkənin bölgə turizmində yüksəliş davam edir

Azər Əliyev: “Xarici turizmin inkişafı daxili turizmlə sıx bağlıdır”

Azərbaycan turizmi artıq inkişaf mərhələsindədir. Son illər bu sektorun inkişafı sahəsində reallaşdırılan uğurlu layihələr öz bəhrəsini verir. İstənilən fəsildə ölkəmizə istirahət üçün gələn turistlərin sayı günü-gündən artır.

Açıqlanan statistik rəqəmlərə əsasən, bu ilin 9 ayı ərzində Azərbaycanda daxili və xarici turistlərin sayı 3,5 milyon nəfər olub. Bu açıqlamanı mədəniyyət və turizm nazirinin müavini Nazim Səmədov Xəzər-Avropa İnteqrasiya İşgüzar Klubunun (CEIBC) üzvləri ilə görüşündə deyib. N.Səmədov qeyd edib ki, bu il ərzində Azərbaycana 2 milyon 271 min xarici vətəndaş gəlib. Gələn turistlərin sayında artım daha çox Rusiya, İran və ərəb ölkələri üzrə müşahidə olunub.

N.Səmədov deyib ki, bu ilin yay aylarında daxili turizm sahəsində 20 faiz artım olub. Yalnız iyun-avqust aylarında regionlarda 860 min nəfər istirahət edib.

Daxili turizmin inkişafını ekspertlər də təsdiqləyir. Onların fikrincə, bu sahədə görülən işlər daxili turizm sektorunda müsbət dəyişikliyə səbəb olub.

Ekspert Azər Əliyev bizimlə söhbətində bildirdi ki, daxili turizmin inkişafı ölkəyə daha çox gəlir gətirir: "Yaxın illər ərzində yerli vətəndaşlar Türkiyə və Gürcüstanda deyil, elə ölkə daxilində istirahət edəcəklər. Sadəcə, qiymət siyasətində dəyişiklik olarsa, bu sahədə yaşanan inkişafın daha da artmasının şahidi olarıq. Onu da deyim ki, qiymətlərin dəyişməsi yeni otellərin inşasına zərurət yaradacaq. Bəllidir ki, son zamanlara kimi Azərbaycanda, demək olar, hostellər yox idi. Artıq Bakıda hostellər daha geniş yayılıb. Hostellər ucuz olduğundan, turistlərin daha çox marağını çəkir. Çünki turist ən çox gəzməyə vaxt ayırır. Onun üçün gecə yatması üçün yer lazımdır. Adətən, bahalı otellərdə beynəlxalq əhəmiyyətli tədbirlərə gələn biznes adamları qalır”.

Həmsöhbətimiz onu da vurğuladı ki, daxili turizmin inkişafı üçün kənd turizminə də diqqət ayırmaq lazımdır: “Bütün kəndlərdə turizm obyekti tikməyə ehtiyac yoxdur. Sadəcə, əhaliyə müəyyən treninqlər keçirilməlidir. Ola bilsin onlara aşağı faizli kreditlər verilsə, evlərinin bir hissəsini turizm obyekti kimi hazırlayaraq turistləri cəlb edə bilərlər. Bu həm də kənd əhalisinin istehsal etdiyi məhsulların satılmasına da müsbət təsir edə bilər. İnsanlar bununla həm də ucuz qiymətə dincəlmək fürsəti əldə etmiş olarlar”.

Ekspertin bildirdiyinə görə, xarici turizmin inkişafı daxili turizmlə sıx bağlıdır. Belə ki, yerli turistlə işləyən personal təcrübə toplayır və xarici turistlərə yüksək keyfiyyətli xidmət göstərə bilir: “Fikrimcə, ölkəyə gələn turistlərin sayının kəskin artırılması üçün kompleks tədbirlərin görülməsi vacibdir. Bəllidir ki, artıq bölgələrimizdə turizm yeni inkişaf etməyə başlayıb və bu, başlanğıc olduğu üçün zamanla hər şey yerini tutacaq. İnkişaf olan hər bir sahədə, təbii ki, çatışmazlıq olacaq. Bu təbii prosesdir. Bu, Türkiyədə də belə olub. Hətta bu gün inkişaf etmiş turizm ölkələrində də xidməti zəif olan obyektlər var".

Günel CƏLİLOVA

Bakı xəbər.- 2017.- 18 oktyabr.- S.12.