“Koroğlu aşığı” İmran Həsənovun 90 illik yubileyi keçirildi

Mədəniyyət Nazirliyinin və Azərbaycan Aşıqlar Birliyinin birgə təşkilatçılığı ilə Rəşid Behbudov adına Mahnı Teatrında Azərbaycan aşıq sənətinin görkəmli nümayəndələrindən biri, XX əsrin “Koroğlu” aşığı, Əməkdar mədəniyyət işçisi, Göyçə və Tovuz aşıq mühitlərinin görkəmli nümayəndəsi aşıq İmran Həsənovun 90 illik yubileyinə həsr edilən tədbir keçirildi.

Tədbir ölməz ustad aşığın repertuarında yer alan və dinləyicilərin sevgisini qazanan ifaların lent yazıları ilə başladı. Sonra Aşıqlar Birliyinin sədri, Əməkdar elm xadimi, professor Məhərrəm Qasımlı çıxış edərək aşıq sənətində İmran Həsənovun oynadığı əvəzsiz roldan danışdı, onun xidmətlərini xatırladı.

M.Qasımlı bildirdi ki, İmran Mehralı oğlu Həsənov 1928-ci ildə Göyçə mahalının Ağbulaq kəndində anadan olub, sonradan Tovuz rayonunda yaşayıb. Gənc yaşlarından aşıqlıq sənətinə meyl edib, bu sənətin sirlərini əmisi aşıq Dünyamalıdan, gədəbəyli aşıq Hüseyn Quliyevdən, göyçəli aşıq Məhərrəm Hacıyevdən, aşıq Hüseyn Dəmirçidən öyrənib. Bununla belə, o, 1950-ci ildə Tovuz rayonuna köçərək ustad aşıqlar - aşıq Əsəd və Mirzədən bəhrələnib. M.Qasımlının sözlərinə görə, zil tembrli səsə malik olduğuna görə ona “Koroglu aşığı” deyiblər.O, 1956-cı ildə Bakı şəhərində keçirilən Ümumrespublika müsabiqəsinin qalibi, 1-ci dərəcəli diplom və qızıl medal, 1957-ci ildə Moskvada keçirilmiş Ümumittifaq müsabiqəsinin qalibi, 1-ci dərəcəli diplom və qızıl medal, 1957-ci ildə Moskvada keçirilmiş tələbə və gənclərin 6-cı Ümumdünya Festivalında rəhbərlik etdiyi aşıqlar ansamblı ilə birlikdə qalib gələrək qızıl medal və 1-ci dərəcəli diplom, 1959-cu ildə Moskvada keçirilmiş Azərbaycanın mədəniyyəti və incəsənətinin ongünlüyündə dəyərli iştirakina görə "Şərəf nişanı" ordeni və Fəxri Fərmanla təltif edilib.

1967-ci ildə Azərbaycan mədəniyyəti və incəsənətində göstərdiyi xidmətlərinə görə “Əməkdar mədəniyyət işçisi” adına layiq görülüb.M.Qasımlı vurğuladı ki, Azərbaycan aşıqlarının III və IV qurultaylarının nümayəndəsi olan Aşıq İmran bir sıra ölkələrdə beynəlxalq festivallarda iştirak edərək Vətənə mükafatla qayıdıb.Klassik aşıq yaradıcılığının mahir bilicisi olan Aşıq İmran həm də bədii yaradıcılıqla məşğul olub. Yubiley ərəfəsində onun “Sənətimin sultanıyam” adlı şeirlər kitabı da işıq üzü görüb.15 dekabr 1999-cu ildə vəfat edən aşıq İmran Həsənovun 80, 85 illik yubileyləri dövlət səviyyəsində qeyd edilib. Azərbaycan klassik aşıq sənətinin son nəhənglərindən biri olan, Azərbaycan Respublikasının Əməkdar mədəniyyət işçisi aşıq İmran Həsənov 7 aşıq havasının yaradıcısı, 2 şeirlər kitabının müəllifi olub. 12 aşığa ustadlıq edib və uzun illər yaşayıb-yaratdığı Tovuz rayonunda aşıqlar ansamblının rəhbəri olub.Aşıq İmran Həsənovun 90 illik yubileyinə həsr edilən tədbirdə Prezident təqaüdçüsü, Əməkdar mədəniyyət işçisi aşıq Mahmud Məmmədov, aşıq Qələndər Zeynalov, “Çeşmə” qrupu, aşıq Altay Məmmədli və aşıq Nəbi Nağıyev (balabanda Sərdar Məmmədli), Gözəl Kəlbəcərli, Samirə Əliyeva və Əli Tapdıqoğlu, Cənubi Azərbaycandan gələn aşıq Cəfər Xakipur, aşıq Solmaz Kosayeva, aşıq Məhərrəm Hüseynli, aşıq Gülarə Azaflı, aşıq Telli Borçalı, Bakir Ağbulaqlı, Anar Abdullayev, Ulduz Quliyeva, Azər Fərmayıloğlu, Toğrul İbrahimov, Əbülfəz Məmmədini, Sərdar Məmmədli, Vəli Şınıxlı, Babək Şakirli, Kəmalə Qubadlı ustadın repertuarından ifalar təqdim etdilər.

İradə SARIYEVA

Bakı xəbər.- 17-18 noyabr.- S.15